21
Bininj birri-burlumeng Jesus bu wam ngimeng kure kunred Jerusalem
1 Bu Jesus mak nawu ben-bukkang nuye bininj birri-wam darnkih kure kunred Jerusalem, bedda wanjh birri-woh-di kure kunred Bedbadji [Bethphage] kure mandulum kabolk-ngeyyo Olives. Wanjh kumekke Jesus ben‑munkeweng bene-bokenh nuye bininj nawu ben-bukkang.
2 Kumekke wanjh ben-marneyimeng, “Ngune-ray kure kunrurrk‑wern, ngune-ngimen ba ngurrben-ngalke bokenh donkey kumekke kabene‑di ngalbadjan, yaw kabeneh‑dukkayindi. Wanjh ngurrben‑yerrkemen, ngurrben-ka kure ngayi.
3 Bu yiman nangale ngun-djawan ngurrewoneng bu njale-kenh ngurrbenh-kan nawu donkeys, wanjh ngurrben-marneyimen nawu Kaworhna ka-djare berrewoneng. Werrk ngundi-won.
4 Kune wanjh kurduyimerranj bu kunyungki kunwok kurrmeninj bu kamwam woybukki kure nakare Zechariah kure yimeng,
5 “Ngurrben-marneyimen bininj kure kubolk-kimuk ‘Ngurri-na nawu Kaworhnan kamh-re kumekke kure ngudda. Nungka minj nabang, nungka nawu namak duninjh. Nungka kamh-re kam‑barndi kure ngalkerrnge donkey.”
6 Wanjh nawu bininj nuye ben-bukkang bene-wam bene‑kurduyimeng kure nungka Jesus ben-marneyimeng berrewoneng.
7 Wanjh bene-kang donkey yaw ngalengarre. Wanjh kumekke bene‑barrkbom berrewoneng kunmadj. Nungka Jesus djal‑barndi kure donkey.
8 Kaluk birri-wern bininj birri-di bedda birri-madj-yerrkkerrinj nawu nakuyeng wanjh birri-kurrmeng kure manbolh. Nawu birri-buyika bininj birri-dulk-dadjdjeng birri-kang birri-kurrmeng kure manbolh.
9 Wanjh birri-wern bininj birri-dokmeng nuye Jesus. Nawu birri‑buyika, birri-munkekadjung birri-kayhmeng birri-yimeng, “Mah. Karri‑yimen Hosanna! God bene-djarrk-wam namekke bininj nawu Beywurd nuye David! Nungka kamh-re kure kunngey nuye nawu Kaworhnan Rowk. Namekke wanjh God kabi‑marne-kurduyimen kunmak. Karri-yimen Hosanna God nawu Kaddum kah-ni.”
10 Bu Jesus wam ngimeng kure kunred Jerusalem wanjh nawu bininj rowk kumekke birri-ni birri-kange-barrhmeng rowk, birri‑djawarrinj, “Nangale bininj kam-wam kadberre?”
11 Wanjh birri-wern bininj bindi-wokmey birri-yimeng, “Nane wanjh Jesus nawu kunwok kam-kan nuye Ngabbard, nakang Nazareth kure kubolk-kimuk ka‑bolk‑ngeyyo Galilee, nakang kumekke-beh kam-wam.”