20
Zeremi, xaxeto Pazur no
1 Pazur Imer ta'yr wiko xaxeto romo ma'ereko haw tàpuzuhu pe har rehe uzekaiw ma'e romo a'e. Herenu a'e ma'e paw imume'u mehe.
2 A'e rupi uze'eg zauxiapekwer wanupe kury. — Pepetek Zeremi nehe. A'e re peàpixipixi kyhàhàm tàtà pupe ukenawhu Mezàmi her ma'e rehe nehe. Aze teko iho wer tàpuzuhu pe wà, wixe a'e ukenawhu rupi wà.
3 Iku'egwer pe Pazur hemuhem kar kyhàhàm tàtà wi. Na'e aze'eg izupe kury. — Tupàn Tuweharupi Wiko Ma'e o'ok nerer newi. Nereiko kwaw Pazur her ma'e romo kury. — Kyzeahy haw uhàuhàz ma'e kwer, nerer romo kury, a'e izupe.
4 Tupàn Tuweharupi Wiko Ma'e uze'eg izupe no. — Pazur, Urumuigo kar putar nemukyzeahy kar har romo ihe nehe, nemyrypar wamukyzeahy kar har romo ihe nehe no. Waàmàtyry'ymar uzuka putar nemyrypar paw rupi wà nehe. Erexak putar wazuka mehe wà nehe. Mawiron wanuwihawete wiko putar Zuta ywy rehe har paw wazar romo a'e nehe. Weraha putar amo Mawiron pe wemipyhyk romo wà nehe. Uzuka kar putar amo wà nehe no.
5 Araha kar putar temetarer 'aw tawhu pe har paw peàmàtyry'ymar wanupe nehe. Upyhyk putar ma'e hekuzar katu ma'e paw rupi wà nehe. Upyhyk putar Zuta ywy rehe har wanuwihawete wanemetarer paw wà nehe, Mawiron pe heraha pà wà nehe.
6 Nepyhyk putar wà nehe. Upyhyk putar neànàm paw wà nehe no. Peneraha putar a'e pe wà nehe. Eremàno putar a'e pe nehe. Uzutym putar neretekwer nemyrypar wainuinuromo wà nehe. Eremume'u temu'emaw tetea'u wanupe. Nezutym putar wainuinuromo wà nehe, i'i Tupàn Pazur pe.
Zeremi umume'u uzemumikahy haw Tupàn pe
7 O Tupàn Tuweharupi Wiko Ma'e, neremu'em ihewe.
Azeruzar neremu'em awer rehe.
Nekàg wera'u ihewi.
Ereiko hezar romo.
Teko paw upuka herehe wà.
Umumaw u'ar paw herehe uze'eg urywahyahy pà wà.
8 Tuweharupi heze'eg mehe ahapukaz ze'eg imume'u pà ihe.
— Puruzuka haw, a'e wanupe. — Ma'e imumaw paw, a'e wanupe.
O Tupàn Tuweharupi Wiko Ma'e, aiko ikàg 'ym ma'e romo wanupe.
Uze'eg uryweteahy herehe tuweharupi wà.
Ta'e amume'u neze'eg wanupe ihe xe.
9 — Hereharaz putar Tupàn Tuweharupi Wiko Ma'e wi nehe,
a'e hezeupe.
— Namume'u pixik kwaw her ihe nehe, a'e hezeupe.
Nezewe haw rehe hema'enukwaw mehe neze'eg uzemunehew hepupe a'e.
Ukaz tata ài hepy'a pupe.
Hekene'o hepupe ipyhyk ire.
Napuner kwaw hehe kury.
10 Aenu teko tetea'u wanewowo mehe ihe wà.
— Heta tetea'u kyzeahy haw zaneywyr, i'i wà.
— Zazepyk Zeremi rehe nehe.
Ximume'u hemiapo kwer nehe, i'i wà.
Te hemyryparete wàro hezepyapi àwàm he'ar àwàm wà.
— Aze ru'u u'ar putar miar zuka haw zàwenugar pupe nehe.
A'e mehe zazepyk putar hehe nehe, i'i wà.
11 Ne Tupàn Tuweharupi Wiko Ma'e ereiko herehe we.
Nekàg.
Erepuner katu no.
Herehe ipuruzuka wer ma'e uzepyapi putar wà nehe.
Nuityk kwaw wàmàtyry'ymar wà nehe.
Imaranugar tuwe u'ar awer rehe wà nehe.
Waàiw paw nupaw pixik kwaw wanuwi nehe.
Teko naheharaz pixik kwaw izuwi wà nehe.
12 Nezewe mehe, o Tupàn Tuweharupi Wiko Ma'e Upuner Wera'u ma'e, nekatu haw rupi ureagaw pe ne.
Ta'e erekwaw urema'enukwaw paw ne xe.
Erekwaw urepy'a pe har no.
Tuwe aexak heàmàtyry'ymar wanehe nezepyk àwàm nehe.
Amono herekuwe haw nepo pe.
13 Pezegar Tupàn Tuweharupi Wiko Ma'e pe nehe.
Pemume'u ikatu haw nehe.
Ta'e upyro hemetarer 'ym ma'e ikatu 'ym ma'e wapo wi a'e wà xe.
14 Heta ze'egaiw hezexak kar awer 'ar rehe.
Peneharaz 'ar hehy hemuzexak kar awer wi nehe.
15 — Awa a'e, eremuzàg awa ne,
i'i amo awa heru imurywete kar pà hezexak kar mehe a'e.
Tuwe Tupàn omono uze'egaiw a'e awa rehe nehe.
16 Tupàn Tuweharupi Wiko Ma'e umuaiw amo tawhu wapuhareko 'ym pà a'e wà.
Tuwe a'e awa wiko a'e tawhu wazàwe nehe.
Tuwe wenu teko wahy haw rehe wakuhemaw ku'em mehe wà nehe.
Tuwe wenu zauxiapekwer waàmàtyry'ym mehe kwarahy wapytepe hin mehe wà nehe no.
17 Ta'e nahezuka kwaw hezexak kar 'ym mehe we a'e xe.
Nezewe mehe mo hehy hie uzeapo mo heretekwer itym awer romo.
Nazexak kar iwer mo.
18 Màràzàwe tuwe azexak kar.
Aipo xo zemumikahy haw hereko haw rehe zo azexak kar. Aipo xo tahy haw hereko haw rehe zo azexak kar.
Aipo xo hereko haw iaiw paw rehe zo azexak kar.