6
Nhanderuete omboaxy aguã re Davi ojerureague
Jogueroporaei va'e pe ixã irundy meme va'e py ombojoguy reve guarã Davi ombopara va'ekue.
1 Senhor, ndepoxya rupi e'ỹ ke xemongeta,
ndevaia rupi e'ỹ xembopaga.
2 Xemboaxy ke Senhor, mba'eta aendu xekangypaa.
Senhor, xemonguera ju ke, mba'eta xekãgue oku'epa rei ma,
3 xenhe'ẽ voi nda'evei ete.
Ha'e gui ndee Senhor, raka'e peve 'rã tu naxepytyvõi?
4 Senhor, ejevy ju, eraa jepe xerekovea,
xerepy ke xemboaxy vy.
5 Mba'eta manoa py ma ndoikoi 'rã ndere ima'endu'a va'e.
Onhono porãague py ituia gui mava'e 'rã tu oporaei ndevy?
6 Xekane'õ ma xepoaẽ riae vy.
Pytũ nhavõ xerexay omoakỹ xerupa,
inhakỹmba peve.
7 Xerovaigua kuery káuxa ajexavai ramo xerexa irurupa ma,
tuja'i rami ndaexa porãi aikovy.
8 Teko vai rupi pendekuai va'e, pejepe'apa ke xea gui,
mba'eta Senhor oendu ma ajae'o reve xeayvu rã.
9 Ajapukaia oendu vy
oikuaa pota ma guive ajerurea re.
10 Ha'e ramo xerovaigua kuery oxĩmba ha'e onhemondyipa 'rã okuapy.
Ojepe'apa xapy'a 'rã oxĩmba vy.