89
1 Senhor, aporaei riae 'rã renhomboaxya re,
raka'e rã peve xejuru py aikuaa uka 'rã ojeroviapy reikoa.
2 Mba'eta aipoa'e: “Ndeporayvua ndopai 'rã,
ha'e ndereko porãa yva re remoĩ atã”, ha'e.
3 Aipo're: “Xerembiguai Davi aiporavo va'ekue pe
aura reve ajapo xereve guarã. Ha'e vy aipoa'e:
4 ‘Neramymino kuery amoĩ atã 'rã raka'e rã peve guarã,
raka'e rã peve amoĩ 'rã ndepo'akaa’, ha'e”, 're.
5 Senhor, yva re oporaeia okuapy mba'emo porã rejapo va'ekue rupi,
ndevygua iky'a e'ỹ va'e kuery ijatya py ogueroma'endu'a okuapy ojeroviapy reikoa.
6 Mba'eta mava'e nda'u Senhor rami ete oiko 'rã yva re?
Yva regua kuery mava'e 'rã tu Senhor ramigua ete oiko?
7 Mba'eta ixupegua iky'a e'ỹ va'e kuery ijatya py Nhanderuete yvateve ete va'e avi oĩ,
ijyvýry ikuai va'e ha'e javi gui okyjevepy oiko.
8 Senhor Oreruete nexondaro reta va'e,
mava'e 'rã tu ndee rami ipo'akapa va'e oiko?
Senhor, ndejee remoĩ ojeroviapy reikoa aguã.
9 Ye'ẽ opa marã omyĩ teĩ ndee ndepo'aka 'rã.
Yai opu'ã-pu'ã ramo remombytu'u.
10 Remokyrirĩ Raabe joguero'aa py ojuka pyre rami.
Ndejyva ipo'aka va'e py remoaĩmba nderovaigua kuery.
11 Yva ma nemba'e oĩ, yvy voi.
Yvy ha'e hexe ikuai va'e ha'e javi ndee ae rejapo va'ekue.
12 Ndee rejapo va'ekue kuaray puku-a ha'e ijapu'a'ia.
Tabor ha'e Hermom yvyty oporaei 'rã okuapy nderery rupi.
13 Ndejyva ma opa mba'e gui ipo'akave.
Reiporu kuaa regua reupi vy rexa uka ndepo mbaraetea.
14 Ha'evea rami rejoguereko, ndereko porãa rupi reiko huvixa reĩa py.
Renhomboaxya ha'e anhetẽ va'e ma nerenonde 'rã ojekuaa.
15 Ovy'a ete 'rã ndereroporaeia rupi ikuai va'e.
Mba'eta Senhor, ha'e kuery ndereve vy ikuai 'rã nerexakãa rupi.
16 Nderery rupi ovy'a riae 'rã okuapy,
oporaei 'rã ndereko porãa re.
17 Mba'eta ndee ma ha'e kuery mombaraetea ha'e imoexakãa.
Ndee oremboaxy ramo 'rãe ojekuaa orepo'akaa.
18 Mba'eta orevygua mba'emo vai jokoarã ma Senhor pegua ae oĩ,
oreruvixaverã ma Israel kuery ruete Iky'a e'ỹ va'e pegua.
19 Ymave rupi ndevygua iky'a e'ỹ va'e kuery pe ndeayvu va'ekue mba'emo rexa ukaa rupi.
Ha'e vy aipo're: “Xee ambopo'aka peteĩ ipy'a guaxu va'e penepytyvõ aguã.
Peẽ kuery mbyte gui amboyvateve peteĩ aiporavo va'ekue.
20 Ha'e rami vy xerembiguairã Davi ajou vy
amoĩ raka'e, azeite iky'a e'ỹ va'e amoĩ uka vy hexe.
21 Xepo py amoĩ atã 'rã,
xepo'akaa py amombaraete 'rã.
22 Ha'e ramo hovaigua kuery nomoĩ vai 'rã,
heko vai va'e nomoingo axyi 'rã.
23 Henonde amou'ũmba 'rã hovaigua kuery,
ajukapa 'rã hexe ija'e e'ỹ va'e.
24 Ojeroviapy aikoa ha'e xeporayvua rupi 'rã areko.
Ha'e ramo xerery rupi vy ipo'akave 'rã ovy.
25 Ajapo 'rã ye'ẽ ha'e yakã ikuai va'e re
ipo'aka aguã rami.
26 Xevy pe ojapukai vy aipoe'i 'rã:
‘Ndee ma Xeru, Xeruete,
ha'e itaova xereraa jepea guive’, he'i 'rã.
27 Ha'e rã ixupe aipoa'e: ‘Xera'y jypy guare.
Yvy regua ruvixave ikuai va'e gui ndeyvateve’, ha'e 'rã.
28 Amboaxya rupi riae 'rã areko,
ha'e hexeve amoĩ atãve 'rã xereve guarã ajapo va'ekue.
29 Hamymino kuery ajapo 'rã ikuai riae aguã rami,
ipo'akaa voi yva rami 'rã oĩ riae.
30 Ha'e rã xapy'a rei ta'y kuery nda'ikuaixei 'rã lei aeja va'ekue rupi,
ambo'eague rami e'ỹ ikuai vy,
31 xapy'a rei xeayvuague rami nda'ikuai 'rã,
ajapo uka va'ekue ndojapoxei vy.
32 Ha'e rami ri ramo yvyra rovi py ambopaga 'rã otekoavyague re,
ambopi 'rã ojejavyague re.
33 Ha'e rami teĩ ixugui ma ndaipe'ai 'rã ayvua,
ndajapo e'ỹi 'rã hexeve xeayvuague.
34 Xereve guarã ajapo va'ekue ndajapo e'ỹi 'rã,
xeayvuague ndarovai 'rã guive.
35 Peteĩgue'i xee aura karamboae xeky'a e'ỹa rupi ae
(ha'e xee aipo nda'e rivei 'rã Davi pe).
36 Aipoa'e: ‘Hamymino kuery ikuai riae 'rã,
ha'e ipo'akaa ma kuaray rami 'rã oĩ riae xerenonde.
37 Raka'e rã peve guarã amoĩ 'rã jaxy rami,
oaxa rive va'e'ỹ 'rã oiko yva re ojekuaa va'e rami’, ha'e va'ekue.”
38 Ha'e rami teĩ Senhor, oreruvixa re ndee nerepenavei vy reja.
Ndevai guive nerembiporavo pe.
39 Nerembiguai pe ndereve guarã rejapo va'ekue rembovaipa,
ixupegua coroa nerembovarei vy remombo yvy re.
40 Ixupegua tetã kora ma reitypa,
hoo ikorapa va'ekue voi rembovaipa.
41 Mba'emo oguereko va'ekue-'ekue ma tape rupi oaxa va'e-va'e ogueraapa 'rã,
hoo katy rai'i ikuai va'e voi ovy'a rei okuapy hexe.
42 Hovaigua kuery ma rembopo'aka,
rejapo hexe ija'e e'ỹ va'e ha'e javi ovy'a aguã rami.
43 Ha'e rã ikyxe ma rejapo naĩmbei rei aguã rami,
ha'e joguero'aa py oo ramo nereipytyvõvei.
44 Iporãague ma reipe'apa,
ha'e henda oĩaty reity yvy rupi.
45 Ikunumia ára remomba voi,
ha'e oxĩmba aguã rami rejapo.
46 Senhor, raka'e peve 'rã ha'e ramigua oiko,
raka'e peve nda'u nderejexa ukai 'rã?
Ndepoxya nda'u hendy riae 'rã ri tata rami?
47 Nema'endu'a xapy'a'i aikoa re.
Mba'everã e'ỹ teve remoingo avakue ra'y kuery.
48 Mava'e ava nda'u oikove 'rã manoa oexa e'ỹ re?
Mava'e nda'u onhe'ẽ ae ogueraa jepe kuaa 'rã yvyra rupa po'akaa gui?
49 Senhor, mba'e tu oiko ymave rupi ndeporayvu aguã re ndeayvuague,
ha'e rami aguã re ojeroviapy reikoa rupi Davi pe reuraague rire?
50 Senhor, nema'endu'a ke nerembiguai kuery re ovy'aa rei okuapya re,
ha'e heta regua ombojaru reia aropo'aka va'e re.
51 Nderovaigua kuery ijayvu vaikue-ikue, Senhor.
Nerembiporavo oikoa re ijayvu vaikue okuapy.
52 Senhor re ta'ima'endu'a porãa raka'e rã peve.
Amém! Amém!
Nhanderuete imarã e'ỹa ha'e avakue imarãa re ijayvua
Nhanderuete remimbo'e Moisés onhembo'eague.