105
1 Crônicas 16.8-22
1 Perovy'a Senhor, hery rupi pejapukai.
Yvy regua kuery pe peikuaa uka hembiapokue.
2 Peporaei ke ixupe, peporaei salmos rupi.
Pemombe'u ke nhomondyipaarã ojapo va'ekue.
3 Perovy'a hery iky'a e'ỹ va'e rupi.
Senhor rekaa rupi ikuai va'e tovy'a opy'a py.
4 Peka ke Senhor, ipo'akaa guive.
Peka riae ke henonde peĩ aguã.
5 Penema'endu'a ke mba'emo porã ojapo va'ekue re,
nhomondyipaa ha'e oipota va'e re ijayvuague re,
6 peẽ hembiguai Abraão ramymino kuery,
peẽ Jacó ra'y kuery hembiporavo pendekuai va'e.
7 Ha'e ma Senhor Nhanderuete.
Oipotaa ma yvy jave re ojekuaa.
8 Ima'endu'a riae 'rã guexeve guarã ojapo va'ekue re,
mbovy rei e'ỹ ikuai va'erã pe ojapo ukaa rupi ijayvuague re,
9 Abraão reve ngupive guarã ojapo va'ekue re,
Isaque pe ouraa rupi ijayvuague re guive.
10 Ha'e nungakue re ma Jacó reve ju ijayvu,
raka'e rã peve guarã re ijayvu Israel reve.
11 Ha'e vy aipoe'i:
“Ndevy pe ame'ẽ 'rã Canaã pendeyvyrã”, he'i.
12 Ha'e jave py ha'e kuery mbovy'i teri ikuai,
yvy mboae guigua ikuai raka'e mbovy'i ete,
13 oguata va'ekue yvy mboae-ae ikuai va'e rupi,
joyvy-yvy re.
14 Ha'e rami teĩ avave rei pe Senhor ndoguereko axy ukai.
Ha'e kuery re oma'ẽ vy ijayvu ete huvixave ikuai va'e pe.
15 Ha'e vy aipoe'i: “Xerembiporavo kuery re pemoĩ eme pendepo,
pereko axy eme xevygua profeta kuery”, he'i.
16 Ha'e gui ma yvy re ombou karuai,
ha'e vy ndojou ukavei tembi'u.
17 Ha'e kuery renonde omondouka peteĩ ava
José hery va'e, tembiguairã ovende pyre.
18 Ipy corrente py ojokua,
ferro guigua omoĩ reve,
19 hekorã re ijayvuague ojeupity peve,
Senhor ijayvuague hexe oiko aguã.
20 Ha'e ramo huvixave opoi uka,
yvy regua ipo'akapave va'e oipe'a uka.
21 Ha'e vy ngoo re ae opena uka,
mba'emo oguereko va'e ha'e javi re opena aguã.
22 Omoĩ ha'e pygua ruvixa kuery re avi ipo'aka va'erã,
'arandu re ombo'e aguã nhomongeta va'e kuery.
23 Ha'e gui ma Egito yvy re Israel ju ovaẽ,
Jacó onhemboekoa Cam ramymino kuery yvy re.
24 Nhanderuete ojapo ojeupegua kuery ta'y reta aguã rami,
ojapo imoingo axya kuery gui imbaraeteve aguã rami.
25 Ha'e kuery py'a oguerovapa guive ixupegua kuery re nda'ija'evei aguã,
hembiguai kuery ombotavypaa rupi oguereko aguã rami.
26 Ha'e gui ha'e kuery ikuaia py ombou guembiguai Moisés,
hembiporavo Arão guive.
27 Ha'e va'e kuery po rupi ojapo uka hexa pyrã ikuaia mbyte,
nhomondyipaarã ojapo Cam yvy re.
28 Ha'e rami vy pytũ ombou ramo opa rupi pytũ
teĩ Moisés ha'e Arão ndojapo e'ỹi ijayvuague.
29 Ha'e kuery ikuaia rupi yy itui va'e ojapo tuguy,
pira ikuai va'ekue ojukapa vy.
30 Ha'e kuery yvy re ju'i heta ombou,
huvixa ro py peve.
31 Ha'e ijayvu rã ou mberu arai rami,
ky voi ou yvy jave rupi.
32 Oky 'rãgue py ombou amandau,
ha'e overa va'e gui tata ou yvy re.
33 Omomba uva ha'e figo ty,
yvyra ikuai va'e rakã omopẽmba vy.
34 Ha'e ijayvu rã ou tuku-karu,
opo va'e heta ete ikuai oipapaa aguã rami e'ỹ.
35 Ha'e va'e kuery ma yvy jave rupi ho'upa jai rogue,
omono'õ va'erã ikuai va'ekue guive.
36 Ojukapa avi jypygua yvy re ikuai va'ekue,
jypygua imbaraete teri vy oguereko va'ekue.
37 Ha'e gui ojeupegua kuery oguenoẽ
ouro ha'e prata reve.
Ha'e kuery regua peteĩve jipoi hexaĩ e'ỹ va'e.
38 Ha'e kuery oje'oi ramo Egito pygua kuery ovy'apa okuapy,
ha'e kuery gui okyje teria ja.
39 Senhor ombou peteĩ arai ojeupegua kuery áry rupi ijao'iarã,
ha'e pyávy tataendy ju ombou omoexakã aguã.
40 Ha'e kuery ojerure ramo ombou reta guyra,
yva gui mbojape ombou va'ekue re guive hevyatãmba.
41 Peteĩ itaova ombovo uka ramo oẽ yy,
tekoa e'ỹa rupi oxyry ovy yakã rami.
42 Ijayvuague iky'a e'ỹ va'e re ima'endu'a vy ojapo,
guembiguai Abraão re guive.
43 Ha'e rami py ojeupegua kuery oguenoẽ ha'e gui,
hembiporavo kuery oporaei oje'oivy ovy'aa rupi.
44 Ha'e kuery pe ome'ẽ amboae regua yvy va'ekue,
ha'e ramo oipe'apa amboae regua mba'ety,
45 ha'e kuery onhe'ẽ rendu aguã ijayvuague,
ha'e lei oeja va'ekue rupi ikuai aguã.
Aleluia!