91
Senhor re nhanhemi aguã regua
1 Yvate ete va'e oĩa py onhemi va'e,
Ipo'akapa va'e 'ã py ikane'õgua va'e ma
2 aipoe'i 'rã Senhor pe: “Anhemia imbaraete va'e,
Xeruete, hexe ajeroviaa va'e”, he'i 'rã.
3 Mba'eta ha'e ma ndereraa jepe 'rã nhuã py rami nembo'axe va'e gui,
mba'eaxy jojuka va'e gui guive.
4 Nemo'ã 'rã guague guy py.
Ipepo guy py reĩ rã mba'eve rei ndoikoi 'rã.
Ixuguigua anhetẽ va'e ma hu'y jokoa ha'e nhomo'ãa tuvixa va'e rami oĩ.
5 Ha'e ramo pytũ rupi jojukaa oiko teĩ ndee nderekyjei 'rã,
neĩ ára py hu'y ndere ou va'e gui,
6 mba'eaxy pytũ rupi jojuka va'e gui,
neĩ mba'emo vai kuaray mbyte jave jojuka va'e gui ma voi.
7 Ndeyvýry mil ho'a,
ndeaxu e'ỹa katy dez mil ho'a teĩ
ndere ma mba'eve rei novaẽi 'rã.
8 Nderexa py rive 'rã rexa
heko vai va'e ombopagaa ramo.
9 Mba'eta Nhanderuete pe “Anhemia”, 're,
ha'e Yvate ete va'e pe “Xee aĩaty” 're ramo
10 neĩ peteĩ henda py ma voi nderejexavai 'rã,
neĩ peteĩve mba'emo vai novaẽi 'rã ndero py.
11 Mba'eta ndere omopena uka 'rã ojeupegua anjo kuery pe,
reikoa ha'e javi rupi onhangareko aguã ndere.
12 Ha'e ramo ha'e kuery opo py ndejopy 'rã
peteĩve ita re renhepyxanga e'ỹ aguã.
13 Ha'e ramo repyrõ 'rã guary ha'e mboi vaikue re,
guary ra'y ha'e mboi re voi repyrõ 'rã inony.
14 Aipoe'i 'rã: “Xerayvu va'e ma araa jepe 'rã,
aepy 'rã xerery oikuaa va'e.
15 Xevy pe ojapukai ramo xee ambovai 'rã.
Ojexavaia py xee aĩ 'rã hexeve.
Araa jepe 'rã, ha'e amboete uka 'rã.
16 Amoingo porã 'rã hekove puku aguã rami,
ha'e ixupe aexa uka 'rã araa jepea.”
Nhanderuete oguerovy'aa rupi oporaeia
Mboraei sábado pyguarã ombopara pyre.