15
Vitu na Angelo Kolutugira Vitu na Susuina na Rota Seko Loki
1 Mi muri, mau reia e kesa segeni goto na valatsatsa e laba i gotu tana parako. E loki me ganataga sosongo: ara tu laba vitu na angelo mara tu tangolitugira vitu na rota seko loki. Mi tugira nogo na susuina tsotsodo na rota seko loki, papadana laka e puka nogo na korena God.
2 Mi muri, mau reia kesa na omea e rerei vaga na tasi dama maroga sosongo, me lalo kolua na lake. Mau reigira goto igira ara tangomana na tuliusiana na susuligana na omea atsi loki ma na nununa, ma na maretsokona na soana. Igira nogo ara tutuu i ligisana na tasi dama maroga sosongo, mara tangolia na tuqulu aia God e tusuvanigira.
3 Mara lilinge gana linge a Moses aia nina maneaqo God, ma gana linge goto na Dalena Sipi:
“!Eo, kiki igoe Taovia God susuliga sosongo,
ara loki sosongo mara dou rago nomoa nimu aqo sui!
!Igoe o Taovia Tsapakae tana vera sui,
mara gotolaka mara mana sosongo nimu sautu sui!
4 ?Asei sauba ke tau kukuni tanigo Taovia?
?Masei sauba ke sove na gini turupatuna na lokimu?
Igoe segeni moa o tabu loki sosongo.
Migira na tinoni pipi sui tana vera sauba kara mai ma kara samasama vanigo,
rongona nimu aqo ara gotolaka saikesa, mara labamaka i mataqira na tinoni sui.”
5 Mi murina ia, mau reia e ova na vale tabu i baragata, ma na Valepolo na Taso e totu i laona.
6 Mi tugira vitu na angelo ara tu tangolitugira vitu na rota seko loki ara tu rutsumai tania na vale tabu. Ma tu poloqira e male maka sosongo, ma na itai qolu ara sori taligutiginia tu aseaseqira.
7 Mi muri, me kesa tu vidaqira vati na omea mamauri e tuu, me tusuvanitugira vitu na angelo tu vitu na bilo qolu, e danga tsitsiriri i laona na korena God, aia e mauri saviliu na dani ma na dani.
8 Ma na pungu e talumai tana mararana ma na susuligana God e dangali poponoa i laona na vale tabu, me gini tau tangomana vania ke kesa ke sage baa i laona na vale tabu ia, poi tsau kalina kara sui tugira vitu na rota seko loki ara tu adimaia tugira vitu na angelo.