16
Jessé rekoa py Samuel omondoukaa ague
1 Ha'e gui Senhor aipoe'i Samuel pe:
— Raka'e peve 'rã tu ndepy'a vai Saul re? Mba'eta xee Senhor amboyke ma Israel kuery re openaa gui. Emonyẽ peteĩ hakuakue azeite, ha'e tereo. Romondouka 'rã Jessé rekoa Belém py. Mba'eta ta'y kuery va'e regua peteĩ ajou ma huvixarã.
2 Samuel oporandu:
— Mba'exa 'rã tu aa? Saul oikuaa ri vy xejuka 'rã.
Senhor ombovai:
— Eraa peteĩ vaka ra'y. Ha'e vy aipo're: “Aju Senhor pe mymba ajuka vy ame'ẽ aguã”, 're.
3 Ha'e rami vy renoĩ 'rã Jessé mymba reme'ẽ aguã py ou aguã. Ha'e rã xee aikuaa uka 'rã mba'e pa rejapo 'rãa. Ha'e ramo xee aikuaa uka va'e ae 'rã remoĩ, azeite reikyty vy — he'i.
4 Ha'e gui Senhor aipoe'iague rami Samuel oiko vy oo Belém tekoa py. Ha'e ramo tetã pygua nhomongeta va'ety kuery oexa vy oryryipa reve oẽ jogueruvy ovaexĩ aguã. Ha'e vy oporandu:
— Ha'evepa reia rupi pa reju?
5 Ombovai:
— Ha'evepa reia rupi ri aju Senhor pe mymba ajuka vy ame'ẽ aguã. Pejeky'a'o ke ha'e peju xereve mymba ame'ẽa py — he'i. Ha'e rami vy oiky'a'o Jessé ha'e ta'y kuery. Ha'e vy oenoĩmba avi mymba ome'ẽ aguã katy.
6 Ha'e kuery oike ouvy rã Samuel oexa Eliabe. Ha'e vy ojeupe ae “Kova'e nhi'ã Senhor renonde oiporavo va'ekue hi'aĩ” he'i.
7 Ha'e rami teĩ Senhor aipoe'i Samuel pe:
— Eikuaa pota eme hova re, neĩ ipuku-a re, mba'eta ha'e va'e ma xee ndaiporavoi. Mba'eta Senhor ma avakue joexaa rami e'ỹ oexa va'e. Avakue ma hi'árykue rive 'rã oexa, ha'e rã Senhor ma ipy'apy re oexa va'e — he'i.
8 Ha'e gui gua'y Abinadabe ju Jessé oenoĩ vy ojapo Samuel renonde rupi oaxa aguã rami. Ha'e rami teĩ
— Kova'e voi Senhor oiporavo va'ekue'ỹ — he'i.
9 Ha'e gui gua'y Samá ju Jessé ojapo oaxa aguã, teĩ Samuel
— Kova'e e'ỹ Senhor oiporavo — he'i.
10 Ha'e rami vy Jessé sete-ve ojapo gua'y kuery Samuel renonde rupi oaxa aguã rami, teĩ Jessé pe Samuel ombovai vy
— Kova'e kuery voi Senhor ndoiporavoi avi — he'i.
11 Ha'e gui ma Samuel oporandu Jessé pe:
— Opa ma teve ndera'y kuery?
Ombovai:
— Oata teri kunumive ete va'e teĩ vexa'i re opena oikovy — he'i.
Samuel aipoe'i ju Jessé pe:
— Enoĩ uka ha'vy, mba'eta ha'e ou e'ỹ re nda'evei mesa py jaguapy aguã.
12 Ha'e ramo oenoĩ uka vy ogueroike uka. Ha'e va'e ma ipytã rei porã, hexa porãmba, ha'e hete porã rei va'e. Senhor aipoe'i Samuel pe:
— Epu'ã ha'e eikyty azeite hexe, mba'eta upe va'e ae ma — he'i.
13 Ha'e ramo Samuel hakuakue py azeite oĩ va'e oupi vy oikyty inhakã re omoĩ tyke'y kuery oexaa py. Ha'e va'e ára guive Senhor Nhe'ẽ onhemonde Davi re. Ha'e gui ma Samuel opu'ã vy Ramá katy ju oo.
Saul renonde Davi mba'epu ixã reta va'e ombopu oinyague
14 Saul gui Senhor Nhe'ẽ ojepe'a ramo nhe'ẽ vai ju ombou rã oguereko axy.
15 Ha'e ramo Saul rembiguai kuery aipoe'i okuapy:
— Ne'exa, aỹ ma nhe'ẽ vai Nhanderuete ombou va'ekue nembojexavai.
16 Ha'e nunga rupi oreruvixa, emondouka na nerembiguai kuery nerenonde ikuai va'e peteĩ ava rogueru aguã ixã reta va'e mbopuarã. Ha'e ramo rãnda'u nhe'ẽ vai Senhor ombou va'ekue ndere ou jave peteĩ-teĩ okuã py ombopu rã rendu vy rekuerave 'rã — he'i okuapy.
17 Saul ombovai guembiguai kuery pe:
— Pejou ha'vy peteĩ ava imba'epu porã kuaa va'e, ha'e peru xea py — he'i.
18 Ha'e gui peteĩ kunumi va'e ombovai vy aipoe'i:
— Xee ma aikuaa peteĩ ava Belém pygua Jessé ra'y kuery va'e regua. Ha'e va'e ma imba'epu porã kuaa va'e, imbaraete ha'e ipy'a guaxu va'e guive, ava joguero'aa pygua rami rei oiko va'e, ijayvu kuaa ha'e hete porã rei va'e, ha'e hexeve Senhor oikoa va'e — he'i.
19 Ha'e rami rã Jessé oĩa py Saul ayvu mombe'uarã ombou vy aipoe'i uka:
— Embou xevy ndera'y Davi, vexa'i kuery re opena oikovy va'e — he'i uka.
20 Ha'e ramo Jessé guymba mburika'i ojopy vy ombovoyi mbojape ha'e peteĩ vinho ryru re. Peteĩ kavara ra'y'i voi ogueru vy Saul peguarã ogueraa uka avi gua'y Davi pe.
21 Ha'e rami vy Saul oĩa py Davi oo vy henonde oiko. Ha'e ramo ha'e oayvu vaipa vy hu'y jokoa reraarã omoingo.
22 Saul aipoe'i uka Jessé pe:
— Tove Davi xerenonde rupi riae toiko, xembovy'a rei ramo — he'i.
23 Ha'e gui Saul re nhe'ẽ vai Nhanderuete ombou va'e ou nhavõ Davi mba'epu ixã reta va'e oupi vy peteĩ-teĩ okuã py ombopu 'rã oiny. Ha'e ramo Saul onhenhandu 'rã ha'eve raive, okuerave 'rã, ixugui nhe'ẽ vai ojepe'a kuerei rã.