21
Ngovaigua kuery re huvixave ipo'aka rã oguerovy'aa ague
Jogueroporaei va'e pe Davi ombopara va'ekue.
1 Senhor, nembaraetea re oreruvixave ovy'a,
reraa jepeague re oporaei.
2 Mba'eta rejapo ma opy'a py ojapoxe va'ekue,
nerendu e'ỹi ojapukaia.
3 Mba'eta reayvu vy iporã va'e anho reme'ẽ ixupe.
Inhakã re remoĩ coroa ouro ete'i guigua.
4 Guekove re ha'e ojerure ramo reme'ẽ,
raka'e rã peve guarã.
5 Reraa jepeague ma pavẽ rei oguerovy'a okuapy.
Hexe remoĩ hexakãrã ha'e yvateve aguã.
6 Raka'e rã peve guarã remoĩ nhomoingo porãarã.
Hexeve reiko ramo vy'a anho 'rã oendu.
7 Mba'eta huvixave ojerovia Senhor re.
Ha'e rami vy Yvate ete va'e omboaxy ramo peteĩve henda py ndo'ai 'rã.
8 Ha'e rami vy ndepo oupity 'rã nderovaigua kuery ha'e javi,
reiporu kuaa regua ojopypa 'rã ndere ija'e e'ỹ va'e.
9 Ha'e kuery pe rejekuaa uka vy
rejapo 'rã tata rupa haku raxa va'e rami.
Senhor opoxya rupi omomba 'rã,
tata oapypaa rami.
10 Yvy gui remomba 'rã hamymino kuery,
avakue ra'y kuery ikuaia gui.
11 Nderovai ha'e kuery mba'emo vai ojapoxe teĩ
nopu'ã kuaai 'rã, ndojapo kuaai 'rã ha'e nunga.
12 Rejapo 'rã oguevipa aguã rami,
ha'e kuery rova re rea'anga 'rã nderapa.
13 Senhor, tandeyvate ndepo'akaa py.
Ha'e rã ore ma roporaei 'rã ndepo'akaa roguerovy'aa rupi.