21
इसहाक फिब
1 याहवेहजी अब्राहामने बाछा फैब् धोंले साराए फिर ल्हयो खइ। धै खीजी बिब् धोंलेन् लमिंसि
2 साराई प्हसे नोइ, धै परमेश्वरजी चने बिब् धोंले अब्राहाम खेब् तबै त्हेर साराई च्ह घ्रि योंइ।
3 साराई फिबै चए च्हए मिं अब्राहामइ इसहाक थेंइ।
4 चए च्ह प्रेरो तमा अब्राहामइ परमेश्वरजी बिब् धोंलेन् ज्युर चिनु लइ।
5 चए च्ह इसहाक फिमा अब्राहाम प्र बर्ष तल् खाँल।
6 छले च्ह योंमा साराई बिइ, “परमेश्वरजी ङए सैं तोंन् लमिंसि ङ निस्योल् पिंइमुँ। चु ताँ थेब्मैं ताँन् ङने बालु निस्योब्मुँ।”
7 धबै साराई बिइ, “ ‘साराई प्हसेलाइ ङ्हे तिंल् योंम्’ बिसि खाबज्यै अब्राहामने आबिमल। दिलेया च खेब् तबै त्हेरै या ङ ङाँइले चल च्ह घ्रि फिइ।”
8 कोलो इसहाक थेब् ततै ह्यामा चइ ङ्हे थुँब पिवाबै त्हिंइर अब्राहामइ थेबै भत्तेर लइ।
हागार नेरो इश्माएल तेवाब
9 तिगें मिश्रीथेंस्यो हागारइ अब्राहामउँइँले फिबै च्ह इश्माएलइ ह्रोंसए च्ह इसहाकलाइ गिजेरिब् साराई म्रोंइ।
10 छतसि साराई अब्राहामने बिइ, “चु केब्स्यो नेरो चए च्ह छुइले तेवाद्। तलेबिस्याँ चु केब्छैंए च्ह ङए च्ह इसहाकने बालु क्हिए सै न्होरए क्ल्हे तल् योंरिब् आरे।”
11 इश्माएलै या ह्रोंसए च्हन् तबइले च ताँ थेसि अब्राहामए सैं आतों।
12 दिलेया परमेश्वरजी अब्राहामने बिइ, “च कोलो नेरो क्हिए केब्स्यो हागारल क्हिइ न्हुँ आलद्। ङइ क्हिने बाछा फैब् धोंले क्हिए सन्तान इसहाकउँइँलेन् तब्मुँ। छतसि साराई क्हिने खै बिमुँ छान् लद्।
13 च केब्स्योए च्हउँइँले या ल्हें सन्तानमैं तब्मुँ। ङइ चउँइँले या ह्रें घ्रि लमिंब्मुँ। तलेबिस्याँ इश्माएलै या क्हिए च्हन् ग।”
14 छ बिबै प्हँन्हाँगधों अब्राहाम न्हाँकर्न रेसि क्हें नेरो क्युए छकला (मशक) घ्रि हागारए प्हैंदार थेंमिंइ, धै च नेरो कोलो ङ्हिंना-ङ्हिंन् कुल्मिंइ। झाइले हागार बेर्शेबा बिबै तोइ आरेबै क्ल्ह्योजरे स्युर प्रइ।
15 छले प्र-प्रमा छकलार्बै क्यु थुँल् खाँबै लिउँइ चइ कोलो ल्हों न्होंर वाथेंसि
16 प्र मिटरदे क्याइ ह्यासि टिइ, तलेबिस्याँ “च कोलो सिब ङइ म्रोंल् आत्हुरिगे” बिसि चइ सैं न्हों-न्हों मैंइ। झाइले हागार चर टिसि बेल्ले क्रोबर होंइ।
17 दिलेया परमेश्वरजी कोलो क्रोब थेइ। धै परमेश्वरए दूतजी स्वर्गउँइँले हागारने बिइ, “ओ हागार, क्हिए फिर तो दुःख तइ? क्हि आङ्हिंन्, तलेबिस्याँ कोलो क्रोब परमेश्वरजी थेइमुँ।
18 रेद्, कोलो ङाँर ह्यासि चलाइ रेमिंन्, धै चए सैं क्होल् लमिंन्। ङइ च ङाँइले थेबै ह्रें घ्रि लमिंब्मुँ।”
19 छबिसि परमेश्वरजी हागारए मि थोंमिंमा चइ क्यु खाँदु घ्रि म्रोंइ। धै ह्यासि छकालर क्यु खाइ पखसि कोलो थुँमिंइ।
20 च कोलोए फिर परमेश्वरजी म्हाँया लबइले च थेब ततै ह्याइ, धै पारान बिबै तोइ आकेबै क्ल्ह्योर टिसि मे त्हँले ल्हिल् ह्रबै म्हि तइ।
21 धै चए आमाइ चए ल्हागिर मिश्र ह्युलउँइँले प्ह्रेंस्यो घ्रि पखमिंइ।
अब्राहाम नेरो अबीमेलेक म्रुँए न्होंर फैबै बाछा
22 च त्हेर अबीमेलेक म्रुँ नेरो चए सेनापति पिकोलइ अब्राहामने बिइ, “क्हिइ लबै तोन्दोंरि केर परमेश्वरजी आशिक पिंइमुँ।
23 छतसि ङ नेरो ङए च्ह-च्हमि, ङए क्वें-क्वेंमिंमैंने बालु क्हिइ स्योर तेबै केमैं खोंयोंइ लरिब् आरे बिसि ङने बालु चुर परमेश्वरए उँइँर बाछा फैद्। धै क्हिए फिर ङइ छ्याँब लब् धोंलेन् क्हिज्यै या ङए फिर छ्याँबै केमैं लम् बिसि ङने बाछा फैद्, धै क्हि टिबै चु ह्युलए ल्हागिरै या क्हिइ छ्याँबै केमैं लम् बिसि ङने बाछा फैद्।”
24 अब्राहामइ बिइ, “तम्, तम्, ङ छाबन् बाछा फैम्।”
25 दिलेया अबीमेलेक म्रुँए केब्छैंमैंइ खैच्हिजी लसि प्हेंवाबै क्यु खाँदुए बारेर अब्राहामइ अबीमेलेकने ताँ लइ।
26 अबीमेलेकइ बिइ, “छाबै के खाबइ लगे, च ङइ था आसे। क्हिइ ङने तोगो समा तोइ आबि। तिंयाँ मत्त्रे ङइ चु ताँ थेइ।”
27 च ताँ तबै लिउँइ अब्राहामइ क्युमैं-मेमैं पसि अबीमेलेकलाइ पिंइ। धै चमैं ङ्हिंइ बाछा फैइ।
28 अब्राहामइ क्युए बगालउँइँले म्हदो ङि स्योले थेंइ।
29 अबीमेलेकइ अब्राहामने “क्हिइ चु म्हदो ङि तले स्योले थेंल?” बिसि ङ्योएमा
30 अब्राहामइ बिइ, “चु क्यु खाँदु ङइ ताब् ग बिसि ग्वाइ तबै ल्हागिर चु क्यु म्हदो ङि क्हि किंन्।”
31 झाइले चर चमैं ङ्हिंन-ङ्हिंनइ बाछा फैबइले च क्ल्ह्योए मिं बेर्शेबा थेंइ।
32 झाइले चमैंइ बेर्शेबा बिबै क्ल्ह्योर खेंमैं न्होंर बाछा फैबै लिउँइ अबीमेलेक नेरो चए सेनापति पिकोल पलिश्ती बिबै ह्युलर एह्याइ।
33 अब्राहामइ बेर्शेबार झ्याउए सिंधुँ घ्रि रुँइँसि खोंयोंन् बिलै तरिबै याहवेह परमेश्वरलाइ सेवा लइ।
34 च लिउँइ अब्राहाम पलिश्तीमैंए ह्युलर ल्हें त्हिंइ समा टिइ।