4
Na Taovia Sauba Ke Tagaovigira na Tinoni Sui Tana Rago
(Isaia 2:1-4)
1 Me kesa tana tagu i muri bâ,
maia na Vungavunga Sion i tana e tû nina Vale Tabu na Taovia,
sauba ke dato liuliu bâ,
me ke katsi liusigira na vungavunga sui.
Migira na puku danga sauba kara kalemaia moa aia,
2 ma niqira toga sauba kara tsarivaganana iani,
“Ida gita ma ka dato bâ tana nina vungavunga na Taovia,
tana nina Vale Tabu niqira God igira na Israel.
Maia sauba ke sasanigita na omea e ngaoa igita ka naua;
mi tana ti ka dona na liu bâ tana sautu aia e vilinogoa vanigita.
Rongona igira sui nina sasani na Taovia ara talumai mai i Jerusalem i kelana na Vungavunga Sion;
mi tana nogo aia e tû te e mologoko bâ vanigira nina tinoni.”
3 Maia nogo sauba ke gotosia niqira vaikoregi na puku sui,
me ke vaturia na goto i laoqira na puku susuliga, igira ara totu ao, migira goto ara totu varangi.
Migira sauba kara tupia niqira isi na vailabu, me ke lia lê na mani tsaikao tana niqira uta,
ma niqira bao ke lia lê niqira gau na aqo.
Me sauba ke tagara goto sa puku ke ngaoa na labuana na puku tavosi,
se ke vangarautugua na vano tana vailabu.
4 Me pipi tinoni sauba ke mauri tana rago
i ligisana nina uta na uaeni ma nina gai mutsamutsa segeni nogo,
me sauba ke tagara goto ke kesa ke naua me ke gini matagu.
Na Taovia Susuliga Sosongo nogo e vekea na omea iani.
5 Pipi tatasa na puku ara samasama vania mara rongomangana nina god segeni nogo, migita na tinoni ni Israel, sauba ka samasama ma ka rongomangana moa na Taovia nida God na dani ma na dani.
Igira na Israel Sauba Kara Visutugua i Veraqira
6 Na Taovia e tsaria, “E maimai nogo na tagu i tana inau sauba kau adisaigira tugua na tinoni au kedegira nogo, mara gini rota na totu tsinogo.
7 Ara tsaurae lê nogo mara totu ao sosongo tania na veraqira, mara tau nogo susuliga na vanovano. Minau sauba kau susuligasigira igira ara kauvisu, ma kara lia tugua na puku loki. Minau nogo sauba kau tagaovi kaputigira tana Vungavunga Sion ke tû tana tagu ia me ke babâ saviliu na dani ma na dani.”
8 Migoe Jerusalem, God nogo e totu i laomu, me reitutugugira nimu tinoni, vaga moa kesa na mane reitutugu sipi dou e reitutugugira nina sipi. Migoe sauba ko lia tugua na verabau pukuga vaga nogo i sau.
9 ?Megua vaga igoe Jerusalem, ti o ngangai loki vaga ia? ?Matena gua ti o rota loki vaga moa kesa na daki e vatsangia na dalena? ?Ke tau utu ngatsu matena igoe o tau tamanina sa nimu taovia tsapakae, migira goto nimu tinoni sauparovata ara viri mate sui nogo?
10 Kamu biritsiu ma kamu kukungu igamu na Jerusalem vaga moa na daki e parâ na vasusu, rongona kalina ia sauba kamu vanoligi tania nimui verabau, ma kamu ba totu tavongana bamai lê. Me sauba nomoa nimui aqo kamu vano i Babilon, mi tana nogo ti na Taovia ke laumaurisigamu tanigira gamui gala.
11 Ara danga nogo na puku loki ara sai alaala agana kara mai na bokiana na veramui. Mara tsarivaganana iani, “!Ida ma ka ba toroutsania na Jerusalem, ma ka reilakana kalina ke totu toroutsa popono!”
12 Migira na puku loki girani ara tau saikesa donaginia na omea e totu tana nina papada na Taovia. Mara tau goto reigadovia laka God nogo e soasaigira rongona aia e ngaoa ke kedegira, vaga saikesa moa kalina ara tsakosaia na uiti mara adivanogira tana nauna na labududusi uiti.
13 Ma na Taovia e tsaria, “Igamu na toga ni Jerusalem, kamu bâ ma kamu kedegira gamui gala. Inau sauba kau naua migamu kamu susuliga vaga na buluka mane e tamanina na kakatsana tapala, ma na perana tuana tapalamila. Igamu sauba kamu tsogori rapasigira kara danga na puku loki, ma niqira omea levolevo loki matena ara laugira tana tangopeke seko, igamu kamu adigira ma kamu saugira vaniau inau na Taovia na barangengo popono.”