9
Na Taovia e Pedegira na Israel
1 Minau au reia na Taovia e tutû i ligisana na belatabu, maia e tsarivaniau: “Ko labu susuligâ na kelaqira na tuguruna na Vale Tabu, me ke gini kakanu popono na kovokovo; mo ko rutugira ma kara puka bâ tana lovaqira na tinoni. Migira na tinoni kara kauvisu ta na tagu ia, inau sauba kau matesigira sui tana vailabu. Me tagara goto ke kesa tangomana ke tsogoligi se ke taopoi.
2 Me atsa moa ti kara tsaitsunâ ma kara ba tsau tana barangengo na mate, minau sauba kau ba tangoligira moa. Me atsa goto moa ti kara dato bâ tana masaoka, minau sauba kau ba raqa tsunamaigira.
3 Me ti vaga kara ba taopoi i kelana na Vungavunga Karmel, minau sauba kau tsoni lalaveqira ma kau tangoligira. Me ti vaga kara ba taopoi taniau inau i vavana na tasi, minau sauba kau ketsalia na tuqana vigo na omea mamauri i tasi ke gatigira.
4 Me ti vaga igira gaqira gala kara aditsekavanogira kesa tana vera tavosi, minau sauba kau ketsaligira kara labumatesigira. Inau au padakuti matena nogo kau matesigira sui lakalaka, me utu goto kau sangagira.”
5 Na Taovia God Susuliga Sosongo e pelea moa na barangengo,
me gini kasisi;
migira sui ara mauri i laona ara tangitangi.
Ma na barangengo popono e tsobodato me pukaluvu tugua vaga moa na Kô Nile.
6 Na Taovia e logo verana i baragata,
me tatakatsinia na masaoka i kelana na barangengo.
Maia e saoa na tasi
me qetutsunâ tana barangengo.
!Na Taovia nogo na asana aia!
7 Na Taovia e tsaria, “Tinoni ni Israel, inau au padalokigira na tinoni ni Sudan atsa vaga moa au padalokigamu igamu. Inau nogo au adirutsumigira na Pilistia tania i Krete, ma na Siria tania i Kir, atsa vaga moa kalina au adirutsumigamu igamu tania na Ejipt.
8 Inau na Taovia God au morotsuna bâ tana Israel, mau reigira popono nina sasi, me sauba nomoa kau toroutsani saikesalia tania na barangengo. Me utu moa kau matesiligigira sui lakalaka na kukuana a Jakob.
9 “Minau sauba kau moloketsa moa, ma kau keseligira na tinoni ni Israel, vaga moa kalina ara keselia na pulaua i laona na neti, gana kau adiligigira sui lakalaka igira na tinoni sasi ma kara nangaligi saikesa tania na barangengo.
10 Me sauba kara mate sui tana vailabu igira na tinoni sasi ara totu i laoqira niqu tinoni, igira ara goko vaga iani, ‘God sauba e utu ke tamivania na omea seko ke mai varangisigita.’ ”
God Sauba Ke Vaturi Visutugua Na Israel
11 Na Taovia e tsaria, “E maimai nogo na tagu i tana sauba inau kau vaturi visutugua na verana a David, aia e vaga kesa na vale e toroutsa saikesa. Inau sauba kau tsiparatugua na bengebengena ma kau aqosidoutugua. Sauba kau logovisutugua me ke totu dou vaga nogo i sau.
12 Mi tana, migira na tinoni ni Israel sauba kara tangoli visutugua na kao ni Edom, migira sui goto na vera tavosi au tamanigira nogo i sau. Inau nogo na Taovia au tsaria na omea iani, me sauba kau naua me ke laba vaga ia.”
13 Me tsarigotoa na Taovia, “Ara maimai nogo na dani,
i tana kara dato magobu dou na omea tsukatsuka,
me ke tau vati sui moa na pipitsu, me ke raratugua na uta,
ma kara mada danga sosongo na vuana uaeni,
me ke tau moa vati sui na rapasiaqira ma kara mada goto visana.
Ma na kona na uaeni puipui sauba ke kukudu tsuna tana vungavunga,
me ke tatave tana tetena.
14 Inau sauba kau adivisugira tugua niqu tinoni tana niqira kao.
Me sauba kara logovisugira niqira verabau ma kara totuvigira;
sauba kara tsukâ niqira uta na uaeni ma kara inuvia na uaenina,
sauba kara aqoa niqira uta ma kara gania na vuana na omea ara tsukâ.
15 Inau sauba kau tsukagira niqu tinoni tana kao inau au saunogoa vanigira,
me sauba e utu goto kesa ke tangomana na vutiligiaqira tugua.
Inau nogo na Taovia nimui God au tsaria na omea iani.”