144
1 Ima'endu'a porãmby toiko Senhor xe'itaova.
Ha'e ma omombaraete 'rã xepo joe apu'ã aguã,
xekuã voi ombo'e 'rã joe apu'ã aguã.
2 Ha'e ma xemboaxya ha'e oo ikorapa va'e aĩ aguã,
anhemiaty yvate va'e ha'e xereraa jepea,
mba'emo vai jokoa oiko ramo ajerovia hexe.
Ha'e ojapo xeretarã kuery apenaa rupi ikuai aguã rami.
3 Senhor, marã ramigua tu avakue, ha'e kuery re reikuaa pota aguã?
Marã ramigua tu avakue ra'y kuery, reayvu aguã?
4 Mba'eta avakue ma yvytu rami rive ikuai.
Oikovea ára ma kuaray'ã rami 'rã oaxa ovy va'e.
5 Senhor, eipe'a ke yva, ha'e eguejy.
Epoko yvyty re, ha'e ramo oẽ 'rã hataxĩ.
6 Embou overa va'e xerovaigua kuery moaĩmbaarã.
Emombo nderu'y omondyipa aguã.
7 Ekuave'ẽ yvate gui,
xereraa jepe ha'e xerenoẽ yy typya gui,
amboae regua kuery po'akaa gui ae.
8 Ha'e kuery ojuru gui apu rupi anho 'rã ijayvu,
ha'e oiporu kuaa regua py anhetẽ va'e'ỹ 'rã ojapo.
9 Xeruete, ndevy pe amonhendu 'rã mboraei pyau.
Mbaraka dez ixã va'e ambopu vy rogueroporaei 'rã.
10 Senhor ojapo 'rã huvixa kuery ipo'aka aguã rami.
Guembiguai Davi ogueraa jepe 'rã kyxe jojukaa gui.
11 Xereraa jepe ke, xepe'a amboae regua po'akaa gui.
Ha'e kuery ojuru gui apu rupi anho 'rã ijayvu,
ha'e oiporu kuaa regua py anhetẽ va'e'ỹ 'rã ojapo.
12 Orera'y kuery ipyau va'e ta'ikuai mba'emo rogue iporã va'e rami,
ha'e orerajy kuery ta'ikuai ita oo ytarã rami,
huvixave ro reguarã ombojegua pyre rami.
13 Oreroguy tatynyẽ romono'õ va'ekue,
opa marãgua tembi'u toĩ.
Orerymba kuery vexa'i taetave tovy,
oreyvy rupi mbovy rei e'ỹ tata'y.
14 Orerymba vaka voi ta'imbaraete,
toity eme gua'y'i, ta'ikuai porã e'ỹ eme guive.
Oreretã mbyte rupi tonhendu eme ipy'a vaia rupi ojae'o va'e.
15 Ovy'a ete 'rã ha'e rami ikuai va'e kuery.
Tá, ovy'a ete 'rã Senhor pe “Nhanderuete” he'i okuapy va'e.
Nhanderuete porayvu, yvate ete ha'e opena porãa re ijayvua
Ogueroporaeia rupi Davi ombopara va'ekue.