26
इसहाकइ अबिमेलकने फैबै बाछा
1 ओंसों अब्राहामए पलोर तब् धों तबै अँङ्गल् धबै इसाहकए पलोरै या तइ। छतसि इसाहक पलिश्तिमैंए अबीमेलेक म्रुँ ङाँर गरार ह्युलर ह्याइ
2 तलेबिस्याँ याहवेहजी इसहाक ङाँर युसि बिइ, “क्हि मिश्र ह्युलर आह्याद्! ङइ क्हिने टिद् बिबै ह्युलर्न टिद्।
3 ङ क्हिने बालु तब्मुँ, धै क्हिए फिर आशिक पिंब्मुँ। चु ताँन् ह्युल क्हि नेरो क्हिए सन्तानमैं पिंब्मुँ। क्हिए आबा अब्राहामने बालु फैबै बाछा ङइ पूरा लब्मुँ।
4 मुर्बै सारमैं धोंले क्हिए सन्तानमैं ल्हें लमिंब्मुँ। धै चु ताँन् ह्युल चमैंलाइ पिंब्मुँ। क्हिए सन्तानमैंउँइँलेन् ह्युलर्बै ताँन् ह्रेंमैंइ आशिक योंब्मुँ।
5 तलेबिस्याँ अब्राहामइ ङइ बिबै ताँमैं ङिंइ, धै ङइ लद् बिबै केमैं या लइ।”
6 छतसि इसहाक गरार ह्युलर्न टिइ।
7 च क्ल्ह्योर्बै म्हिमैंइ इसहाकाए प्ह्रेंस्योए बारेर ङ्योएमा चइ “च ङए अङाँ ग” बिइ। तलेबिस्याँ रिबेका बेल्ले छ्याँब मुँल, छतसि “चर्बै म्हिमैंइ ङलाइ सैवासि ङए प्ह्रेंस्यो बोवाम् उ?” ङ्हाँसि च ङ्हिंइ। छतसि रिबेकालाइ ह्रोंसए प्ह्रेंस्यो बिल् आखाँ।
8 इसहाक चर ल्हें त्हिंइ टिबै लिउँइ पलिश्तीमैंए अबीमेलेक म्रुँइ झ्यालउँइँले ङ्ह्योमा इसहाक ह्रोंसए प्ह्रेंस्योने बालु म्हाँया लरिब् म्रोंइ।
9 छतब् म्रोंमा अबीमेलेकइ इसहाक हुइसि बिइ, “चम् क्हिए प्ह्रेंस्योन् मुँनादि। तले क्हिइ ‘ङए अङाँ ग’ बिसि ङिने स्योर तेल?”
इसाकइ चने बिइ, “च ङए प्ह्रेंस्यो ग बिस्याँ चुर्बै म्हिमैंइ ङलाइ सैवाम् उ बिसि ङइ मैंल।”
10 अबीमेलेकइ बिइ, “क्हिइ ङिने चु तो लल? म्हिमैंइ क्हिए प्ह्रेंस्योने आछ्याँबै के लस्याँ ङिए फिर क्हिइ छ्याब् ल्हैदिमल।”
11 झाइले अबीमेलेकइ “चु म्हि नेरो चुए प्ह्रेंस्योलाइ खाबज्यै तोइ आलद्। खाबज्यै या चुमैंलाइ तोइ लस्याँ च खैलसे सिल् त्हुब्मुँ” बिसि ताँन् म्हिमैंलाइ लोदा सैंदा लइ।
12 चर टिमा इसहाकइ खेति ल्हैदिइ। झाइले याहवेह परमेश्वरजी चए फिर आशिक पिंसि च बर्षर चइ ल्हें ल्हें रा-रोमैं खुइ।
13 छले च प्लब ततै ह्यासि झन् बेल्ले प्लबै म्हि तइ।
14 चल ल्हें र-क्युमैं, मे-क्ल्हामैं नेरो केब्छैं-केब्स्योमैं तब् म्रोंसि पलिश्तीमैंइ चए फिर ह्रिस लबर होंइ।
15 छतसि ओंसोंन् अब्राहामए केब्छैंमैंइ ताबै ताँन् क्यु खादुमैं पलिश्तीमैंइ युँमा नेरो स झोंसि म्रुवाइ।
16 इसहाक बेल्ले प्लब् म्रोंसि अबीमेलेकइ चने बिइ, “तारे ङिए ह्युलउँइँले क्हि ह्याद्, तलेबिस्याँ तिंजरो ङि भन्दा क्हि बेल्ले भोंब तइमुँ।”
17 छबिमा इसहाक च क्ल्ह्योउँइँले त्होंह्यासि गरारए ब्याँसिर तम्बु टौंदिसि चर्न टिबर होंइ।
18 झाइले ओंसोंन् ह्रोंसए आबाए पलोर ताथेंबै क्यु खादुमैं धबै ताबर होंइ। तलेबिस्याँ अब्राहाम सिबै लिउँइ पलिश्तीमैंइ च क्यु खादुमैं म्रुवाल। धै चइ च इनारए मिं ह्रोंसए आबाइ ओंसों थेंबै मिंन् थेंइ।
19 झाइले इसहाकए केब्छैंमैंइ ब्याँसिर क्यु खादु तामा क्युए मुल स्याइ।
20 दिलेया गरारर्बै प्ह्रोंछैंमैंइ “चु क्यु ङिल् ग” बिसि इसहाकए प्ह्रोंछैंमैंने प्होंबर होंइ। छतसि इसहाकइ च क्यु खादुए मिं “एसेक” बिब् थेंइ। तलेबिस्याँ चमैं प्होंरिल।
21 धबै चमैंइ अर्को क्यु खादु तामा चरै या छलेन् प्होंगि तइ। छतसि इसहाकइ चए मिं “सित्ना” थेंइ।
22 च क्ल्ह्योउँइँले अर्को क्ल्ह्योर ह्यासि चइ धबै इनार ताइ। चर बिस्याँ खाबज्यै या प्होंगि लबर आख। छतसि चइ च इनारए मिं रहोबोत बिसि थेंइ। “तारेम् याहवेह परमेश्वरजी ङ्योलाइ टिबै क्ल्ह्यो पिंइमुँ। छतसि ङ्यो चु क्ल्ह्योर आशिक योंसि ल्हें ततै ह्याब्मुँ,” बिइ।
23 च लिउँइ इसहाक च क्ल्ह्यो वाथेंसि बेर्शेबा बिबै क्ल्ह्योर टिनेइ।
24 याहवेह च म्हुँइँसर्न इसहाक ङाँर युसि बिइ, “ङ क्हिए आबा अब्राहामए परमेश्वर ग। आङ्हिंन्! तलेबिस्याँ ङ क्हिने बालुन् मुँ। ङइ क्हिए फिर आशिक पिंब्मुँ, ङए सेवा लबै अब्राहामने बालु ङइ बाछा फैब् धोंले क्हिए सन्तानमैं ङइ ल्हें लमिंब्मुँ।”
25 झाइले इसहाकइ चर ख्रो पिंबै क्ल्ह्यो घ्रि बनेसि याहवेहए मिं क्वेइ। धै ह्रोंसए तम्बु चर्न टौंदिइ। चरै या चए केब्छैंमैंइ अर्को क्यु खादु घ्रि ताइ।
इसहाक नेरो अबीमेलेकए म्हाँजोर बाछा फैब
26 तिगें अबीमेलेक ह्रोंसए सल्ला पिंबै अहुज्जत नेरो ह्रोंसए फौजर्बै सेनापति पिकोललाइ किंसि गरारउँइँले इसहाक ङाँर खइ।
27 इसहाकइ चमैंने बिइ, “ओंसों क्हेमैंइ ह्रिस लसि ङलाइ ल्हावाइ। तोगो क्हेमैं चुर तो लबर खल?”
28 चमैंइ बिइ, “याहवेह क्हिने बालु मुँ बिसि ङिइ सेइ। छतसि ङ्योए न्होंर तोइ आछ्याँबै केमैं आतरिगे बिसि बाछा घ्रि फैले बिसि ङि खब् ग।
29 छ लस्याँ ङिए फिर क्हिइ आछ्याँब लरिब् आरे। ङिज्यै या ङिए ह्युलउँइँले क्हिलाइ तोइ आलल्ले छेनालेन् कुल्मिंल। क्हि याहवेहए आशिक योंबै म्हि मुँना।”
30 छबिमा इसहाक सैं तोंसि चमैंलाइ चब् थुँब् लमिंइ।
31 च प्हँन्हाँग्धों न्हाँगर्न रेसि खेंमैं बाछा फैसि क्ह्रिइ। च लिउँइ इसहाकइ चमैं ह्याल् पिंइ। छले चमैं क्ह्रिसि छेनाले फ्रेयाइ।
32 च त्हिंइर्न इसहाकए केब्छैंमैंइ खेंमैंइ ताबै इनारए बारेर इसहाकने बिइ, “ङिइ ताबै क्ल्ह्योर क्यु त्होंइ।”
33 छबिमा इसहाकइ च क्यु खादुए मिं “शिबा” थेंइ। छतसि च सहरए मिं तिंजरो या बेर्शेबा बिम्।
एसावइ अरू ह्रेंर्बै प्ह्रेंस्योमैं पखब
34 एसाव प्लिच्यु बर्षर्बै तमा हित्ती च्हमिरिमैं ङ्हिं ब्ह्या लइ। प्ह्रेंस्यो घ्रिए मिं यहूदीत मुँल। चए आबा हित्ती बेरी बिब् मुँल। अर्को प्ह्रेंस्योए मिं बासमत मुँल। चए आबाए मिं हित्ती एलोन मुँल।
35 च च्हमिरिमैं ङ्हिंइ खेंमैंए कें-स्युइमि इसहाक नेरो रिबेकालाइ ककाँ क्युँ-क्युँ ङ्हाँल् लइ।