34
Na Tsonikaeana God Tana Rongona Aia e Dou Sosongo
1 Inau sauba kau soadou sailaginia na Taovia;
ma na mangaqu sauba ke tau goto kuti na tsonikaeana.
2 Eo, sauba kau tsonikaea rongona na omea dou sui aia e naugira.
!Kara rorongo ma kara gini magemage igira sui ara bingi sekoligira!
3 !Kamu sangapata koluau na tsonikaeana na Taovia;
igita sui kolu ka tsonikaea na asana!
4 Inau au soâ na Taovia maia e rongomiau,
me adiligi taniau pipi sui niqu matagu.
5 Igamu sui kamu moro bâ i konina na Taovia, ma kamu gini mage,
me sauba e utu goto kamu gini vangamâ.
6 Igira e tagara kesa ke sangagira ara soâ na Taovia, maia e rongomigira;
me maurisigira tania pipi sui niqira rota.
7 Nina angelo na Taovia e totu kolugira igira ara kukuni tania na Taovia,
me laumaurisigira.
8 Kamu tovoa ma kamu reisegenimui laka e dou manana na Taovia.
Ara mage igira ara totu raviravi i konina.
9 Kukuni tania na Taovia igamu sui lakalaka nina tinoni,
rongona igira sui ara kukuni tania aia ara tamanina na omea sui ara kilia.
10 Atsa moa na laeone, mara dona goto kara noga ma kara vitoa lê;
migira moa ara rongomangana na Taovia, e utu goto kara noga sa omea dou.
11 Kamu mai i koniqu igamu na tinoni vaolu, ma kamu rongomi vatavia niqu goko,
minau kau sasaniginigamu na pada mamavasiana na Taovia.
12 ?Egua, laka amu ngaoa ke dou na maurimui?
?Laka amu kilia na mauri katsi ma na magemage sailagi?
13 Ti vaga ia, ma nimui aqo kamu mololea na turupatu seko
ma na goko peropero.
14 Piloligi tania na nauseko ma kamu naua moa na omea e dou;
mi tana tobamui popono kamu ngongoragi matena moa na totu tana goto ma na rago.
15 Na Taovia e mataligira igira e goto niqira sasaga,
me rongomigira kalina ara ngangaidato vania;
16 me tukapusigira igira ara naua na omea e seko,
rongona kalina ti kara mate, ma kara padalegira tsaku.
17 Igira e goto dou niqira sasaga ara soâ na Taovia, maia e rongomigira,
me laumaurisigira tania pipi sui na rota e gadovigira.
18 Na Taovia e totu varangisigira igira e ponopala na tobaqira;
me maurisigira igira ara padâ laka e utu vanigira nogo kara lia sa omea.
19 Na tinoni dou e gadovia danga na rota,
ma na Taovia e maurisia tanigira sui;
20 na Taovia e reitutugudou saikesalia,
me tagara goto ke tau takutsi ke kesa na sulina.
21 Igira na vanga tsutsukibo sauba kara gini mate na tsutsukibo;
Migira ara reisavigira lê na tinoni e goto dou niqira sasaga sauba God ke kedegira.
22 Ma na Taovia aia sauba ke maurisigira nina tinoni;
me utu ke kedegira igira ara ba totu raviravi i konina.