2
Arandua iporã va'e re ijayvua
1 Xera'y, xeayvu rejopy vy,
ha'e ndejee ajapo uka va'e remoĩ ri vy,
2 'arandua re rejapyxaka pota vy,
ha'e ndepy'a re mba'emo reikuaa aguã re rejerure ri vy,
3 xapy'a rei ne'arandurã re rejapukai vy,
ha'e rendu kuaa aguã re rejerure ete vy,
4 ne'arandurã reka reikovy vy prata oeka va'e rami,
mba'emo porã onhomi mbyre rekaa rami reka vy,
5 ha'e rami vy 'rã reikuaa Senhor renonde rejererokyjea rupi reiko aguã,
ha'e rejou 'rã Nhanderuete reikuaa aguã.
6 Mba'eta Senhor ae ome'ẽ 'arandurã,
ijuru gui ae ou nhane'arandurã ha'e jaikuaa aguã.
7 Heko porã va'e kuery peguarã omoĩ porã 'rã 'arandua anhetẽ ete va'e,
ha'e ramo anhetẽ rupi ikuai va'e pe oĩ 'rã mba'emo vai jokoarã.
8 Opena porã 'rã teko porã rupi ikuai va'e re,
opena 'rã Nhanderuete pegua kuery iky'a e'ỹ va'e oikoa rupi.
9 Ha'e rami vy reikuaa 'rã teko porã rupi reikoa, mba'emo re reikuaa potaa, ha'e joo-joo'i rami rejoguereko aguã.
Ha'e rami jaikoa ma tape porã meme.
10 Mba'eta ndepy'a re oĩ 'rã ne'arandurã,
reikuaave reikovya voi nenhe'ẽ py nembovy'ave 'rã heravy.
11 Ha'e ramo 'arandua opena 'rã ndere,
ne'arandua ae nemoingo porã 'rã.
12 Ha'e rami vy ndereraa jepe aguã tape vai rupi ikuai va'e gui,
ha'e avakue nda'eveia rupi ijayvu va'e gui,
13 teko porã gui ojepe'a vy
pytũ rupi anho ikuai va'e gui.
14 Ha'e kuery ma teko vai ojapo vy ovy'a rei 'rã,
heko vai va'e kuery oexa vy anho 'rã ovy'a okuapy,
15 tape karẽ rupi ikuai vy
oiko aguã va'ekue gui ojepe'apa va'e.
16 'Arandua ndereraa jepe 'rã kunha itavy rei va'e gui voi,
kunha mboae tavy reia rupi ijayvu va'e gui.
17 Ha'e nunga ma oeja 'rã kunhataĩ guive ome reve joguerekoa gui,
ha'e Nhanderuete pe oiko aguã re ijayvuague gui voi hexaraipa 'rã.
18 Mba'eta ha'e va'e ro katy reo vy manoa katy ae 'rã reo.
Ha'e oikoa ha'e javi ndereraa 'rã pytũ guy py manoa po'akaa katy.
19 Ha'e ramo ha'e va'e kunha pou vy oo va'e ma ndojevyvei 'rã,
ndojouvei 'rã tape tekove katy oo va'e.
20 'Arandua rupi vy reiko 'rã avakue heko porã va'e ikuaia rupi,
nderejavyi 'rã teko porã rupi ikuaia.
21 Mba'eta yvy pyau ma heko porã va'e peguarã itui,
ha'e va'e yvy re ikuai va'erã ma anhetẽ rupi oiko va'e kuery anho.
22 Ha'e rã opa marã heko va'e kuery ma oipe'apaa 'rã yvy gui,
jokorepa va'e kuery omoẽmbaa 'rã ha'e gui.