☰ ओंसोंबै ताँमैं 30
30
1 राहेल ङाँइँले याकूबए प्हसेमैं आत। छतसि राहेलइ ह्रोंसए आनने ह्रिस लबर होंइ। चइ याकूबने “ङलाज्यै प्हसेमैं पिंन्! आपिंस्याँ ङ सियाब्मुँ,” बिइ।
2 छबिमा याकूबइ राहेलने ह्रिस खसि बिइ, “ङ परमेश्‍वर वा? क्हिए कोख म्रुवाबम् परमेश्‍वरजी ग।”
3 राहेलइ बिइ, “ङए केब्स्यो बिल्हा चुर्न मुँ। चुने बालु तदु धै ङए ल्हागिर चइ प्हसे योंमिंरिगे। छले च ङाँइले ङै या आमा तल् खाँम्।”
4 छबिसि राहेलइ चए केब्स्यो बिल्हा याकूबए प्ह्रेंस्यो तबर पिंइ। 5 झाइले बिल्हा प्हसे नोसि याकूब ङाँइँले च्ह घ्रि फिइ। 6 छतमा राहेलइ बिइ, “परमेश्‍वरजी ङ ठिक म्रोंइ, धै ङए ताँ थेमिंसि ङलाइ च्ह घ्रि पिंइ।” छतसि चइ चए मिं दान* थेंइ।
7 राहेलए केब्स्यो बिल्हाइ धबै प्हसे नोसि चइ याकूबल म्हैला च्ह फिइ। 8 छतमा राहेलइ बिइ, “ङइ बेल्‍ले नेसि ङए आनलाइ ट्होइ।” छतसि चइ च च्हए मिं नप्‍ताली† थेंइ।
9 ह्रोंसइ प्हसे आफिब् सेसि लेआइ ह्रोंसए केब्स्यो जिल्पा बोसि याकूबए प्ह्रेंस्यो तबर पिंइ। 10 झाइले लेआए केब्स्यो जिल्पाइ याकूबल च्ह घ्रि फिइ। 11 छतमा लेआइ “ङ्‍हो सब् तइमुँ!” बिइ। छतसि चइ चए मिं गाद‡ थेंइ।
12 जिल्पाइ याकूब ङाँइले धबै च्ह घ्रि फिइ। 13 छतमा “ङ ङ्‍हो सब्स्यो मुँना! तारे ताँन् च्हमिरिमैंइ ङने ङ्‍हो सब्स्यो बिब्मुँ,” बिसि लेआइ बिइ। छतसि चइ चए मिं आशेर§ थेंइ।
14 गहुँ खैंबै त्हे तमा लेआए च्ह थेब रूबेन म्रोंर ह्‍याइ, चर चइ तेमै धों तबै ङ्‍हे युबै ट्हा बिशाखमूल* योंसि ह्रोंसए आमा लेआ ङाँर पखइ। धै च तेमैं धों तबै सै राहेलइ म्रोंमा “गार आम्हाँदिल्‍ले क्हिए च्हइ पखबै तेमैं ङलाज्यै च्युगुदे पिंन्दि,” बिइ।
15 दिलेया लेआइ चने बिइ, “ङए प्युँ ङ ङाँइले प्हेंवाब च्योंरि ताँ वा? च्हगै आतन तोगो ङए च्हइ पखबै तेमैं या क्हिइ किंल् म्हैल् वा?”
राहेलइ बिइ, “छ बिस्याँ क्हिए च्हइ पखबै तेमैं ङलाइ पिंस्याँ चए साटोर ङइ कोंने म्हुँइँसर ङए प्युँ याकूब क्हि ङाँर कुल्मिंस्यो।”
16 ङेसर याकूब म्रोंउँइँले खमा लेआ चने त्होबर ह्‍यासि बिइ, “ङए च्हइ पखबै बिशाखमूल तेमैं राहेललाइ पिंसि चए खिर ङइ क्हिलाइ किंइमुँ। छतसि क्हि कोंने म्हुँइँसर ङ ङाँर खल् त्हुम्।” छबिमा च म्हुँइँसर याकूब चने रोइ।
17 परमेश्‍वरजी लेआए प्राथना थेइ। धै चइ धबै प्हसे नोसि याकूब ङाँइले च्ह फिइ। 18 लेआइ बिइ, “ङए केब्स्यो ङए प्युँने बालु तबर ङइ पिंबइले परमेश्‍वरजी ङलाइ इनाम पिंइ।” छतसि चइ च च्हए मिं इस्साखार† थेंइ।
19 लेआ धबै प्हसे नोसि याकूब ङाँइले च्ह फिइ। 20 लेआइ बिइ, “परमेश्‍वरजी ङलाइ बेल्‍ले थेबै सै पिंइमुँ। तारे ङए प्युँउँइँले ङइ म्हाँया योंब्मुँ। तलेबिस्याँ ङइ चल च्ह ट्हु फिल् खाँइ।” छतसि चइ च्ह च्योंबए मिं जबूलून‡ थेंइ।
21 च लिउँइ चइ च्हमि घ्रि फिसि चए मिं दीना थेंइ।
22 च लिउँइ परमेश्‍वरजी राहेललाइ मैंसि चए प्राथना थेइ, धै खीजी चए कोख थोंमिंइ। 23 झाइले च प्हसे नोसि च्ह घ्रि फिइ। “परमेश्‍वरजी ङए फिर्बै ‘आछ्याँबै च्येमैं-मिंमैं’ स्योमिंइ,” बिसि चइ बिइ। 24 छतसि चइ कोलोए मिं योसेफ§ थेंइ।
 
याकूबए सै न्होर ल्हें तब
25 राहेलइ योसेफ फिबै लिउँइ याकूबइ मामा लाबानने बिइ, “तारे ङ ह्रोंसए ह्‍युल नेरो धिंर ह्‍याल् पिंन्। 26 ङइ क्हिए के लसि योंबै ङए प्ह्रेंस्योमैं नेरो प्हसेमैं बोल् पिंन्। तलेबिस्याँ ङइ लबै छ्याँबै केमैं क्हिइ सेल् खाँइमुँ। छतसि ङ ह्‍याल् पिंन्।”
27 दिलेया लाबानइ चने बिइ, “याहवेहजी क्हिउँइँले ङए फिर आशिक पिंइमुँ बिब ङइ सेइमुँ। छतसि ङए फिर दयाम्हाँया मुँस्याँ अझै टिमिंन्। 28 क्हिए नों सै कति किंमुँ ङने बिद्, क्हिइ कति बिमुँ, ङइ च्हगन् पिंस्यो।”
29 याकूबइ लाबानने बिइ, “ङइ क्हिला खैबै केमैं लइमुँ, धै क्हिए खेदोमैं ङने बालु खैले ल्हें ततै ह्‍याइमुँ च क्हिइ सेइमुँ। 30 ङ खब् भन्दा ओंसों क्हिने बालु सै न्होर च्युगुदे मत्‍त्रे मुँल तोगो ल्हें तइमुँ। ङइ खनिर यो झोंलेया क्हिए फिर याहवेहजी आशिक पिंइमुँ। तारे ह्रोंसए धिं-नाँए ल्हागिर ङइ खोंयों तौदु लब?”
31 “ङइ क्हिलाइ तो पिंले दि?” बिसि लाबानइ बिमा
याकूबइ बिइ, “क्हिइ ङलाइ तोइ पिंलै आत्हु। ङए ताँ ङिंम् बिस्याँ ङ क्हिए खेदोमैं अझै छरिस्यो। 32 तिंयाँ क्हिए ताँन् बगालउँइँले थोप्ले नेरो पेटारे रमैं, धै म्‍लोंग्या क्यु म्होंदोमैं ताँन् फ्रेसि स्यो-स्यो लल् पिंन्। चमैंन् ङए नों सै तरिगे। 33 छलमा ङ भर लल् खाँब मुँ उ आरे बिसि क्हिइ लिउँइ क्ह्रोंसेंन था सेब्मुँ। ङए रमैं न्होंर थोप्ले पेटारे नेरो क्यु म्होदोमैं न्होंर म्‍लोंग्या आङिंब्मैं क्हिइ स्यास्याँ क्हिए उँइँर ङ ह्‍यो ठर्दिब्मुँ।”
34 लाबानइ “तम् तम्, क्हिइ बिब् धोंलेन् लद्,” बिइ। 35 दिलेया च त्हिंइर लाबानइ पेटारे, थोप्ले र बुग्या-म्होदोमैं नेरो तार्ग्या दाग मुँबै र म्होदोमैं नेरो ताँन् म्‍लोंग्या क्यु म्होदोमैं स्यो लसि ह्रोंसए च्हमैं पिंवाँइ। 36 च लिउँइ लाबानइ च खेदोमैं किंसि याकूबउँइँले सोंरोबै घ्याँ ह्‍याइ। धै याकूबइ चर लाबानए चैबै बगालमैं छबर होंइ।
37 झाइले याकूबइ ङडा, खोंलों नेरो प्हुगिए* हाँगमैं पखसि तार्ग्या-तार्ग्या धर्का बनेबर चए फि छाइ। 38 झाइले बगालमैंइ क्यु थुँबै डोंडए ओंसों चइ च हाँगमैं थेंमिंइ। क्यु थुँबर खमा चमैं चर कोंयामल। 39 च बगालमैं च हाँगमैं ओंसों कोंयाबइले चमैंज्यै या प्हसेमैं छाबन् छिर्केमिर्के, पेटारे नेरो थोप्ले फिइ। 40 धै याकूबइ च प्हसेमैं स्यो लसि चैबै बगालमैं लाबानए छिर्के-मिर्के नेरो म्‍लोंग्य क्युमैं ङाँइ कुलइ। छले याकूबइ ह्रोंसए बगालमैं लाबानए बगालने आकोंल्‍ले स्योले थेंइ।
41 भों-भोंबै र-क्युमैं कोंबै त्हेर च हाँगमैंए उँइँर कोंयारिगे बिसि बगालइ क्यु थुँबै डोंडए ओंसों याकूबइ च हाँगमैं थेंमिंमल। 42 दिलेया भों आरेबै बगालमैंए ल्हागिर चइ च हाँगमैं आथेंमल। छतसि भों आरेब्मैं लाबानल तइ, भों मुँब्मैं याकूबल तइ। 43 छले याकूब बेल्‍ले प्लब तइ। चल र-क्युमैं, सलु, गधामैं या ल्हें तइ केब्छैं-केब्स्योमैं या ल्हें तइ।
* 30:6 30:6 दान हिब्रू क्युइर चु मिं “छ्याँब लब” धोंन् थेम्। † 30:8 30:8 नप्‍ताली हिब्रू क्युइर चु मिं “नेब” धोंन् थेम्। ‡ 30:11 30:11 गाद हिब्रू क्युइर चु मिंए अर्थ “ङ्‍हो सब” ग। § 30:13 30:13 आशेर हिब्रू क्युइर चु मिंए अर्थ “ङ्‍हो सब्स्यो” ग। * 30:14 30:14 बिशाखमूल म्हिमैंए सैंरि च ट्हा चस्याँ प्हसे आतबै च्हमिरिमैंइ प्हसे नोल् खाँम् रो। † 30:18 30:18 इस्साखार हिब्रू क्युइर चु मिं “खि फोसि प्युँ किंब् ग” नेरो “इनाम योंइ” धोंन् थेम्। ‡ 30:20 30:20 जबूलून हिब्रू क्युइर चु मिं “मान लब” धोंन् थेम्। § 30:24 30:24 योसेफ हिब्रू क्युइर चु मिं “धबै च्ह पिंरिगे” नेरो “स्योमिंइ” धोंन् थेम्। * 30:37 30:37 लारे-पिपल, हाडे-बदाम नेरो चिनार
☰