36
एसावए प्हसेमैं
(१ इतिहास १:३४-३७)
1 एसाव अथवा एदोमए ताँमैं चुन् ग।
2 एसावइ कनानी च्हमिरिमैं ङ्हिं ब्ह्या लइ चमैं हित्ती एलोनए च्हमि आदा नेरो हिव्वी सिबोनए क्वेंमिं धै अनाए च्हमि ओहोलीबामा मुँल।
3 झाइले इश्माएलए च्हमि नेरो नबायोतए अङाँ बासमत मुँल
4 एसावउँइँले आदाइ एलीपज फिइ, धै बासमतइ रूएल फिइ।
5 छलेन ओहोलीबामाइ येऊश, यालाम नेरो कोरह फिइ। कनान ह्युलर फिबै एसावए च्हमैं चुमैंन् ग।
6 एसावइ ह्रोंसए प्ह्रेंस्योमैं, च्ह-च्हमिमैं, चए धिंर्बै ताँन् म्हिमैं, ह्रोंसने मुँबै ताँन् खेदोमैं नेरो कनान ह्युलर खागु लबै ताँन् सै न्होर बोसि ह्रोंसए अलि याकूबने फ्रेसि अर्को ह्युलर ह्याइ।
7 चमैंल ल्हें सै न्होर मुँल, छतसि चमैं बालुन् टिल् आखाँ। चमैंए खेदोमैंइ लमा चमैं टिबै क्ल्ह्योर निर्बा तल् आखाँ।
8 छतसि एसाव (अथवा एदोम) सेइर ह्युलर टिइ।
9 सेइर बिबै ह्युलए कोंजरे टिबै एदोमिमैंए खेमैं एसावए ताँ छले मुँ।
10 एसावए च्हमैंए मिं चुमैंन् ग: एसावए प्ह्रेंस्यो आदाए च्ह एलीपज मुँल। धै बासमतए च्ह रूएल मुँल।
11 एलीपजए च्हमैं: तेमान, ओमार, सपो, गाताम नेरो कनज मुँल।
12 एसावए च्ह एलीपजल तीम्न मिं मुँबै प्ह्रेंस्यो घ्रि मुँल। एलीपजउँइँले चइ अमालेक फिइ। एसावए प्ह्रेंस्यो आदाए क्वेंमैं चमैंन् ग।
13 रूएलए च्हमैं: नहत, जेरह, शम्मा नेरो मिज्जा मुँल। एसावए प्ह्रेंस्यो बासमतए क्वेंमैं चमैंन् ग।
14 एसावए प्ह्रेंस्यो ओहोलीबामा सिबोनए क्वेंमिं नेरो अनाए च्हमि मुँल। एसावउँइँले चइ च्हमैं येऊश, यालाम नेरो कोरह फिइ।
15 एसावए प्हसेमैं न्होंर्बै चिब्मैं चुमैंन् ग। चए च्ह थेब एलीपजए चिब च्हमैं तेमान, ओमार, सपो, कनज,
16 कोरह, गाताम नेरो अमालेक। एदोम ह्युलर एलीपजउँइँले तबै चिब्मैं चुमैंन् ग। चुमैं आदाए क्वेंमैं ग।
17 एसावए च्ह रूएलए च्हमैं: नहत, जेरह, शम्मा नेरो मिज्जा मुँल। चमैं एदोम ह्युलर रूएलउँइँले तबै चिब्मैं चुमैंन् ग। एसावए प्ह्रेंस्यो बासमतए क्वेंमैं चुमैंन् ग।
18 एसाबए प्ह्रेंस्यो ओहोलीबामाए चिब च्हमैं: येऊश, यालाम नेरो कोरह मुँल। अनाए च्हमि एसावए प्ह्रेंस्यो ओहोलीबामाइ फिबै चिब्मैं चुमैंन् ग।
19 एसाव अथवा एदोमए च्हमैं न्होंर्बै चिब्मैं चुमैंन् ग।
सेइरए प्हसेमैं
(१ इतिहास १:३८-४२)
20 च ह्युलर टिबै एदोमथें होरी सेइरए च्हमैं लोतान, शोबाल, सिबोन, अना ग।
21 दीशोन, एसेर नेरो दीशान। एदोम ह्युलर सेइरए च्हमैं होरीमैंए चिब्मैं मुँल।
22 लोतानए च्हमैं: होरी नेरो हेमान ग। तीम्न लोतानए अङाँ मुँल।
23 शोबालए च्हमैं: अल्बान, मानहत, एबाल, शपो नेरो ओनाम मुँल।
24 सिबोनए च्हमैं: अय्या नेरो अना मुँल। अनाइ ह्रोंसए आबा सिबोनए गधामैं छरिमा क्यु आयोंबै ह्युलरि लल क्युए मुल स्याब चु अना ग।
25 अनाए च्ह-च्हमिमैं: दीशोन नेरो चए च्हमि ओहोलीबामा ग।
26 दीशोनए च्हमैं: हेमदान, एश्बान, यित्रान नेरो करान मुँल।
27 एसेरए च्हमैं: बिल्हान, जावान नेरो अकान मुँल।
28 दीशानए च्हमैं: ऊज नेरो आरान मुँल।
29 होरीमैंए चिब्मैं लोतान, शोबाल, सिबोन, अना,
30 दीशोन, एसेर नेरो दीशान ग। सेइर ह्युलर चमैंए खलकर्बै होरीमैंए चिब्मैं चुमैंन् ग।
एदोमए म्रुँमैं
(१ इतिहास १:४३-५४)
31 इस्राएलर्बै अरू म्रुँमैंइ ग्याल्स लब् भन्दा ओंसों एदोम ह्युलर ग्याल्स लबै म्रुँमैं चुमैंन् ग:
32 बओरए च्ह बेलाइ एदोमर ग्याल्स लमल। चए राजधानीए मिं दिन्हाबा मुँल।
33 बेला सिबै लिउँइ बोज्रार टिबै जेरहए च्ह योबाबइ चए क्ल्ह्योर ग्याल्स लइ।
34 योबाब सिबै लिउँइ तेमानीमैंए ह्युलर्बै हूशामइ चए क्ल्ह्योर ग्याल्स लइ।
35 हूशाम सिबै लिउँइ मोआब ह्युलर मिद्यानलाइ ट्होबै बददए च्ह हददइ चए क्ल्ह्योर ग्याल्स लइ। चए राजधानीए मिं अवीत मुँल।
36 हदद सिबै लिउँइ मास्रेकार टिबै सम्लाइ चए क्ल्ह्योर ग्याल्स लइ।
37 सम्ला सिबै लिउँइ स्योंए रेर्बै रहोबोत सहरर्बै शौलइ चए क्ल्ह्योर ग्याल्स लइ।
38 शौल सिबै लिउँइ अक्बोरए च्ह बाल-हानानइ चए क्ल्ह्योर ग्याल्स लइ।
39 अक्बोरए च्ह बाल-हनान सिबै लिउँइ हददइ चए क्ल्ह्योर ग्याल्स लइ। चए राजधानीए मिं पाऊ मुँल। चए प्ह्रेंस्योए मिं महेतबेल मुँल। च मत्रेदए च्हमि नेरो मे-जाहाबए क्वेंमिं मुँल।
40 एसावउँइँले तबै चिब्मैंए मिं, चमैं टिबै क्ल्ह्यो नेरो बंशमै चुमैंन् ग: तीम्न, अल्वा, यतेत,
41 ओहोलीबामा, एलाह, पीनोन,
42 कनज, तेमान, मिब्सार,
43 मग्दीएल नेरो ईराम। चमैंइ क्ल्हे लबै ह्युलर टिबै क्ल्ह्योर्बै चिब्मैं चुमैंन् ग। एदोमिमैंए खे नेरो एसावए ताँ चुन् ग।