119
Nhanderuete guigua lei iporãa re ijayvua
1 Ovy'a ete 'rã iky'a e'ỹa rupi oiko va'e,
Senhor guigua lei rupi ae.
2 Ovy'a ete 'rã oikuaa uka va'ekue rupi oiko va'e,
opy'a ha'e javi py onhe'ẽ rendu va'e.
3 Ha'e va'e kuery ma mba'emo vai rupi e'ỹ ikuai,
Nhanderuete guigua tape rupi anho.
4 Rejapo uka va'e reikuaa uka
rojapopa ete aguã.
5 Aguataa toĩ atã
ndeayvu reja va'ekue rupi aiko aguã.
6 Ha'e rami vy axĩmba aguã rami e'ỹ 'rã aiko
rejapo uka va'e ha'e javi re aikuaa pota vy.
7 Peteĩ rami xepy'a reve roguerovy'a 'rã,
ha'evea rami ndeayvuague aikuaa rire.
8 Xee ma ajapo 'rã ndeayvu reja va'ekue.
Xereja eme ke.
9 Mba'exa vy nda'u kunumigue onhemongy'a e'ỹ re oiko 'rã?
Ndeayvu rupi oiko ri vy tema.
10 Xee ma xepy'a ha'e javi py roeka va'e.
Ejapo eme rejapo uka va'ekue gui ajepe'a aguã rami.
11 Xepy'a re amoĩ 'rã ndeayvuague
nderovai ajejavy e'ỹ aguã.
12 Senhor, xee ma rogueroporaei 'rã.
Xembo'e ke ndeayvua reja va'ekue rupi aiko aguã re.
13 Xeayvu tema xema'endu'a vy
reikuaa potaa rupi ndeayvuague ha'e javi re.
14 Opa mba'e porã gui
arovy'ave ndee reikuaa uka va'ekue.
15 Anhembo'e aikovy ndee orembo'ea re,
aikuaa pota 'rã reikoa re.
16 Ndeayvua reja va'ekue re xee avy'a.
Ndaxerexarai 'rã ndeayvuague re.
17 Ejapo porã xee nerembiguai pe,
aikove ha'e ndeayvuague rupi aiko aguã.
18 Eipe'a ke xerexa jokoa,
aexa kuaa aguã ndeguigua lei re iporã ete va'e oĩ va'e.
19 Ko yvy re aikoa ja hekoa e'ỹ va'e rami aiko.
Eikuaa uka e'ỹ eme ke rejapo uka va'ekue.
20 Xepy'a py aendu nda'evei etea,
ne'arandua rupi ndeayvuague aenduxe riae vy.
21 Ndee ma ojejou porã rei va'e ha'e ayvu vaipy kuery pe ndeayvu ete va'e.
Ha'e kuery ojepe'a okuapy rejapo uka va'ekue gui.
22 Eipe'a ke xere ijayvu reia ha'e ovy'a reia,
mba'eta xee ma reikuaa uka va'ekue rupi aiko ramo.
23 Xere huvixa kuery ijayvu aguã nhomboatypa teĩ
xee nerembiguai aikuaa pota aikovy ndeayvu reja va'ekue re.
24 Reikuaa uka va'ekue ma xembovy'a va'e.
Ha'e va'e ma xemongetaa guive.
25 Yvy rupi xereitya ma.
Xemoingo porã ju ke ndeayvuague rami vy.
26 Xerekokue amombe'upa ramo ndee xembovai.
Xembo'e ke ndeayvua reja va'ekue rupi aiko aguã.
27 Eikuaa uka ke renhombo'eague rami aiko aguã,
ha'e xee aikuaa pota 'rã iporã ete va'e reikuaa uka va'e re.
28 Xepy'a py xeporiau ndavy'avei vy.
Xemombaraete ju ke ndeayvuague rami vy.
29 Xepe'a ke ijapu va'e kuery rape gui.
Xemboaxy ke ndeguigua lei re oĩa rami vy.
30 Aiporavo tape vy'aa katygua,
amoĩ ne'arandua rupi aiko aguã.
31 Reikuaa uka va'ekue rupi pota aiko.
Senhor, xeapo eme axĩmba aguã rami.
32 Anha 'rã avy tape rejapo uka va'ekue oĩa rupi,
xepy'a py xembovy'a rire.
33 Senhor, xembo'e ke ndeayvua reja va'ekue rupi aiko aguã.
Ha'e va'e rupi aiko 'rã opa peve.
34 Xemo'arandu ke, ha'e ramo aiko 'rã ndeguigua lei rupi.
Xepy'a ha'e javi py 'rã ajapo.
35 Xerereko ke tape rejapo uka va'ekue oĩa rupi,
mba'eta ha'e va'e anho arovy'a.
36 Xepy'a re emoĩ reikuaa uka va'ekue rupi aiko aguã,
mba'emo ajoupave aguã rupi e'ỹ.
37 Xemoma'ẽ eme ovare e'ỹ va'e re.
Xembopy'a guaxu ke ndeguigua tape rupi.
38 Nerembiguai pe emoĩ atãve ndeayvuague,
nerenonde ojererokyjea rupi ikuai va'e pe reme'ẽ rire.
39 Eipe'a ke xere ijayvu reia xemongyje va'e,
mba'eta ne'arandua anho ha'eve.
40 Ma'ẽ, ndee xembo'ea rami anho aikoxe va'e.
Xembopy'a guaxu ke ndereko porãa rupi.
41 Senhor, exa uka xemboaxya.
Xereraa jepe guive ndeayvuague rami vy.
42 Ha'e ramo 'rãe ambovai kuaa xembojaru rei okuapy va'e,
ndeayvua re ajerovia vy.
43 Xejuru gui eipe'a eme ayvu anhetẽ rupigua,
mba'eta xee ma arõ aikovy ne'arandua.
44 Ha'e rami vy ndeguigua lei rupi aiko riae 'rã,
raka'e rã peve.
45 Aiko 'rã aa jepea rupi,
ndee xembo'ea rupi pota aiko vy.
46 Huvixave kuery renonde voi axĩ e'ỹ re
amombe'u 'rã reikuaa uka va'ekue.
47 Xee arovy'a 'rã rejapo uka va'ekue,
xee ayvu vy.
48 Rejapo uka va'ekue ayvu vy aupi 'rã xepo,
ndeayvua reja va'ekue re aikuaa pota 'rã guive.
49 Nema'endu'a ke xee nerembiguai pe ndeayvuague re,
mba'eta xeapo arõ aguã rami.
50 Ajexavaia py xembovy'a va'e ma pova'e:
ndeayvu xembopy'a guaxua.
51 Ojejou porã rei va'e kuery xejojai riae,
teĩ xee ndajepe'ai ndeguigua lei gui.
52 Xema'endu'a ymave ne'arandua rupi ndeayvuague re.
Ha'e va'e ma xembopy'a guaxu, Senhor.
53 Xee aendu xevaia,
heko vai va'e ndeguigua lei rupi ve'ỹ ikuai ramo.
54 Mamo rã aguataa rupi oo py akea py
aroporaei aikovy ndeayvua reja va'ekue.
55 Senhor, pyávy xema'endu'a 'rã nderery re.
Ha'e rami vy ndeguigua lei rupi 'rã aiko.
56 Pova'e ma xevy guarã oĩ va'e,
ndee xembo'ea rupi aiko aguã.
57 Senhor ae xevygua oiko.
Ha'e ramo aipoa'e: “Ajapo 'rã ndeayvuague”, ha'e.
58 Xepy'a ha'e javi py ajerure xemboaxy aguã.
Xemboaxy ke ndeayvuague rami vy.
59 Xee ae aikoa re aikuaa pota vy
ajevy ju ndee reikuaa uka va'ekue rupi aiko aguã.
60 Anhea'ã 'rã, namboarei guive
rejapo uka va'ekue ajapo aguã.
61 Heko vai va'e kuery nhuã xejura
teĩ ndaxerexarai 'rã ndeguigua lei gui.
62 Pytũ mbyte jave teĩ apu'ã 'rã roporaei aguã,
ne'arandua rupi ndeayvuague anhetẽ va'e meme ramo.
63 Anhemoirũ 'rã nerenonde ojererokyjea rupi
ha'e rembo'eague rami ikuai va'e reve.
64 Senhor, yvy jave re rexa uka ndeporayvua.
Xembo'e ke ndeayvua reja va'ekue re.
65 Senhor, xee nerembiguai pe rejapo porã,
ndeayvuague rami vy.
66 Xembo'e ke 'arandu ha'e aikuaa aguã re,
rejapo uka va'ekue rupi ajerovia ramo.
67 Ajexavai e'ỹ mbove ha'eve e'ỹa rami aiko va'ekue,
teĩ aỹ ma ajapo aikovy ndeayvua.
68 Ndee ma heko porã ha'e ojapo porã va'e.
Xembo'e ke ndeayvua reja va'ekue re.
69 Ojejou porã rei va'e kuery ma xere ijayvu rive
teĩ xepy'a ha'e javi py ajapo renhombo'eague.
70 Ha'e kuery ma ipy'a ratã va'e.
Ha'e rã xee ma arovy'a ndeguigua lei.
71 Ajexavaiague ma ojapo porã xevy,
ndeayvu reja va'ekue aikuaa nho aguã.
72 Mbovy e'ỹ ouro ha'e prata guigua oĩ va'e rire
xevy pe ovareve 'rãgue ndejuru gui lei oẽ va'e.
73 Ndepo py ae xeapo ha'e xemoingo raka'e.
Xembo'e ke aikuaa aguã rejapo uka va'ekue.
74 Nerenonde ojererokyjea rupi ikuai va'e xerexa vy ovy'a okuapy,
ndeayvuague re ajerovia ramo.
75 Senhor, xee aikuaa porã ha'evea rami ndeayvua,
ojeroviapy reikoa rupi ae xemoingo axy va'ekue.
76 Tou ha'vy ndeporayvua xembopy'a guaxu aguã,
xee nerembiguai pe ndeayvuague rami vy.
77 Xere embou xemboaxya aikove aguã,
mba'eta ndeguigua lei re xee avy'a.
78 Ojejou porã rei va'e kuery toxĩmba, mba'e py e'ỹ xembojexavai rire.
Ha'e rã xee ma aikuaa pota 'rã ndee xembo'ea re.
79 Nerenonde ojererokyjea rupi ikuai va'e toupa xeirũrã,
reikuaa uka va'ekue oikuaa va'e guive.
80 Xepy'a py tajapopa ndeayvu reja va'ekue,
axĩmba e'ỹ aguã.
81 Ndee xereraa jepe aguã arõ vy xenhe'ẽ ikangy.
Ha'e rami teĩ arõ tema ndeayvuague.
82 Xerexa ikane'õmba ma ndeayvuague arõ rã.
“Raka'e 'rã tu xembopy'a guaxu?” ha'e.
83 Tata áry hyru ipirekue guigua omoĩ mbyre ipirupaa ramigua aiko,
teĩ ndaxerexarai ndeayvu reja va'ekue gui.
84 Mbovy ára teri 'rã nda'u xee nerembiguai aikove?
Raka'e nda'u xerepy 'rã xerakykue monhaa kuery gui?
85 Ojejou porã rei va'e kuery ndeguigua lei rupi e'ỹ ikuai va'e ma
yvykua ojo'o okuapy xembo'a aguã.
86 Rejapo uka va'ekue ma anhetẽ va'e meme.
Xerepy ke mba'e py e'ỹ xerakykue monhaa kuery gui.
87 Ha'e kuery xemomba rai'i ma ko yvy re.
Ha'e rami teĩ xee ndajepe'ai 'rã renhombo'ea gui.
88 Xembopy'a guaxu ke xemboaxya rupi vy,
ha'e rã ajapo 'rã ayvu ndejuru gui oẽ va'e.
89 Senhor, yva re ndeayvuague oĩ atã 'rã
raka'e rã peve guarã.
90 Ojeroviapy riae 'rã reiko raka'e rã peve guarã.
Yvy renhono rire ha'ekue py ae oĩ.
91 Ndeayvuague rami vy opa mba'e oĩmba porã aỹ peve,
mba'eta ndevygua meme ikuai.
92 Ndeguigua lei re'ỹ avy'a va'e rire
yma ma amano 'rãgue aiko axy vaipa vy.
93 Xee ma ndaxerexarai 'rã renhombo'eague re,
ha'e va'e rupi xemoingove rire.
94 Xereraa jepe ke ndevygua aiko ramo,
mba'eta aeka renhombo'eague.
95 Heko vai va'e kuery xerarõ okuapy xemokanhy aguã,
ha'e rã xee ma aikuaa pota 'rã reikuaa uka va'ekue re.
96 Xee aexa rã iporãgue ikuai va'e ha'e javi opa va'erã.
Ha'e rã rejapo uka va'ekue ma opa va'erã e'ỹ.
97 Xee ma ayvu ete ndeguigua lei!
Ára pukukue re hexe anho aikuaa pota.
98 Rejapo uka va'ekue ojapo xerovaigua kuery gui xe'aranduve aguã rami,
xepy'a re amoĩ riae ramo.
99 Xembo'ea kuery ha'e javi gui xee aendu kuaave,
reikuaa uka va'ekue re aikuaa potaa rupi vy.
100 Tujakue gui voi xe'aranduve,
renhombo'eague rami aiko vy.
101 Tape vai ha'e javi gui xee ajepe'a,
ndeayvuague re aikuaa pota aguã.
102 Ha'e rã ndeayvuague gui ma xee ndajepe'ai 'rã,
ndee xerekombo'e ramo.
103 Ndeayvu aa'anga rã he'ẽ va'e ramigua,
ei gui he'ẽve xejuru pe.
104 Renhombo'eague rupi vy xe'arandu 'rã.
Ha'e rã tape anhetẽ e'ỹ va'e ma ajeguarua meme.
105 Ndeayvu ma tataendy oĩ aguata aguã,
aikoa rupi omoexakã va'e.
106 Aura karamboae, ha'e auraague amoĩ atã guive,
ha'evea rami ndeayvuague rupi aiko aguã.
107 Xee ma aiko axy vaipa ma.
Senhor, xemoingove ke ndeayvuague rami vy.
108 Senhor, ejopy ke ame'ẽxea'i py xeayvu ame'ẽ va'e,
ha'e xembo'e ndeayvuague re.
109 Xejukaxea kuerya rupi riae aiko,
teĩ ndeguigua lei gui ndaxerexarai 'rã.
110 Heko vai va'e kuery ma nhuã omoĩ xerovai,
teĩ xee ndajepe'ai 'rã renhombo'ea gui.
111 Reikuaa uka va'ekue ma raka'e rã peve guarã amoĩ xejee,
mba'eta xepy'a py arovy'a.
112 Xepy'a re amoĩ ndeayvu reja va'ekue rupi aiko aguã,
raka'e rã ha'e opa peve.
113 Mokoĩ rupi rei ijayvu va'e ma xee ajou vai.
Ha'e rã ndeguigua lei ma arovy'a.
114 Ndee ma anhemiaty ha'e mba'emo vai jokoa reiko.
Ndeayvua re ae ajerovia.
115 Mba'emo vai rupi pendekuai va'e, pejepe'a ke xea gui.
Xee ma ajapoxe Xeruete ojapo uka va'e.
116 Xepytyvõ ke ndeayvuague rami vy, aikove aguã.
Emoingo e'ỹ eme arõ va'e, axĩmba e'ỹ aguã.
117 Xemombaraete ramo 'rãe aa jepe,
ha'e ndeayvu reja va'ekue rupi aiko.
118 Rejou vai ndeayvuague gui ojepe'a va'e,
mba'eta apu py ae ha'e kuery nhombotavypa 'rã.
119 Yty rami rive remombo 'rã heko vai va'e yvy jave re ikuai va'e.
Ha'e nunga rupi xee arovy'a reikuaa uka va'ekue.
120 Nerenonde ajererokyje vy xero'o pirĩmba,
ndeayvua re ae ajererokyje.
121 Xee ma anhetẽ ha'e teko porã rupi ajoguereko va'e.
Xemboaxa eme ke xerovaigua kuery po py.
122 Xee nerembiguai xerepy ke aiko porãve ju aguã.
Xembojexavai uka eme ojejou porã rei va'e kuery pe.
123 Xerexa ikane'õmba ma xereraa jepearã arõ riae vy,
ndereko porãa rupi ndeayvuague ojeupity aguã guive.
124 Ereko nerembiguai remboaxya rupi.
Xembo'e ke ndeayvu reja va'ekue re.
125 Xee ma nerembiguai aiko.
Xemo'arandu ke reikuaa uka va'ekue aikuaa aguã.
126 Senhor, ovaẽ ma reikuaa pota aguã ára,
mba'eta ndeguigua lei rupi nda'ikuaiai ramo.
127 Xee ma ouro gui arovy'ave rejapo uka va'ekue,
ouro oiky'a'o pyre gui voi.
128 Ha'e nunga rupi renhombo'eague pe “Anhetẽ va'e meme” ha'e.
Ha'e rã ijapu va'e kuery reko ma ajou vai.
129 Reikuaa uka va'ekue ma iporã ete.
Ha'e va'e rupi aiko xepy'a ha'e javi py.
130 Ndeayvu reikuaa uka ramo omoexakã vy
omo'arandu 'rã hi'arandu e'ỹ'i va'ekue.
131 Xejuru aipe'a vy xepytuẽ atã,
rejapo uka va'ekue aikuaa porãvexe vy.
132 Eju ju xea py, ha'e xemboaxy,
nderery oayvu va'e kuery pe rejapoaty rami vy.
133 Emoĩ atã ke ndeayvuague rupi aikoa.
Ha'e rã teko vai va'e guive rã ta'ipo'aka eme xere.
134 Xerepy ke avakue xemoingo axy reia gui,
ha'e ramo aiko 'rã renhombo'eague rami.
135 Xee nerembiguai áry taexakã nderova,
ha'e xembo'e ndeayvu re.
136 Xerexay ma yakã rami oxyry,
ndeguigua lei rupi e'ỹ avakue ikuai rã aexa vy.
137 Senhor, ndee ma ndereko porã va'e,
ndeayvua guive anhetẽ va'e meme.
138 Reikuaa uka va'ekue ma anhetẽ rupi reja,
ojeroviapy guive.
139 Ndeayvu gui xerovaigua kuery hexaraipa rã aexa vy
nda'evei etea aendu va'e xemomba rai'i.
140 Ndeayvua ma iky'a e'ỹ ete va'e.
Ha'e nunga rupi xee nerembiguai arovy'a.
141 Xee ma yvyĩ'i va'e, oayvupy e'ỹ aiko va'eri
ndaxerexarai renhombo'eague re.
142 Ndeguigua teko porã ma opa va'erã e'ỹ,
ndeguigua lei ma anhetẽ va'e meme.
143 Xe'áry jexavai ha'e ndavy'ai etea ou teĩ
rejapo uka va'ekue ma xembovy'a kuerei.
144 Reikuaa uka va'ekue ma ha'evea ramigua meme raka'e rã peve guarã.
Xemo'arandu ke ha'e va'e rupi, ha'e ramo aikove 'rã.
145 Xepy'a ha'e javi py xee ajapukai ndevy.
Senhor, xembovai ke, ha'e ramo ajapo 'rã ndeayvu reja va'ekue.
146 Ndevy ajapukai. Xereraa jepe ke,
ha'e ramo aiko 'rã reikuaa uka va'ekue rupi.
147 Ko'ẽ e'ỹ mbove'i ajapukai,
ndeayvua arõ ajerovia reve.
148 Pytũ mbukukue re xerexa ndokei,
ndeayvuague re aikuaa pota aguã.
149 Senhor, ndeporayvua rupi endu ke xeayvua.
Ndeayvuague rami vy xemoingove.
150 Teko vai rupi ikuai va'e ovaẽ rai'i ma xea py.
Ha'e kuery ma ndeguigua lei gui ojepe'a va'e.
151 Senhor, mombyry e'ỹ ndee reiko,
rejapo uka va'ekue ma anhetẽ va'e meme.
152 Yma ma aikuaa ndeayvuague
raka'e rã peve guarã reja va'ekue.
153 Eikuaa pota ke aiko axya re, xereraa jepe guive,
mba'eta xee ma ndeguigua lei gui ndaxerexarai 'rã.
154 Xerepy ke, ha'e xereraa jepe.
Ndeayvuague rami vy xemoingove.
155 Heko vai va'e kuery ma oo jepe aguã gui mombyry ikuai,
ndeayvu reja va'ekue ndoikuaaxei vy.
156 Senhor, opa mba'e py ndee oremboaxy 'rã!
Ndeayvuague rami vy xemoingove.
157 Heta ete ikuai xerovaigua kuery xerakykue monha va'e,
teĩ xee ndajepe'ai 'rã reikuaa uka va'ekue gui.
158 Ojerovia e'ỹ va'e kuery aexa vy aendu ndajou porãia,
ndeayvuague rami e'ỹ ikuai rã.
159 Eikuaa pota ke renhombo'eague arovy'aa re.
Senhor, ndeporayvua rupi xemoingove.
160 Ndeayvua ma jypy guive anhetẽ va'e meme.
Ha'evea rami ndeayvuague raka'e rã peve guarã.
161 Huvixa kuery mba'e py e'ỹ xemoingo axy
teĩ xepy'a py ajererokyjea va'e ma ndeayvu ae.
162 Mba'emo rejapo aguã re ndeayvuague aendu vy avy'a,
amongue ojou reta va'e rami.
163 Xee ma ajeguaru apu gui, ajou vai ete guive.
Ha'e rã ndeguigua lei ma arovy'a.
164 Ára nhavõ sete-kue kuerei 'rã rogueroporaei,
ndeayvuague ha'evea ramigua meme ramo.
165 Ndeguigua lei oguerovy'a va'e ma ovy'a ete 'rã,
ndoikoi 'rã guive ha'e kuery reityarã.
166 Senhor, arõ aikovy ndee xereraa jepe aguã,
rejapo uka va'ekue ajapo reve.
167 Xepy'a py aiko reikuaa uka va'ekue rupi,
arovy'a ete vy.
168 Renhombo'eague ha'e reikuaa uka va'ekue rupi aiko,
mba'eta nerenonde ojekuaa aikoa ha'e javi.
169 Senhor, ajapukaia tovaẽ ndea peve.
Xemo'arandu ke ndeayvuague rami vy.
170 Nerenonde py tovaẽ ajerurea.
Xereraa jepe ke ndeayvuague rami vy.
171 Xejuru tandereroporaei,
mba'eta xembo'e ndeayvu reja va'ekue re.
172 Xeayvu py tarovy'a ndeguigua lei,
mba'eta rejapo uka va'ekue ha'evea ramigua meme.
173 Embou ndepo xerepy aguã,
renhombo'eague aiporavo rire.
174 Senhor, arõ ete xereraa jepe aguã.
Ndeguigua lei anho arovy'a.
175 Emoingove xenhe'ẽ rogueroporaei aguã.
Ndeayvuague taxepytyvõ.
176 Vexa'i kanhygue rami aiko. Xereka ke,
mba'eta xee nerembiguai ndaxerexarai 'rã rejapo uka va'ekue gui.
Ijayvu rei va'e kuery rovai ojerureague
Oguataa rupi ikuai va'e oporaei aguã.