8
Na Tsonikaeana na Sasaga Loki
1 Kamu rorongo dou! Na Sasaga Loki e sosoa,
ma na papadagado e goko dato mai.
2 Aia e tutû i kelana na tetena liligina na sautu,
mi tana ara labasai na sautu.
3 Aia e tû tana nauna na sage bâ tana verabau,
i liligina nogo na matsapakapuna, me sosoa me tsaria:
4 “Inau au veisuagamu igamu pipi sui na mamatana tinoni tana barangengo.
5 ?Laka igamu amu tau vati ganoga moa? Bâ, ma kamu sasani gana kamu gini ganoga.
?Laka igamu amu bubulega moa? Bâ, ma kamu sasania na tamani sasaga.
6 Kamu rongomigira dou niqu goko dou laka.
Igira sui na omea au tsarivanigamu inau ara goto.
7 Mara mana sui na omea inau au tsaria.
Au reisavi sosongoligira na gokopero.
8 Pipi sui lakalaka na goko au tsaria inau ara mana,
me tagara goto sa niqu goko ke tau mana se ke raqa sekolia ke kesa.
9 Pipi na omea sui ara maka dou vania na tinoni e dona na morogado,
me maka dou vanigotoa aia e sasani dou.
10 Kamu vilia na sasani ma na donalevo i koniqu inau,
rongona niqu goko inau ara dou liusia bâ na siliva ma na qolumila laka.
11 “Inau nogo na Sasaga Loki, mau dou liusia bâ na vatu angaanga;
me tagara goto sa omea kamu kilia ke dou atsa koluau inau.
12 Inau na Sasaga Loki, mau tamanina na morogado ma na donalevo,
mau vilivotagira dou na omea sui.
13 Aia e kukuni tania na Taovia e reisavigira na omea seko;
inau au reisavi sosongolia na kaekae ma na koesegeni,
na sasaga tabaru ma na goko peropero.
14 I koniqu nogo inau ara totu na sasaga loki ma na papadagado,
na morogado ma na susuliga.
15 Au sangagira na taovia tsapakae kara gini tagao dou,
migira na tagaovera gana kara vaturiginia na ketsa dou.
16 Pipi sui na tagaovera tana barangengo ara tagao tana niqu sasanga inau,
atsa moa ti na tinoni lokiloki ma na tinoni tataovia.
17 Inau au galuvegira igira ara galuveau;
masei moa ti vaga ke laveau inau, me tangomana ke tsodoau.
18 I koniqu inau ara totu sui na omea tatamani, ma na tangi soa,
ma na mauri dou, ma na tangomana, mau ngaoa kau tuvarigira vanigamu.
19 Eo, na omea amu adia i koniqu inau ara dou liusia bâ na qolumila laka ma na siliva laka saikesa.
20 Inau au liu tana sautu na gotolaka;
mau muria moa na sautu na pedegoto,
21 mau vangalaka vanigira igira ara galuveau,
mau dangaliginia na valeqira na omea loki matena.
22 “Na Taovia e vusaau nogo i oka, idavigira na omea sui.
23 Aia e aqosiau inau tana idana tsotsodo, idavia na volaana na barangengo.
24 Au botsa nogo inau ti e laba na kema,
kalina e tau vati vuradato moa sa kô tatave.
25 Au botsa nogo inau ti ara laba na vungavunga,
idavia na tetena kara totu tana sasaqira.
26 Au botsa nogo inau ti God e aqosia na barangengo ma na utana,
me idavigotoa e aqosia na kesanina kakarona na kao.
27 Au totu nogo i tana inau kalina aia e moloa na masaoka tana sasana,
me molovania i tana ke vosa na tuana na parako i mao,
28 mi kalina aia e molokaegira na parako tana masaoka,
me sangavia me gini vuradato na kema loki,
29 me moloketsa vania na mao na tasi ke tau nusudato liusia i tana aia e titivania ke vosa.
Au totu nogo i tana inau, ti aia e pakaa na tsutsuvatuna na barangengo.
30 Inau au totu i ligisana, vaga nogo nina maneaqo,
mau tau kuti na molomage vaniana pipi dani,
me gini laoqu na totu sailagi i matana aia,
31 mau gini magemage na reiana na barangengo,
ma na morosiaqira na tinoni ara totu i laona.
32 “Mi kalina ia, igamu na tinoni vaolu, kamu rongomiau inau.
Kamu naua na omea au tsarivanigamu, me sauba kamu gini mage.
33 Kamu muridoua na omea inau au sasaniginigamu.
Kamu sasaga, ma kamu laka na tsonileana sa tsaqina.
34 Ke mage na tinoni e rongomangaqu inau,
aia e totu sailagi tana matsapana na valequ,
me pipitu gana ke rongomia na omea kau tsarivania.
35 Na tinoni e tsodoau inau e tsodogotoa na mauri,
ma na Taovia sauba ke reingaoa.
36 Ma na tinoni e tau tsodoau inau, e sekoli segenina moa;
me ti vaga ke kesa ke reisaviau inau, tinoni vaga ia e reingaoa moa na mate.”