36
Avakue reko vaia ha'e Nhanderuete reko porãa re ijayvua
Jogueroporaei va'e pe Davi Senhor rembiguai ombopara va'ekue.
1 Heko vai va'e py'a re ma oĩ heko vaixea anho.
Ha'e kuery re noĩ Senhor renonde ojererokyje aguã.
2 Mba'eta teko vai ojapo 'rã ojejou porã rei aguã rami rive.
Ha'e vy aipoe'i 'rã ojeupe: “Opa marã aiko teĩ avave rei ndoikuaai 'rã,
neĩ ndaxejou vai 'rã guive”, he'i teĩ.
3 Ijuru gui ayvu oẽ va'e ma ayvu vai anho, ha'e nhombotavyarã.
Hi'arandua rupi ve'ỹ oiko, joupe ndojapo porãvei ma guive.
4 Ngupa py voi opa mba'e vai re rive onhembopy'a.
Tape iporã e'ỹ va'e rupi anho ooxe,
ndojejokoi guive mba'emo vai py.
5 Ha'e rã ndee Senhor, ndeporayvua ma yva peve 'rã oo,
arai peve 'rã oo ojeroviapy reikoa.
6 Ndereko porãa ma ndevygua yvyty rami tuvixa,
ha'e gui ne'arandua ma yvykua puku rami.
Ndee Senhor rejapo 'rã avakue ha'e mymba okuave aguã rami.
7 Xeruete, ndeporayvua ma ha'eve ete!
Ha'e nunga rupi ae avakue ra'y kuery onhemi 'rã ndepepo 'ã py.
8 Ndero py orerevyatã 'rã mba'emo porã re anho,
ha'e rã roy'u aguã ma orembovy'a va'e anho reme'ẽ.
9 Mba'eta ndere ae oĩ yvu tekove me'ẽa.
Nerexakãa py anho roexa 'rã hexakã va'e.
10 Ndekuaa va'e kuery pe exa uka riae reayvua,
ha'e ndereko porãa eikuaa uka anhetẽ rupi ipy'a va'e pe.
11 Ojee rive ojerovia va'e kuery topyrõ eme xere,
neĩ heko vai va'e tojapo eme ajepe'a aguã rami.
12 Mba'eta teko vai rupi ikuai va'e ho'apa 'rã.
Ha'e kuery ho'aague gui nopu'ãvei 'rã guive.