33
याकूब एसावने सैं तोंदै त्होब
1 याकूबइ ङ्ह्योमा एसाव नेरो चने बालु प्लिब्ब्रा म्हिमैं खरिब् म्रोंइ। छतमा चइ ह्रोंसए च्ह-च्हमिमैंलाइ लेआ, राहेल नेरो केब्स्योमैं ङ्हिंए जिम्मार पिंइ।
2 चइ केब्स्योमैं नेरो चमैंए च्हमैं ताँन् भन्दा ओंसों थेंमिंइ, च लिउँइ लेआ नेरो चए च्ह च्हमिमैं, धै राहेल नेरो चए च्ह योसेफ बिस्याँ ताँन् भन्दा लिउँइ थेंइ।
3 याकूब ह्रोंसए आघें ङाँर आफेन् समा ङिखे समा सर फ्योदै ह्याइ।
4 दिलेया एसाव न्हेखसि याकूबलाइ अँखलो ख्वेसि म्वें लइ। धै चमैं ङ्हिं बेल्ले क्रोइ।
5 एसावइ च्हमिरिमैं नेरो कोलोमैं म्रोंसि “क्हिने बालु मुँब्मैं खाब्मैं जा?” बिमा
याकूबइ “परमेश्वरजी क्हिए केब्छैंए फिर दयाम्हाँया लसि पिंबै ङए च्ह-च्हमिमैं ग,” बिइ।
6 च लिउँइ केब्स्योमैं नेरो चए प्हसेमैं खसि एसावलाइ फ्योइ।
7 लेआ नेरो चए प्हसेमैं या खसि फ्योइ। ताँनइ फ्योल् खाँबै लिउँइ योसेफ नेरो राहेल खसि फ्योइ।
8 “ङइ त्होबै चु बगालए अर्थ तो जा?” बिसि एसावइ याकूबने ङ्योएमा याकूबइ बिइ, “ङए फिर क्हिइ ल्हयो खरिगे बिसि ङइ चु बगालमैं कुल्मिंब् ग।”
9 दिलेया एसावइ बिइ, “आच्यों, ङने बालु ल्हें मुँ। छतसि क्हिने बालु मुँबै सैमैं क्हिनेन् मुँरिगे।”
10 याकूबइ बिइ, “आङिं, क्हिए म्हाँया ङए फिर मुँस्याँ गार आम्हाँदिल्ले ङए योर्बै क्होल्सैमैं किंमिंन्। तलेबिस्याँ ङए फिर च्हौ थेबै म्हाँया उँइँसि क्हिइ ङलाइ मान लइ। क्ह्रोंसेंन क्हिने त्होल् योंमा परमेश्वर म्रोंब् धोंन् ङ्हाँइ।
11 क्हिए ल्हागिर्न पखबै चु क्होल्सैमैं गार आम्हाँदिल्ले किंन्, तलेबिस्याँ ङए फिर परमेश्वरए आशिक मुँबइले ङने ल्हेंन् मुँ।” छले याकूबइ किंलन् त्हुम् बिसि कर लमा एसावइ च क्होल्सैमैं किंइ।
12 झाइले एसावइ बिइ, “तारे ङ्यो ह्याले! क्हिए ओंसों ओंसों ङ प्रब्मुँ।”
13 दिलेया याकूबइ एसावने बिइ, “चु कोलोमैं च्योंबन् मुँ बिब क्हिइ सेइमुँ, धै ङ्हे ङ्हेल् त्हुबै खेदोमैं या मुँ। चु बगालमैं तिगेंर्न ल्हें प्रमिंइ बिस्याँ ताँन् सियाम् उ बिसि ङ न्हुँ खइमुँ।
14 छतसि ङ क्हिने यो छ्युँ लमुँ, ङ भन्दा ओंसों क्हि ह्यादु। ङ बिस्याँ ओंसों ह्याबै खेदोमैं नेरो प्हसेमैंए प्रबै त्होंर प्रसि क्हि ङाँर सेइरर आफेखन् समा नुजीले प्रसि खब्मुँ।”
15 एसावइ बिइ, “छ बिस्याँ ङने बालु मुँबै च्युगुदे म्हिमैं क्हि ङाँर वाथेंम्।”
दिलेया याकूबइ बिइ, “च म्हिमैं चैदिलै रो वा? क्हिए दयाम्हाँया ङए फिर मुँसेरो तम्।”
16 छबिमा एसाव च त्हिंइर्न सेइरर एह्याइ।
17 याकूब बिस्याँ सुक्कोतउँइ ह्यासि ह्रोंसए टिबै क्ल्ह्यो नेरो खेदोमैंए प्ह्रो बनेइ। छतसि च क्ल्ह्योए मिं सुक्कोत थेंइ।
18 याकूब पद्दन-आरामउँइँले ह्याबै लिउँइ कनान ह्युलर्बै शकेम बिबै सहरर छेनाले फेखइ, धै च सहरए ओंसों तम्बु टौंदिसि टिइ।
19 चइ चाँदिए मुइ प्र झोंसि च क्ल्ह्यो शकेमए आबा हमोरए च्हमैंने किंइ।
20 चर चइ ख्रो पिंबै क्ल्ह्यो घ्रि बनेसि चए मिं एल-एलोह-इस्राएल थेंइ।