9
1 Ke dou ti vaga na lovaqu ke vaga na vuravura na kô
tana e sarara mai na kô na mataqu,
gana kau ngangaisigira na dani ma na bongi
igira niqu tinoni ara viri matesigira nogo.
2 Me ke dou goto ti vaga kau tamanina kesa na nauna i laona na kaomate
i tana tangomana kau ba totu tabaligi tanigira niqu tinoni.
Igira sui lakalaka ara tau saikesa totukakai i konina na Taovia,
na alaala na tinoni vanga tsutsukibo moa.
3 Ara manogatia na lapiqira na tsoniana moa na goko pero,
vaga moa kesa na mane e vangarau manogatia na gini vanavana nina pipili.
Ara vô saikesa na goko mana, ma na pero moa e dato susuliga i laona na kao popono.
Ma na Taovia e tsaria,
“Igira niqu tinoni ara naugira na omea tabaruga ara vaitsarimurigi,
mara tau goto boeginiau inau niqira God.”
4 Pipi tinoni nina aqo ke parovata dou tania na kulana,
me ke laka goto na noruana na tasina segeni;
rongona pipi na tamatasi ara vaimalapalusigi moa vaga a Jakob,
me pipi kesa e keli perogana moa na kulana.
5-6 Igira sui lakalaka ara ida seko vanigira na kulaqira,
me tagara goto kesa ke tsaria sa omea ke mana.
Ara lavusia na lapiqira na tsoniana moa na goko pero,
mara sove goto na mololeana niqira sasi.
Ara naua na tsutsukibo loki, ma na vaimalapalusigi ara vaitsarimurigi.
Ma na Taovia e tsaria laka igira nina tinoni ara sove tania moa.
7 Mi tana rongona na omea vaga ia ti na Taovia Susuliga Sosongo e tsaria,
“Inau sauba kau tovogira niqu tinoni,
vaga moa kalina ara kukia na siliva tana lake gana na malesiana.
?Ma nagua goto kau nauvanigira niqu tinoni
rongona igira ara naua moa na omea tabaruga?
8 Na lapiqira ara vaga saikesa nogo na pipili vavanga;
ara tsoni sailaginia moa na goko pero.
Pipi tinoni e malapalu moa na goko dou vaniana na kulana,
mi laona na tobana e vangarau vania moa gana taviti.
9 ?Egua laka sauba kau tau kedegira tana rongona na omea vaga girani?
?Me laka kau tau tangotuguqu inau i konina na puku vaga iani?
Inau nogo na Taovia au tsaria na omea iani.”
10 Minau a Jeremia au tû mau tsaria,
“Sauba kau tangisigira na vungavunga,
ma kau ngangaisigira na butona kao i tana e dato dou na buruburu,
rongona ara viri makede takuti,
me tagara goto ke kesa ke liu i laoqira.
Ma na tatangina niqira kanga na buluka ara tau nogo rongomia i tana;
migira na manu ma na omea tuavati atsi ara tsogoligi sui taninogoa.”
11 Ma na Taovia e tsaria,
“Inau sauba kau toroutsania na Jerusalem,
me ke lia na nauna i tana ara totu igira na pai atsi.
Migira na verabau sui tana Juda sauba kara lia na kaomate,
na nauna i tana e tau totuvia sa tinoni.”
12 Minau au veisuâ na Taovia, “?Taovia laka na rongona gua ti e seko popono na kao ia, me makede vaga moa ti na kaomate i tana e tau nogo liu sa tinoni? ?Laka asei bâ ke sasaga tugua ke padagadovia na omea vaga iani? ?Me laka asei igoe o tsarivaninogoa gana ke votarongona vanigira na tinoni tavosi?”
13 Ma na Taovia e gokovisu me tsaria, “Na omea iani e gini laba vaga ia rongona igira niqu tinoni ara sove na muriana niqu ketsa. Igira ara tau saikesa rongomangaqu inau, se kara naua na omea inau au ketsaliginigira.
14 Tagara. Ara tsatsarae sosongo mara ba samasama vania Baal, vaga nogo igira na tamaqira ara sasaniginigira na nauana.
15 Bâ, mi kalina ia, kamu rongomidoua na omea inau na Taovia Susuliga Sosongo, na God ni Israel, sauba kau naua: Inau sauba kau sauvanigira niqu tinoni na kusa vavai kara gani gaqira ma na tabatu kara inuvia.
16 Inau sauba kau sarangasigira i laoqira na puku tavosi, igira migira goto na mumuaqira ara tau vati donaginigira, ma kau mologira na alaala na gala kara baginigira, poi tsau kalina kau matesiligigira saikesa.”
Igira na Tinoni ni Jerusalem Ara Ngangaidato Vania na Taovia Ke Sangagira
17 Na Taovia Susuliga Sosongo e tsaria,
“!Kamu padadoua na omea ara laba!
Kamu soamaigira igira na daki ara lingena na linge na matemate.”
18 Migira na tinoni ara tsaria,
“Kamu tsarivanigira kara tsaku ma kara lingena vanigami na linge na matemate,
poi tsau ke dangadato na kô tana matamami,
ma na vevenuna na matamami kara gini pori popono na ngangai.”
19 Migira ara totu i Sion ara tangitangi mara tsaria,
“!Igita a seko pitsu nogo!
!Ara paluvangamada saikesa!
Ma nida aqo nomoa ka vanoligi tania nida kao;
ara vui pukaligira sui nogo na valeda i tana igita a totu.”
20 Minau au tsaria vanigira,
“Igamu na daki, kamu rongomidoua na omea e tsarivanigamu na Taovia.
Kamu sasanigira na dalemui daki ma kara dona na tangitangi,
migira na kulamui kara dona na lingena na linge na matemate.
21 Na mate e sage tsapatugu tana nida ovaova na bisi
me sage nogoa tana valeqira nida tinoni lokiloki;
maia nogo e vusikutigira na baka tana sautu loki,
ma na mane vaolu tana nauna gana na maketi.
22 Ma na koniqira na tinoni mate ara viri totu piriutsa bamai pipi moa tana nauna,
vaga saikesa moa na tsupu na tae tana poi,
vaga moa na uiti ara kavikutigira mara mololegira moa i tana,
igira na uiti e tau nogo tsakoa ke kesa.
Iani nogoria na omea na Taovia e ketsaliginiau inau kau tsarivanigamu.”
23 Na Taovia e tsaria,
“Igira na tinoni sasaga loki kara laka na gini goko kaekae tana rongona niqira sasaga loki,
migira na mane susuliga tana rongona niqira susuliga,
ma na tinoni tamani danga tana rongona niqira omea danga.
24 Me ti vaga kesa ke ngaoa na gokokae
ma nina aqo ke gini gokokae moa tana rongona aia e donaginiau me padagadoviau,
rongona niqu galuve inau e totu saviliu me vo oli,
mau naua moa na omea e doulaka me goto saviliu.
Igirani nogo na omea au reingaoa inau.
Inau nogo na Taovia au tsaria na omea iani.”
25-26 Na Taovia e tsaria, “Na tagu e maimai nogo i tana inau sauba kau kedegira na tinoni ni Ejipt, mi Juda, mi Edom, mi Amon, mi Moab, migira goto na tinoni tana kaomate igira ara putsi kurikuria na ivuqira. Na tinoni sui girani ara paripapadaqira tana koniqira lê moa, mara tau manalia niqira tabana na vaitasogi ara gini paripapadana. Tagara lelê goto ke kesa vidaqira, migira goto na tinoni ni Israel, kara manalia niqira tabana na vaitasogi ara naukoluau inau.”