7
Kunha itavy rei va'e re ijayvu jevyague
1 Xera'y, nderexarai eme xeayvua re,
emoĩ ndepy'a re ajapo uka va'e.
2 Ejapo ke ajapo uka va'e, ha'e vy 'rã reikove.
Ndejee emoĩ atã xeguigua lei, nderexa ra'yĩ huũa'i re repenaa rami.
3 Emoĩ ke xee rombo'ea nekuã regua rami,
ndepy'apy re emoĩ, yvyrape re remboparaa rami.
4 'Arandua pe ma aipo'ere: “Xereindy ae'i”,
ha'e mba'emo reikuaa aguã pe ma “Xeretarã ae'i” 'ere.
5 Mba'eta ha'e nunga ndejoko 'rã kunha mboae gui,
kunha itavy reia rupi ijayvu va'e gui.
6 Ha'e gui xero re janela yvate oĩ gui,
janela jokoa pa'ũ rupi ama'ẽ ainy vy
7 aexa reta karamboae hi'arandu e'ỹ va'e.
Ha'e va'e kunumigue aexa va'e mbyte py
peteĩ aexa avi hi'arandu e'ỹ ete va'e.
8 Ha'e va'e ma peteĩ tape'i rupi oo oiny,
kunha tavy rei va'e ro rexei'i rupi.
Ha'e vy hoo via rupi ae oo
9 ka'aru'i, kuaray oike ramo'i jave,
pytũ ho'a jave.
10 Ha'e gui ma ha'e va'e kunha oẽ ovaexĩ aguã.
itavy rei va'e ao py onhemonde ouvy,
ombotavy aguã re onhembopy'aa rupi.
11 Itavy aguã re anho 'rã ipy'a va'e,
ndopytai 'rã guive ngoo py, ndopyta kuaai rei 'rã.
12 Amongue py tape pia rupi 'rã hekony,
amongue py ma tetã mbyte rupi 'rã oo,
opa rupi oma'ẽ 'rã oikovy nhoarõa rupi.
13 Ha'e gui ma kunumi va'e re onhemboja vy oayvu.
Ha'e vy oma'ẽ tavy rei reve aipoe'i ixupe:
14 “Tembi'u areko ja'u aguã, ange amboaxa va'ekue regua.
Ange ajapopa ma kuri anhemboayvuague.
15 Ha'e rami vy aju ainy roeka vy.
Ha'e vy aỹ ma rovaexĩ ma.
16 Ha'e gui xerupa ma anhovãmba ma voi
ajukue iporãve va'e Egito guigua py.
17 Xerupa amoeakuãmba ma avi mirra py,
aloés ha'e cinamomo py guive.
18 Jaa ke, jajoayvua py nhaĩ pytũ mbukukue re.
Javy'a vaipa 'rã jajoayvua rupi anho.
19 Ha'e gui xeme ma noĩ xero py.
Mombyry ete rupi oguata oikovy.
20 Peráta heta ogueraa ovoko py.
Raka'eve rã jaxy inhypytũ jave mae ma ou ju 'rã”, he'i.
21 Ha'e rami vy kunha va'e ijayvu porã kuaa vy ombotavy ete,
oayvu kuaa rupi ojopy heravy aguã.
22 Ha'e ramo kunumi va'e ma are'ỹ'i re oo oiny hexeve,
vaka ojukaa aguã katy oo va'e rami,
ha'e rami e'ỹ vy guaxu nhuã oĩa katy onha ovy va'e rami,
23 ipy'a rupi hu'y onhyvõ peve,
ha'e rami e'ỹ vy guyra'i mondepi katy oveve ovy va'e rami,
ha'e py omano aguã oikuaa e'ỹ vy.
24 Aỹ ma xera'y, ejapyxaka porã ke,
eikuaa pota porã xeayvua re.
25 Neĩ ndepy'a eme ha'e va'e nunga kunha reve rejereraa uka aguã,
enhemokanhy uka eme oikoa rupi reoa py.
26 Mba'eta ha'e nunga heta ma oity avakue, ombojexavai guive.
Mbovy e'ỹ ma omano ikáuxa.
27 Ha'e va'e ro via ma yvyra rupa katy nhandereraa va'e,
nhandereroguejy 'rã heravy manoa katy.