10
Heko vai va'e kuery ho'apa aguã re ijayvua ague
1 Senhor, mba'e re tu mombyry reĩ?
Mba'e re tu rojexavai rã nderejekuaa ukai?
2 Mba'eta heko vai va'e kuery ma ayvu vaikue-ikue py omoingo axy 'rã iporiaukue'i.
Ha'e kuery tojejurapa jojopy aguã omoĩ va'ekue py ae.
3 Mba'eta heko vai va'e ovy'a 'rã oipotapa reia re rive,
mba'emo ojoupaxe va'e ijayvu vaikue-ikue 'rã Senhor re,
ijayvu vai 'rã hexe.
4 Heko vai va'e ojee rive ojerovia vy ndoikuaa potai 'rã mba'eve re.
Ha'e rami vy “Nhanderuete ndoikoi”, he'i 'rã.
5 Ha'e kuery oikoa nhavõ rupi ojoupa rei 'rã mba'emo.
Ndoikuaai 'rã guive ne'arandua rupi ndeayvua.
Ojojai rei 'rã okuapy ngovaigua kuery.
6 Mba'eta opy'a py aipoe'i: “Avave rei ndaxereityai 'rã.
Aỹ ha'e raka'e rã voi ndoui 'rã mba'emo vai xe'áry”, he'i.
7 Ijuru tynyẽ oiny ayvu vai, nhombotavyarã ha'e ayvu poyi,
ha'e rami vy nhomboeko vai ha'e joapo vai aguã re anho 'rã ijayvu.
8 Nhoarõ 'rã tetã yvýry jojuka aguã.
Ojuka 'rã heko porã'i va'e nhemia py.
Oma'ẽ mbegue 'rã openamby e'ỹ oity aguã.
9 Nhoarõ 'rã oiny guary okua yvy'ã peguy re oĩ va'e py nhoarõ oinya rami.
Oarõ 'rã oity aguã iporiaukue'i,
nhuã py ombo'a vy oimamamba aguã.
10 Onhemombe ovy 'rã,
ipo'akaa py iporiaukue'i ho'apa aguã.
11 Aipoe'i 'rã opy'a py: “Nhanderuete ma nopenai.
Ngova ombojere vy peteĩve henda py ndoexa potai 'rã ajapo va'e.”
12 Senhor, epu'ã ke!
Xeruete, eupi ndepo!
Nderexarai eme iporiaukue'i gui.
13 Mba'e nunga rupi tu heko vai va'e omboyke Nhanderuete?
Mba'eta opy'a py “Nhanderuete nopenai 'rãe” he'i.
14 Ha'e rami teĩ ndee ma rexa ae,
reikuaa pota guive rojexavaia rupi romba'eapoa re,
ndepo py orerepy aguã.
Ndepo py onhemboaxa openamby e'ỹ ikuai va'e.
Ha'e ramo repy 'rã tyre'ỹ.
15 Emopẽ ke heko vai ha'e joupe ojapo vai va'e jyva.
Eikuaa pota ha'e kuery reko vaia re
rejoupa peve.
16 Senhor ma Huvixave imarã e'ỹ va'e.
Ijyvy gui okanhymba 'rã amboae regua kuery.
17 Senhor, rendu ae ma onhemo'yvyĩ'i va'e kuery oipotaa.
Ha'e rami vy rembopy'a guaxu ha'e reraa jepe 'rã,
18 repy aguã tyre'ỹ ha'e omoingo axy reipy,
avakue yvy regua nanhomongyjevei aguã.