58
1 Peẽ joe pepena va'e, ha'evea rami teve pendeayvu?
Anhetẽ rupi ri nda'u peikuaa pota avakue ra'y kuery re?
2 Any teve.
Ha'e rami 'rãgue py pendepy'a re pemoĩ teko vairã,
ha'e yvy jave re pejapo joguero'a aguã rami.
3 Heko vai va'e ma oguereko'i ramove ojepe'a 'rã ha'eve e'ỹa katy.
Itui'i vyve ojavy 'rã onhemboapu vy.
4 Jojukaarã oguereko mboi rami.
Oapyxa omboty 'rã mboi ijapyxa e'ỹ va'e rami,
5 oendu e'ỹ aguã imbo'ea ayvu,
ombo'e porãve teĩ.
6 Xeruete, emopẽ ke ha'e kuery raĩ ijuru py.
Senhor, emboi guary ra'y kue'iry raĩnhykã.
7 Tokanhymba yy oxyry va'e rami,
ha'e hu'y omomboa rã opẽmba rive va'e rami.
8 Hevo'ipe yvy re ijayxy ovy va'e rami ta'ikuai,
ha'e kyrĩ'i va'e ixy oity'i va'ekue rami kuaray oexa e'ỹ re ta'ikuai.
9 Juu'y okai vyvoi va'e e'ỹ vy ipyau va'e teĩ
oja omboaku e'ỹ mbove
yvytu jere ombovevepa va'e rami avi ta'ikuai.
10 Ha'e rã heko porã va'e ma hepyarã ou rã ovy'a 'rã.
Omoakỹ 'rã opy heko vai va'e ruguy py.
11 Ha'e ramo aipo'ea 'rã:
“Anhetẽ ae ra'e heko porã va'e ojopy 'rã ojeupegua.
Mba'eta Nhanderuete oiko yvy re nhombopaga va'e.”
Ojepy ukaa rupi ojerurea ague
Jogueroporaei va'e pe “Xemomba eme ke” he'ia py oporaeia rami oporaei aguã Davi ombopara va'ekue Saul ojukaxe vy oo py oĩa oarõ uka ramo (1 Samuel 19.11-12).