6
1 Miani e kesa segeni goto na omea seko loki inau au morosia i laona na barangengo iani, me ngoli sosongoligira na tinoni:
2 God e dona ke tamivania kesa tinoni ke tamanina danga nina qolo, ma nina omea levolevo, me ke tangiloki gana rongo, me ke tau goto tagara vania sa omea. Mi muri, maia God e tau tamivania ke gini mage na omea e tamanina. Me molovania kesa segeni tinoni ke aditamanina me ke gini mage. Na omea vaga ia e tau saikesa goto me tau lelê tamanina sa rongona.
3 Me ti vaga kesa tinoni ke tamanina kesa sangatu na dalena maia ke mauri okaoka, me atsa moa ke mauri oka koegua, me ti ke tau dona na mage i laona na maurina, ma kara tau qiludoua kalina ke mate, mi tana, minau au tsaria laka kesa na baka aia e mate nogo i tobana tinana te e botsa e dou liusia bâ na tinoni vaga ia.
4 E tau lelê pelu vania na baka ia ti ke botsa; rongona aia e ba nanga lê saviliu i laona na rodo i tana ara padale saikesalia.
5 Me atsa moa ti e tau reilakana na mararana na dani se ke tau donaginia e koegua vaga na mauri, ma na baka ia e ba tsodonogoa na mango saliu.
6 Maia e dou liusia bâ na mane e mauri oka me tau tsodo mage tana maurina, atsa moa ti vaga aia e mauri ruka toga na ngalitupa. ?Me laka kaira sui sauba kara ka tau vano moa kesa tana nauna?
7 Na tinoni e aqosia pipi sui nina aqo agana moa ke gini tamani gana mutsa, maia e tau lelê dona ke vatsangia na masu.
8 ?Laka tana omea gua e gini dou bâ na maurina na mane sasaga loki liusia na maurina na tinoni tau sasaga? ?Me ti vaga kesa na tinoni sekona lê ke donadoua na tagaoviana na maurina segeni, ma nagua na peluna vania?
9 Eo, e tau lelê tamani sa rongona. E vaga moa ti na takuvi guguri. E dou bâ ti ke gini mage dou na tobamu tana omea igoe o tamaninogoa, liusia na kili sailaginiana moa na omea tavosi goto.
10 Pipi sui na omea ara laba i dani eni ara pedenogoa i sau te ara laba, migita sui a donanogoa laka e tau tugua kesa ke vaimangasuguradigi kolua kesa aia e susuliga liusia bâ aia.
11 Ti vaga ke danga sosongo na tsaqina goko ko tsaria, me sauba ke danga sosongo goto bâ na tsaqina goko tagara rongona lê ko tsonia. ?Ma nagua na peluna vanigo igoe?
12 ?Masei tinoni nomoa tangomana ke donaginia nagua e dou bâ vania i laona nina mauri kurikuri e tau tamani rongona? Na maurina tinoni e liu tsaku vaga moa ti na auau lê? ?Masei tangomana ke donaginia nagua sauba ke laba i laona na barangengo i murina na mateana?