UMUMAW UZE'EGAW A'E WÀ KURY
38
38:1–42:6
Tupàn uwazar Izo ize'eg izupe
38:1–40:2
1 A'e awa umumaw uze'egaw a'e kury. Na'e, ywytu àmànuhu herur har inuromo, Tupàn uwazar Izo ize'eg wà izupe kury.
2 Nerekwaw kwaw ma'e ne. Neze'eg awer wexak kar ikwaw 'ymaw ihewe.
Mo romo ereiko. Màràzàwe tuwe nerezeruzar kwaw hema'ekwaw katu haw rehe.
3 Exak kar nekàgaw ihewe nehe kury.
Ewazar newe hepuranu àwàm ihewe nehe no.
— Azapo ywy ihe, i'i Tupàn a'e
4 Kwehe mehe azapo ywy ihe. Ma'e pe ereiko a'e 'ar mehe.
Aze ereiko ma'e kwaw katu har romo, emume'u ko ma'e ihewe nehe.
5 Mo umume'u ywy uhua'u àwàm a'e. Aipo erekwaw.
Mo uzapo ywy uhua'u ma'e romo. Aipo erekwaw.
6 Ma'e i'aromo u'àm ywy izyta wà.
Mo omono itahu ipy ywy iwy pe har henaw pe.
7 Ma'e paw iapo awer 'ar mehe zahytata uzegar uzeinuinuromo wà.
Tupàn pe uma'ereko ma'e ywate har uhapukaz urywete haw rehe wà no.
8 'Y uhem ywy wi kwarer uhy hie wi uhem ma'e ài yryhu romo uzeapo pà a'e.
Mo uwàpytym hukenawhu zàwenugar imupytu'u kar pà i'ar mehe.
9 Ihe apyk yryhu ywàkun pupe ihe.
Azuwàzuwàn ipytunaw pupe no.
10 Amume'u iho àwàm izupe.
Awàpytym hukenawhu zàwenugar iwàpytygatu haw pupe.
11 Na'e aze'eg izupe. — Erehem putar te xe nehe.
Ehem zo xe wi nehe.
'Ykotok nerehe har upytu'u putar xe nehe, a'e izupe.
Ma'e wi ur zekaw haw pytunaw no
12 Izo. Aipo amo 'ar mehe nereko mehe eremur kar ku'emaw ne.
Aipo eremuhem kar kwarahy amo 'ar mehe.
13 Aipo amo 'ar mehe eremuhàmuhàz tatainy ywy rehe.
Aipo nezewe haw iapo mehe eremutuhug iaiw ma'e ne wà,
Wazeàmimaw wi wamuhem kar pà ne wà.
14 Tatainy 'aromo uhyape ma'e wexak kar ywytyruhu hexakaw. Wexak kar ywyàpyznaw hexak haw no.
Nuzawy kwaw topoz izekanapaw.
Nuzawy kwaw ter kwàku'aw har hemimuapyk kwer ywyzuwa rehe har no.
15 A'e tatainy uhyape katu wera'u iaiw ma'e wanupe.
Teko wexak wanemiapo wà, a'e rupi a'e iaiw ma'e wà, nupuner kwaw puruzuka haw rehe a'e tatainy rehe wà.
16 Izo. Aipo erexak 'ytyzuzàmaw yryhu imynehemar. Yryhu ohoete a'e.
Aipo ereata eho iwy pe.
17 Aipo amo wexak kar umàno ma'e kwer wapyta haw hukenawhu newe wà.
Heta ipytunaw upaw 'ym ma'e a'e pe.
18 Aipo erekwaw ywy iànàmaw.
Aze erekwaw ko ma'e paw rupi, ewazar heze'eg ihewe kury.
19 Ma'e wi tatainy tur a'e.
Ma'e wi ipytunaw tur no.
20 Aipo erekwaw waho àwàm hexak kar haw rehe wanupe.
Aipo a'e re erepuner wamuzewyr kar haw rehe wahem awer pe ne wà nehe.
21 Erepuner ikwaw paw rehe ne.
Ta'e netua'uhez ne xe.
Ywy iapo 'ym mehe we erezexak kar.
Amonokatu àmàn huwixàg ma'e, i'i Tupàn izupe
22 Amonokatu àmàn huwixàg ma'e amo me ihe. Amonokatu àmàntàtà a'e pe no.
Aipo amo 'ar mehe ereho wamonokatu awer pe.
23 Amonokatu a'e àmàn ihe. Ma'erahy ipuraraw paw 'ar mehe amugyr kar a'e àmàn.
Amugyr kar zeàmàtyry'ymaw 'ar mehe, zeàmàtyry'ymawhu 'ar mehe no.
24 Aipo amo 'ar mehe ereho kwarahy ihemaw pe.
Aipo ereho ywytu kwarahy ihemaw wi ur ma'e ihemaw pe.
— Mo umugyr kar àmàn, i'i Tupàn
25 Mo uwàpytymawok ikyr haw àmànuhu pe.
Mo wexak kar ywytu àmànuhu inuromo har iho àwàm izupe.
26 Mo umugyr kar àmàn ywyxiguhu rehe,
Teko heta haw 'ym rehe.
27 Mo omono 'y ywy uxinig ma'e rehe, teko heta haw 'ym rehe,
Ka'api'i imuezuz kar pà hehe.
28 Aipo heta tu àmàn pe. Aipo heta tu zuwiri pe.
29 Mo wiko 'y tàtà ihy romo. Mo wiko zuwiri tàtà ihy romo.
30 Mo uzapo 'y ita romo.
Mo upyk yryhu 'y tàtà pupe.
— Aipo erepuner zahytata ywak rehe wamonokatu haw rehe, i'i Tupàn
31 Aipo erepuner zahytata 7 àràpuhàràna'i her ma'e waàpixipixi haw rehe.
Aipo erepuner kyhàhàm tàtà na'iruz zahytata uzeake ma'e waàpixi haw ikwaraw paw rehe.
32 Aipo erepuner zahytata xigatu ma'e hexak kar haw rehe.
Aipo erepuner zahytata zàwàruhu uxu uhua'u ma'e her ma'e rehe har wamono kar haw wanape rupi. Aipo erepuner zahytata zàwàruhu uxu pixika'i ma'e her ma'e rehe har wamono kar haw wanape rupi.
33 Aipo erekwaw Tupàn ze'eg ywak rehe har waneruze'egar.
Aipo erekwaw a'e Tupàn ze'eg heruzar kar haw rehe ywy rehe har wanupe.
— Aipo upuner àmàn tetea'u imugyr kar haw rehe, i'i Tupàn
34 Aipo neze'eg upuner ywàkun pe uhemaw rehe.
Aipo upuner àmàn tetea'u imugyr kar haw rehe nezepyk kar pà typy haw pupe.
35 Aipo erepuner iweraw haw hexak kar haw rehe.
— Uruiko neremiruze'eg romo, aipo i'i a'e iweraw haw newe.
36 Mo omono ma'e kwaw paw wiràmiri wanupe.
Mo omono ma'e kwaw paw wiràmiri iwi her ma'e pe.
Umume'u Niru yrykawhu tyhu àwàm purupe a'e.
Zapukaz uze'eg àmàn ikyr 'ym mehe a'e.
37 Mo upuner ywàkun wapapar haw rehe.
Mo upuner izi'y izakookaw rehe àmàn romo.
38 A'e 'y uzapo ywyku'i to'om romo.
Omono'og to'om imuàkym pyrer hehe we.
Mo omono temi'u ma'ea'yr wanupe, i'i Tupàn izupe kury
39-40 Zàwàruhu iriàw kuzà uzeàmim weko haw pupe wà.
Uzeàmim ka'a pupe wemiar ràm hàro pà wà.
Aipo eremono temi'u wanupe.
Aipo eremono wanemi'u ràm zàwàruhua'yr wanupe.
41 Zàpuun wata ko rupi kwe rupi uma'uhez pà wà.
Wamemyr uze'eg wemi'u ràm henoz pà wà.
Mo opoz wama'uhez mehe wà.