79
1 Oreruete, yvy regua xondaro kuery ndevygua yvy re ou.
Ndevygua templo iky'a e'ỹ va'e omongy'apa,
ha'e Jerusalém tetã ha'e javi rupi ombovaipa.
2 Nerembiguai kuery retekue oeja guyra rembi'urã,
ndevy ikuai va'ekue ro'okue ma ka'aguy rupigua rembi'urã oeja.
3 Jerusalém ha'e javi rupi omoẽ huguy yy rami,
nda'ipovei guive hetekue nhono porãarã.
4 Ha'e ramo orea katy rai'i rupi ikuai va'e ijayvu vaikue-ikue orere.
Opuka, ovy'a rei guive orere.
5 Senhor, raka'e peve 'rã tu ha'e rami oiko?
Orevy rexa uka riae 'rã teve nda'evei etea?
Orejou vaia nda'u tata rami riae 'rã ri hendy?
6 Yvy regua kuery pe jevy ke ndepoxy,
ndekuaa e'ỹ va'e kuery pe,
nderery rupi e'ỹ ojapukai va'e pe.
7 Mba'eta ha'e kuery ma omokanhymba Jacó kuery,
orerekoa voi ombovaipa.
8 Orere emoĩ eme oreramoĩ kuery ojejavyague.
Ha'e rami 'rãgue py orea py eju pojava oremboaxy aguã,
noronhanimavei ma ramo.
9 Oreruete orereraa jepea, orepytyvõ ke
nderery remboete ukaa rupi vy.
Orereraa jepe, ha'e emboguepa rojejavyague
nderery re ae vy.
10 Mba'erã tu yvy regua kuery “Mamo tu Penderuete oĩ?” he'i okuapy?
Nerembiguai kuery ruguy onhoẽague re
yvy regua rembopaga vy exa uka orevy.
11 Endu ke nhuã py ikuai va'e poaẽa.
Ndepo'akaa rupi emoingove ju omano aguã rami ikuai va'e.
12 Senhor, orea katy rai ikuai va'e ndere ijayvu vai rei ramo
embopaga sete-kue áryve.
13 Ha'e rã ore ma ndevygua orekuai,
nerymba vexa'i kuery remongaru va'e ae.
Roguerovy'a riae 'rã.
Aỹ guive raka'e rã peve roporaei 'rã ndevy.
Omoingo porã ju aguã re ojerurea ague
Jogueroporaei va'e pe Asafe ombopara va'ekue “Yvoty lírio” he'ia py oporaeia rami oporaei aguã.