31
Iporiauague gui oguerovy'aa ague
Jogueroporaei va'e pe mboraeirã Davi ombopara va'ekue.
1 Senhor, ndere ae anhemi va'e.
Taiko eme oxĩmba rei va'e.
Xereraa jepe ke ndereko porãa rupi vy.
2 Endu ke ndeapyxa py, xereraa jepe pojava aguã.
Enhemoĩ xevy oo ikorapa va'e,
oo imbaraete vaipa va'e aa jepe aguã.
3 Mba'eta ndee ae xe'itaova ha'e oo ikorapa va'e reiko.
Nderery remboete ukaa rupi vy xerereko ha'e xembo'e 'rã.
4 Xepe'a 'rã nhuã nhemi rupi omoĩ mbyre gui,
mba'eta ndee ma xemombaraetea.
5 Ndepo py ae amboaxa xenhe'ẽ.
Senhor Xeruete anhetẽ va'e, ndee ae xerepy.
6 Rejou vai mba'emo ra'angaa ombojerovia va'e.
Ha'e rã xee ma Senhor re anho ajerovia.
7 Xee roguerovy'a, ajou porã 'rã ndeporayvua,
mba'eta reikuaa pota ajexavaia re,
reikuaa xenhe'ẽ oiko axya.
8 Naxemboaxai xerovaigua kuery po py.
Xemopu'ã imo'amy peteĩ henda tuvixaa py aiko aguã.
9 Senhor, ajexavaia aendu rã xemboaxy ke.
Xeporiau reia gui xerexa voi opa ovy.
Xerekove, xerete guive opa.
10 Xerekovea ma iporiaua re anho oaxa ovy,
xepoaẽa rupi tema aiko ma'etỹa nhavõ.
Ajejavypa rire naxembaraeteive-ive avy,
xekãgue voi opa ovy.
11 Xerovaigua kuery ha'e javi ojeguaru aguã rami aiko,
xero katy'i ikuai va'e kuery voi onhemondyipa xegui.
Xerexa va'ety kuery ndaxerexa xeveipa okuapy,
tape rupi xerexa va'e onha xegui.
12 Xegui ha'e kuery hexaraipa ma opy'a py, omanogue gui rami,
karo nhae'ũ guigua vokue rami aiko.
13 Mba'eta xee aendu heta ijayvu mbegue okuapy ramo,
xeyke jovaive rupi ikuai xemongyjexe vy.
Xere ijayvu mbegue vy
onhembopy'a okuapy xerekove oipe'a aguã.
14 Ha'e rã xee ma ajerovia Senhor re.
Ndevy pe “Ndee ma Xeruete” ha'e.
15 Ndepo py oĩ xe'ára.
Xepe'a ke xerovaigua kuery po gui,
xerakykue monhaa kuery xejukaxea gui.
16 Emoexakã ke nderova xee nerembiguai áry.
Xemboaxy vy xereraa jepe.
17 Senhor, ndevy pe ajapukai rire
ejapo eme axĩmba aguã rami.
Toxĩmba heko vai va'e kuery ae,
tokyrirĩmba omanoa py.
18 Emokyrirĩ ijapu va'e kuery,
heko porã va'e re opa marã rei ijayvu va'e,
onhemboarai rei, ojee ae ojerovia okuapy va'e.
19 Ndeporayvua ma yvate ete va'e,
nerenonde ojererokyjea rupi ikuai va'e pe rexa uka aguã rereko va'e.
Ha'e va'e ma rexa uka 'rã avakue ra'y kuery gui ndere onhemi va'e kuery pe anho.
20 Ha'e kuery renhomi 'rã ndejee ae avakue ojapo vaixea gui.
Ha'e py renhomi 'rã opa marãgua ayvu gui.
21 Ta'ima'endu'a porãa Senhor re!
Mba'eta xemboaxy ete
peteĩ tetã py xejokopaa ramo.
22 Xee ajapura reve
“Navaẽvei ma 'rã nerenonde py” ha'e va'ekue.
Ha'e rami teĩ ndee rendu ajapukaia,
xereraa jepe aguã re ajapukai ramo.
23 Senhor pegua iky'a e'ỹ va'e ha'e javi, peayvu ke.
Senhor ndoity ukai 'rã hexe ojerovia va'e.
Ha'e rã heko vai va'e ma ombopaga vaipa 'rã.
24 Senhor pearõ va'e kuery,
penembaraete ke, pendepy'a guaxu tema!