3
Ikéry py Senhor Samuel oenoĩague
1 Kunumi va'e Samuel mba'emo ojapo oikovy Senhor pe, Eli oexaa rupi. Ha'e va'e jave ma Senhor oayvu nombou retai, mba'emo ndoexa uka riaei guive.
2 Ha'e gui peteĩ pytũ ma sacerdote Eli onheno oupy onhenoaty rupi. Hexa pytũmba rei ma guive vy ndoexavei rai'i ma.
3 Samuel voi onheno ma avi oupy Senhor ayvu ryru oĩa oo py, Nhanderuete pegua tataendy oĩ va'e nombogueai teri jave.
4 Ha'e gui ma Senhor oenoĩ kunumi va'e:
— Samuel, Samuel!
Ha'e ramo ombovai:
— Apy ma aĩ! — he'i.
5 Ha'e rami vy onha ovy Eli ituia py. Ha'e vy aipoe'i:
— Apy ma ha'ã, ndee xerenoĩ ramo.
Ha'e rã aipoe'i:
— Any, xee e'ỹ ri roenoĩ xera'y. Tereo ju enheno — he'i ramo oo ju onheno.
6 Senhor teĩgue ju oenoĩ:
— Samuel! — he'i.
Ha'e ramo ovy jevy vy Eli ituia py oo vy aipoe'i:
— Apy ma ha'ã, ndee xerenoĩ ramo.
Ha'e rã aipoe'i:
— Any, xee e'ỹ ri roenoĩ xera'y. Tereo enheno ju — he'i.
7 Mba'eta Samuel ndoikuaai teri Senhor ae ria, ixupe Senhor oayvu nomboui teri ramo.
8 Ha'e gui mboapykue ma Senhor oenoĩ Samuel. Ha'e rã ovy vy oo ju Eli-a py. Ha'e vy aipoe'i:
— Apy ma ha'ã, ndee xerenoĩ ramo.
Ha'e ramo mae ma Eli oikuaa Senhor ae ri kunumi va'e oenoĩa.
9 Ha'e rami vy aipoe'i Samuel pe:
— Tereo enheno ju. Ha'e gui xapy'a rei nerenoĩa ju rã aipo're: “Ndeayvu ke Senhor, xee nerembiguai aendu ainy ndeayvu”, 're 'rã — he'i. Ha'e ramo Samuel oo ju ngupa py onheno.
10 Ha'e gui Senhor ou vy hi'aĩ ha'e py. Ha'e rami vy oenoĩ ypyague rami ae ju oenoĩ:
— Samuel, Samuel! — he'i ramove ombovai:
— Ndeayvu ke, mba'eta xee nerembiguai aendu ma ainy — he'i.
11 Ha'e gui Senhor aipoe'i Samuel pe:
— Ne'exa, peteĩ mba'e ajapo ta Israel kuery re, ha'e va'e oendu va'e rei ijapyxa nhe'ẽmba 'rã nhemondyi gui.
12 Mba'eta ha'e va'e ára Eli rovai amoingo 'rã hoo pygua kuery rekorã xeayvuague ha'e javi. Amboypy vy ma ajapopa 'rã.
13 Mba'eta ixupe aipoa'e ae ma va'ekue hoo pygua kuery ambopaga aguã raka'e rã peve, ha'e kuery ojejavya ha'e voi oikuaa porã rire. Ta'y kuery opa marã rei ikuai va'eri tuu ndojokoi.
14 Ha'e nunga rupi aura Eli ro pygua kuery ojejavyague ndojao'iai ae aguã re, mymba e'ỹ vy mba'emo ra'yĩgue ha'e kuery ome'ẽ teĩ.
Eli pe Samuel oexa va'ekue omombe'uague
15 Ko'ẽmba peve Samuel onheno oupy. Ha'e vy ma oipe'a Senhor pegua oo rokẽ. Ha'e rami teĩ okyje teri Eli pe oexa va'ekue omombe'u aguã.
16 Ha'e gui Eli oenoĩ Samuel. Ha'e vy aipoe'i:
— Xera'y Samuel!
Ombovai:
— Apy ma ha'ã! — he'i.
17 Ha'e ramo aipoe'i:
— Mba'e he'i tu Senhor ijayvu vy? Ajerure renhomi e'ỹ aguã. Tove Nhanderuete ha'e oipotaa rami ete tojapo ndevy, xapy'a rei ijayvuague ha'e javi remombe'u porãmba e'ỹ rã.
18 Ha'e ramo Samuel omombe'upa, mba'eve py ndoikuaa uka e'ỹi. Ha'e rami rã Eli aipoe'i:
— Senhor ae rima ra'e. Ha'e oipota va'e ae tojapo — he'i.
19 Ha'e gui Samuel okakuaave tema ovy. Hexeve Senhor oiko vy peteĩve henda py ndoejai ijayvuague oaxa rive aguã rami.
20 Ha'e rami rã Israel kuery ha'e javi, Dã guive Berseba peve ikuai va'e oikuaapa okuapy Senhor pegua profeta Samuel oikoa.
21 Siló py Senhor ojekuaa uka ae tema Samuel pe, oayvu ombou guive.