46
Ara Tuliusigira na Ejipt i Karkemis
1 Na Taovia e goko vaniau, inau a Jeremia, tana rongoqira na puku tavosi,
2 tuturiga tana rongoqira na Ejipt. Miani nogo na omea e tsaria tana rongona nina alaala na mane vaumate a Neko na taovia tsapakae tana Ejipt, aia Nebukadnesar na taovia tsapakae ni Babilonia e tuliusia i Karkemis ligisana na Kô Euprates tana vatinina ngalitupa aia Jehoiakim e taovia tsapakae tana Juda:
3 Iani nogo nina goko na Taovia:
“Igira gaqira taovia na mane vaumate ni Ejipt ara gudato mara tsaria,
‘!Tangoli manogatigira nimui tako ma kamu alavano tana vailabu!
4 !Vangaraugira nimui ose ma kamu sagekae i kelaqira!
!Sagelia gamui kepi, ma kamu tû palatete!
!Asa vavangagira nimui bao, ma kamu sagelia nimui tako!’
5 “?Laka nagua au reia inau?
Inau na Taovia au reigira na mane vaumate ni Ejipt
ara matagu loki mara viri tsogovisu lê.
Ara ulo tsaku sosongo mara tau goto morovisu.
Na omea mamataguniga e totu moa pipi tana nauna sui.
6 Igira ara dona sosongo na ulo ara tau tangomana na tsogoligi.
Migira na mane vaumate susuliga ara tau goto tangomana na taopoi.
Mi tabana i vava na Kô Euprates ara ba tubulagi mara viri puka.
7 ?Asei puku na tinoni sagata e nusu datomai vaga moa na Kô Nile,
vaga moa kalina e tave na obo me tsipudato tana kabikabi?
8 Aia nogo na Ejipt e nusu datomai vaga moa na Kô Nile,
vaga moa kalina e tave na obo me tsipudato tana kabikabi.
Ma na Ejipt e tsaria, ‘Inau sauba kau raqasaigira niqu alaala na mane vaumate
ma kau tsavua na barangengo popono,
me sauba kau toroutsanigira na verabau ma na tinoni sui ara mauri i laoqira.
9 !Igamu na ose kamu aligiri na vano,
migamu na terê kamu terere!
!Ma kamu molovanogira na mane vaumate,
migira na Sudan ma na Libia kolua niqira tako,
migira goto na mane ni Lidia ara dona sosongo na gini vanavana na parige.’ ”
10 Iani nogo nina dani na Taovia God Susuliga Sosongo,
na dani i tana aia ke tangotugu,
me ke kedegira gana gala.
Ma nina isi sauba ke ganigira poi tsau kalina ke masu doka,
me ke inuvia na gabuqira poi tsau kalina ke vatsa.
I dani eni nogo na Taovia God e savorigira gana lamuta
tana butona kao tabana i vava ligisana na Kô Euprates.
11 !Bâ, igamu na tinoni ni Ejipt kamu vano rago i Gilead
ma kamu ba lavea gamui sinagore!
Igira sui lakalaka gamui sinagore ara tau goto dona kara manalia sa omea.
Me tagara goto sa sinagore tangomana ke maurisigamu.
12 Nimu mane vaumate ara vaisudugi,
mara viri puka sui i lao.
E tau managamui tana vailabu,
migira sui na puku tavosi ara rongomia tana rongona gamui paluvangamâ,
ma na tatangina nimui ngangai e kuvia na barangengo popono.
Na Maiana a Nebukadnesar
13 Mi kalina a Nebukadnesar na taovia tsapakae ni Babilonia e mai na bokiana na Ejipt, ma na Taovia e goko tugua vaniau me tsaria,
14 “Katevulagia na omea iani i laoqira na vera tana Ejipt,
i Migdol, mi Mempis, mi Tapanes:
‘!Kamu totu vangarau na dilana gamui tsari,
rongona pipi sui na omea amu tamanigira sauba kara toroutsanigira tana vailabu!
15 ?Laka egua te e puka aia Apis nimui god peropero susuliga igamu?
!Na Taovia nogo e tsoni pukalia aia!’
16 Igira nimui mane vaumate ara viri tubulagi mara puka,
mara vaigokovigi mara tsaria,
‘!Tsaku! !Ida ma ka visu i verada i koniqira nida tinoni,
ma ka tsogoligi tania niqira isi igira gada gala!’
17 “Kamu moloa na soana vaolu vania na taovia tsapakae ni Ejipt,
kamu soaginia ‘Manga Rerenge Me Tau Tugua Sa Omea.’
18 Inau nogo na Taovia Susuliga Sosongo au taovia tsapakae.
Inau nogo na God mamauri.
Minau sauba kau molomaia kesa ke baginigamu,
ma na susuligana aia sauba ke liusia na susuligaqira na tinoni tavosi sui,
vaga nogo na Vungavunga Tabor e paladato liusigira sui na vungavunga tavosi,
ma na Vungavunga Karmel aia e dato ao tabana i tasi.
19 !Igamu na tinoni ni Ejipt kamu vangarau manoga,
rongona sauba kara aditsekagamu!
Mi Mempis sauba ke lia na kaomate,
ke toroutsa saikesa me ke tagara goto sa tinoni ke totuvia.
20 Na Ejipt e vaga moa kesa na buluka daki rerei dou sosongo,
me lovo mai i konina kesa na lango na buluka talu i vava me gatia.
21 Igira na Ejipt ara voligira na mane vaumate visana tana vera tavosi
kara sanga tabana kolua.
Maia e paladougira, mara vaga saikesa moa na dalena buluka papaquru.
Eo, migira ara tau moa susuliga na tû ma na vailabu;
migira sui lakalaka ara pilo mara viri tsogo lê.
E laba nogo na danina gaqira kede,
na tagu i tana sauba kara toroutsa saikesa.
22 Na Ejipt e tsogoligi dodo vaga moa na muata,
kalina aia e reia na alaala loki niqira mane vaumate na gala ara maimai varangi nogo.
Igira ara labuginia na rarati
vaga moa na mane ara kavitsunagira na gai,
23 mara petsa pukalia na pono loki e utu na sage bâ i laona.
Niqira mane vaumate gana gala ara danga sosongo
me gini tau tangomana na tsokoraeaqira.
Ara danga liusia bâ na alaala na anelovo.
24 Me sauba nomoa ke paluvangamaqira na Ejipt,
kalina inau kau mologira i limaqira na tinoni ara talumai tabana i vava.
Inau nogo na Taovia au tsaria na omea iani.”
25 Na Taovia Susuliga Sosongo, na God ni Israel, e tsaria, “Inau sauba kau kedea Amon, niqira god peropero na Tebes, kolua na Ejipt, ma nina god peropero, ma nina taovia tsapakae, migira sui goto ara vataragi i konina aia.
26 Ma kau mologira sui i limaqira igira ara area na labumatesiaqira, igira nogo a Nebukadnesar na taovia tsapakae ni Babilonia ma nina mane vaumate. Bâ, mi muri ti igira na tinoni sauba kara ba totuvitugua na Ejipt, vaga ara naunogoa i sau. Inau nogo na Taovia au tsaria na omea iani.”
Na Taovia Sauba Ke Maurisigira Nina Tinoni
27 Na Taovia e tsarigotoa vaganana iani,
“Igamu niqu tinoni kamu laka na matagu,
migamu na toga ni Israel ke laka na puka lê rebona gamui susuliga.
Inau sauba kau laumaurisigamu tania na vera i tana amu totu tseka kalina ia.
Sauba nomoa kamu visumaitugua i veramui ma kamu totu tana rago,
me sauba kamu totu ravi dou saikesa,
me ke tagara goto kesa ke molo matagu vanigamu.
28 Igamu na Israel, igamu niqu tinoni,
kamu laka na matagu rongona inau nogo au totu kolugamu.
Sauba kau toroutsanigira saikesa pipi sui na puku tavosi
i tana inau au sarangasigamu,
migamu moa e utu kau toroutsanigamu saikesa.
E mana, sauba nomoa kau kedegamu,
mi kalina kau kedegamu ma kau naua moa tana pedegoto.
Inau nogo na Taovia au tsaria na omea iani.”