27
Igira Nina Ketsa God Ara Maregira Tana Pavavatu
1 Mi tana ma Moses, kolugira na ida tana Israel, ara tsarivanigira na toga, “Kamu muridougira pipi sui na totosasaga igira inau au sauvanigamu i dani eni.
2 Tana dani kalina igamu kamu tulusavu tana Kô Jordan, ma kamu sage bâ tana kao aia na Taovia nimui God ke sauvanigamu, ma nimui aqo kamu papidatogira kara visana na vatu loki, ma kamu tsavuginigira na simente,
3 ma kamu marea i koniqira pipi sui na ketsa girani. Mi kalina kamu sage bâ tana kao lakataga dou aia na Taovia niqira God igira na mumuamui e vekenogoa vanigamu,
4 ma kamu totu nogo i tabana na Kô Jordan, ma kamu papidatogira na vatu girani tana Vungavunga Ebal, vaga nogo inau au tsarivanigamu i dani eni, ma kamu tsavuginigira na simente.
5 Ma kamu aqosia kesa na belatabu tana nauna ia, ginia na vatu amu tau katsuginia sa tapala,
6 rongona na belatabu kamu aqosivania na Taovia nimui God kamu aqosiginigira moa na vatu amu tau katsugira. Mi kelana na bela ia igamu kamu savorigira nimui savori-kodokodo,
7 mi tana goto nogo kamu savorigira ma kamu ganigira nimui sausau amu tangomana na ganipatâ na turina, ma kamu gini magemage i matana na Taovia nimui God.
8 Mi tana vatu amu bulu poponoginia na simente kamu mare makalidoua pipi sui nina ketsa God.”
9 Mi muri, ma Moses kolugira na manetabu tana puku konina a Levi, ara tsarivanigira na toga sui ni Israel, “Kamu rorongo igamu sui na tinoni ni Israel. I dani eni igamu amu lia nogo nina tinoni na Taovia nimui God.
10 Vaga ia, ma kamu rongomangana ma kamu muridougira pipi sui nina ketsa igira inau au tusuvanigamu i dani eni.”
Na Vealagi e Kalegira Igira Ara Petsakoe
11 Mi muri, ma Moses e tsarivanigira na tinoni ni Israel,
12 “I murina kalina igamu kamu savu taligu nogo tana Kô Jordan, ma na puku girani kara ba tutû tana Vungavunga Gerisim kalina kara tabugira na tinoni: igira nogo na puku konina a Simeon, ma Levi, ma Juda, ma Isakar, ma Josep, ma Benjamin.
13 Migirani na puku tavosi girani kara ba tutû tana Vungavunga Ebal kalina kara tsarivulagigira na vealagi: igira nogo na puku konina a Ruben, ma Gad, ma Aser, ma Sebulun, ma Dan, ma Naptali.
14 Migira na Levite niqira aqo kara tsarilokia na goko girani:
15 “ ‘God ke vealaginia aia ke aqosiginia na vatu, se na gai, se na tapala, sa titinonina na god peropero me ke samasama dodo vania. Na Taovia e reisavi sosongolia na samasama vaniaqira na god peropero.’
“Migira na toga sui kara tuguvisua ma kara tsaria, ‘!Eo, e dou ke vaga!’
16 “ ‘God ke vealaginia aia ke tau kukuni tanikaira na tamana ma na tinana.’
“Migira na toga sui kara tuguvisua ma kara tsaria, ‘!Eo, e dou ke vaga!’
17 “ ‘God ke vealaginia aia ke ratsua na papadana nina votavota kesa gana verakolu.’
“Migira na toga sui kara tuguvisua ma kara tsaria, ‘!Eo, e dou ke vaga!’
18 “ ‘God ke vealaginia aia ke idagana sautu me ke gini liu sasi na tinoni koko.’
“Migira na toga sui kara tuguvisua ma kara tsaria, ‘!Eo, e dou ke vaga!’
19 “ ‘God ke vealaginia aia ke tovoa na utusiana na pedegoto vaniaqira na tinoni ni veratavosi, ma na baka tinamate, ma na daki tinamate.’
“Migira na toga sui kara tuguvisua ma kara tsaria, ‘!Eo, e dou ke vaga!’
20 “ ‘God ke vealaginia aia ke paluvangamana tamana tana maturu koluana sa tauna tamana.’
“Migira na toga sui kara tuguvisua ma kara tsaria, ‘!Eo, e dou ke vaga!’
21 “ ‘God ke vealaginia aia ke naugana na omea tuavati.’
“Migira na toga sui kara tuguvisua ma kara tsaria, ‘!Eo, e dou ke vaga!’
22 “ ‘God ke vealaginia aia ke vainaugi kolua kesa na vavinena se na dalena daki kesa goto na tauna tamana.’
“Migira na toga sui kara tuguvisua ma kara tsaria, ‘!Eo, e dou ke vaga!’
23 “ ‘God ke vealaginia aia ke vainaugi kolua na tarungana.’
“Migira na toga sui kara tuguvisua ma kara tsaria, ‘!Eo, e dou ke vaga!’
24 “ ‘God ke vealaginia aia ke naua na labupoi.’
“Migira na toga sui kara tuguvisua ma kara tsaria, ‘!Eo, e dou ke vaga!’
25 “ ‘God ke vealaginia aia ke tamia na adiqolona gana ke labumatesia kesa na tinoni dou.’
“Migira na toga sui kara tuguvisua ma kara tsaria, ‘!Eo, e dou ke vaga!’
26 “ ‘God ke vealaginia aia ke tau murigira pipi sui nina ketsa ma nina sasani God.’
“Migira na toga sui kara tuguvisua ma kara tsaria, ‘!Eo, e dou ke vaga!’ ”