41
1 Ovy'a ete 'rã iporiaukue'i mboaxya kuery.
Ha'e va'e kuery Senhor ogueraa jepe 'rã nda'eveia ára.
2 Senhor oepy ha'e opena porã 'rã hekovea re.
Ojapo 'rã yvy re ovy'a aguã rami.
Nomboaxai 'rã hovaigua kuery po py ojavyky rei aguã.
3 Senhor omombaraete ju 'rã imba'eaxya gui.
Imba'eaxy teĩ hupa ituia rejapo ha'eve rei'i aguã rami.
4 Ha'e gui xee aipoa'e: “ Senhor, xemboaxy ke!
Emonguera xerekovea, ndevy ajejavy rire teĩ” ha'e.
5 Xerovaigua kuery xere ijayvu vai vy
“Raka'e tu omano 'rã, ha'e hery na'ima'endu'aavei 'rã?” he'i okuapy.
6 Ha'e kuery regua xerexa aguã ou vy ovare'ỹ va'e rupi 'rã ijayvu.
Opy'a re mba'emo vai anho omoĩ.
Oẽ vy ha'e nunga re teri rive 'rã ijayvu.
7 Ndaxerayvui va'e kuery ijayvu mbegue rei 'rã xere.
Mba'emo vai rupi xere ijayvu vy
8 “Mba'eaxy vaikue hexe oĩ va'e gui rima imba'eaxy oupy,
nopu'ãvei ma 'rã guive” he'i okuapy.
9 Xeirũ ayvuve vy ajeroviave va'ety voi
opu'ã avi xerovai, xereve okaru va'ety ae.
10 Ha'e rã ndee Senhor xemboaxy ke.
Xemopu'ã ju, ha'e kuery ambopaga aguã ojapo vaiague re.
11 Ha'e nunga rupi xee aikuaa ndee xemboaxya,
mba'eta xerovaigua kuery pe ndaxereity ukai.
12 Ha'e rami 'rãgue py anhetẽ rupi aikoa py xemombaraete,
ha'e xemoĩ nerenonde raka'e rã peve guarã.
13 Senhor Israel kuery Ruete toiko ima'endu'a porãmby
jypy'i guive raka'e rã peve.
Amém, amém.
Nhanderuete ombojeroviaaty py ooxea rami ijayvua ague
Jogueroporaei va'e pe Coré ra'y kuery nhombo'e aguã ombopara va'ekue.