15
Gaqira Matemate Igira na Juda
1 Mi muri, ma na Taovia e tsarivaniau inau a Jeremia, “Me atsa moa ti kaira a Moses ma Samuel kara ka totu nogo ieni i mataqu, ma kara nonginongi tsai vaniau mateqira na tinoni girani, me utu goto inau kau galuvegira. Ko ketsaligira kara vanoligi saikesa tania na mataqu inau.
2 Mi kalina kara veisuago laka iava tana sauba kara vano, mo ko tsarivanigira laka inau au tsarivaganana iani:
Igira visana sauba ke laba gaqira matemate tana liuna na lobogu loki,
mi tana nogo sauba igira kara vano.
Migira visana sauba ke laba gaqira matemate tana vailabu,
mi tana sauba igira kara vano.
Migira goto visana sauba kara tsodoa gaqira matemate tana liuna na vitoa,
mi tana sauba igira kara vano.
Migira goto visana sauba kara tsodoa niqira matemate kalina kara aditsekavanogira,
mi tana sauba igira kara vano.
3 Inau na Taovia au pedenogo laka sauba kara tu vati na omea seko loki kara tu laba vanigira: igira sauba kara mate tana vailabu; ma na pai sauba kara raqaligia na koniqira; ma na manu sauba kara ganigira; ma na omea tuavati atsi sauba kara gani lavelavea na omea ara kauvisu.
4 Me sauba kau naua migira na toga sui tana barangengo kara gini beke loki na reiana na omea seko vaga ia e laba vanigira, tana rongona na omea tabaruga a Hesekia na dalena a Manase e naua i Jerusalem, kalina aia e taovia tsapakae tana Juda.”
5 Ma na Taovia e tsaria,
“?Igamu na tinoni ni Jerusalem asei sauba ke galuvegamu,
masei goto sauba ke tangisigamu?
?Masei goto ke gini boe na ba veisuamui ti vaga amu mauri dou se tagara?
6 Igamu amu sove taniau inau, mamu piloligi taniau.
Me vaga ia, minau au tatakatsinia na limaqu mau labuginigamu,
rongona au qisi nogo na tangolivisuana na korequ.
7 Mi laona pipi na vera tana butona kao iani
inau au tsonigamu vania na guguri, vaga moa ti na buruburu makede.
Au toroutsanigamu igamu niqu tinoni,
mau matesigira goto na dalemui,
rongona igamu amu tau mololea nimui sasaga tabaru.
8 Mi laona nimui butona kao na daki tinamate ara danga sosongo,
liusia bâ na vatuna one i tasi.
Au matesigira nimui mane vaolu kalina ara susuliga dou moa,
mara gini rota loki sosongo igira na tinaqira.
Au naua me tavongani gadovigira na melu ma na matagu loki.
9 Ma na daki ara mate vitu na dalena mane
e mateluvu, me datokesa na mamagona.
Ma na dani e vaga moa na bongi vania;
maia e paluvangamana, me gini melu sosongo tobana.
Minau sauba kau mologira gamui gala
kara matesigira igira i laomui ara mamauri moa.
Inau nogo na Taovia au tsaria na omea iani.”
A Jeremia e Veisua na Taovia Tana Rongona na Rota e Gadovia
10 !Inau a Jeremia, e melu loki sosongo nomoa na tobaqu! ?Matena gua te e vasuau tinaqu? Inau niqu aqo kau vaiganigi, ma kau vaimangabarigi, kolugira na tinoni sui tana butona kao iani. Minau kesa au tau dona na kaoni, migira na tinoni tavosi ara tau goto kaoni i koniqu inau. Me atsa moa e vaga ia, migira na tinoni sui ara vealaginiau moa inau.
11 Taovia, e dou moa kara manaliau pipi sui niqira vealagi ti vaga inau au tau nogo aqo dou vanigo igoe, se au tau nonginongi tsai mateqira gaqu gala kalina e gadovigira na rota loki ma na tagu seko.
12 ?Asei nomoa tangomana ke bokua na tapala laka, putsikae bâ na tapala laka talu tabana i vava ara lalo kolua na tapalamila?
13 Ma na Taovia e tsarivaniau, “Inau sauba kau mologira na gala kara kalagaivanogira niqira qolumila ma niqira omea tatamani sui igira niqu tinoni, gana kau kedeginigira na matena niqira sasi ara naua i laona na butona kao popono iani.
14 Inau sauba kau tsonigira i limaqira gaqira gala, ma kara aqo vanigira kesa tana kao ara tau goto vati donaginia, rongona niqu momosatoba loki inau e vaga saikesa moa na lake, me sauba ke iru saviliu.”
15 Mi muri, minau au tsaria, “Taovia, igoe o donagininogoa niqu rota loki. Ko padaau inau mo ko sangaau. Ko tangotuguqu i koniqira igira ara rotasiau. Ko padatugua laka tana rongona au aqo vanigo nogo igoe, te ara peaginiau inau.
16 Igoe o goko vaniau, minau au rongomi vatavia pipi sui nimu tsaqina goko. Inau nimu tamani nogo igoe Taovia God Susuliga Sosongo, me gini mage sosongo tobaqu na rongomiana nimu goko.
17 Inau au tau ba totu lê kau kiakia ma kau magemage kolugira na tinoni tavosi, tagara. Inau au rongomangamu moa igoe, mau totu segeniqu, rongona igoe o dangaliginiau na koremu loki.
18 ?Rongona gua ti au rota babâ moa vaga ia inau, vaga moa au tamanina na vora loki e utu na taliana? ?Rongona gua ti e tau vati mavu? ?E mana nomoa igoe o tau sangaau. Inau au vaga saikesa nogo kesa tinoni e ba lave lê na kô na inu tana vuravura mamatsa.”
19 Ma na Taovia e gokovisu vaniau me tsaria, “Ti vaga ko pilovisumaitugua i koniqu, minau sauba kau adivisugo mo ko lia tugua niqu maneaqo. Me ti vaga ko tsonia moa na goko dou tamani rongona, me tau na goko bubulega tagara rongona, migoe sauba ko lia tugua niqu propete inau. Migira na toga sauba kara visumaitugua i konimu igoe, me ke tau kilia igoe ko bâ i koniqira.
20 Minau sauba kau naua, migoe sauba ko tukakai i mataqira vaga saikesa moa na baravatu tapalamila. Igira sauba kara vailabu kolugo igoe, me utu moa kara tuliusigo. Inau sauba kau totu kolugo, ma kau dilago, ma kau ravisigo.
21 Inau sauba kau laumaurisigo tania na limaqira na tinoni vanga tsutsukibo, ma na vanga tangopeke seko. Inau nogo na Taovia au tsaria na omea iani.”