28
Oguerovy'a reve ojerurea
Mboraeirã Davi ombopara va'ekue.
1 Senhor, ndevy pe ajapukai.
Xe'itaova, endu e'ỹ eme ke xeayvua,
mba'eta naxembovai ramo
yvykua py oguejy va'e kuery rami akanhy 'rã.
2 Endu ke xereraa jepe aguã re ajapukai ramo,
nerenda iky'a e'ỹ va'e katy xepo aupi reve.
3 Xembotyryry eme ke heko vai va'e kuery
opa marã rei ikuai va'e reve.
Ha'e kuery ma ikuai porã aguã re merami rive ijayvu oirũ pe,
teĩ ipy'a re ma opa marãgua anho oĩ.
4 Embopaga ke ha'e kuery ojapoague rami,
mba'emo vai ojapoague re.
Eme'ẽ ha'e kuery opo py ojapoague rekovia,
embojoja ha'e kuery ojapoague repy.
5 Ha'e kuery ndoikuaa potai Senhor ojapo va'e re,
neĩ opo py ojapo va'ekue re.
Ha'e ramo Senhor oitypa 'rã, nomopu'ã jevyvei 'rã guive.
6 Ta'ima'endu'a porãa Senhor re,
xereraa jepe aguã re ajapukai ramo xerendu rire.
7 Senhor ae xemombaraetea ha'e mba'emo vai jokoa.
Hexe xekuraxõ ojerovia.
Ha'e xereraa jepe ramo xekuraxõ ovy'a,
ha'e ixupe aporaei reve amboete 'rã.
8 Senhor omombaraete 'rã ixupe ikuai va'e,
hembiporavo onhemi vy oo jepe aguã.
9 Eraa jepe ke ndevygua kuery,
emoingo porã ndevygua kuery.
Ha'e kuery re epena ha'e emboyvate raka'e rã peve.