47
योसेफए आबा नेरो आघें-अलिमैं फारो ङाँर खब
1 झाइले योसेफ फारो ङाँर ह्यासि बिइ, “ङए आबा नेरो आघें-अलिमैं चमैंए र-क्युमैं, म्येमैं नेरो चमैंए तोन्दोंरि सै किंसि कनान ह्युलउँइँले खइमुँ। चमैं तोगो गोशेन ह्युलर मुँ।”
2 छ बिसि योसेफइ ह्रोंसए आघेंमैं न्होंउँइँले म्हि ङ्ह किंसि फारो ङाँर त्होबर बोइ।
3 योसेफए आघेंमैंने “क्हेमैंइ तो केमैं लमुँ?” बिसि फारोइ ङ्योएइ।
चमैंइ फारोने बिइ, “ङि क्हिए केब्छैंमैं ङिए खेमैं-मामैं ओंनोंन् प्ह्रोंछैंमैं ग।
4 कनान ह्युलर बेल्ले थेबै अँङ्गल् तबइले क्हिए केब्छैंमैंइ र-क्यु छबै क्ल्ह्यो आयों। छतसि ङि चु ह्युलर्न टिबर खइमुँ। यो छ्युँ लमुँ ङि क्हिए केब्छैंमैंइ गोशेन ह्युलर टिल् योंरिगे।”
5 झाइले फारोइ योसेफने बिइ, “क्हिए आबा नेरो आघें-अलिमैं क्हि ङाँर खना।
6 मिश्र ह्युल क्हिए योर्न मुँ। चु ह्युलर्बै ताँन् भन्दा छ्याँबै क्ल्ह्योर क्हिए आबा नेरो आघें-अलिमैं टिल् पिंन्। चमैं गोशेन ह्युलर्न टिल् पिंन्। धै चमैं न्होंर सिपालु म्हिमैं मुँस्याँ चमैंए जिम्मार ङए खेदोमैं या कुल्मिंन्।”
7 च लिउँइ योसेफइ ह्रोंसए आबा याकूबलाज्यै या फारोने त्होबर बोइ। छले त्होमा याकूबइ फारोए फिर आशिक पिंइ।
8 फारोइ याकूबने “क्हि कति बर्ष तइ?” बिसि ङ्योएमा
9 याकूबइ बिइ, “ङइ तोगो समा थोबै छ्ह प्रसे सोंच्यु तइ। ङए छ्ह रिन्ठि नेरो दुःखर थोरिइमुँ। ङए खेमैं ल्हें सोल चमैं सोब्द प्रे छ्ह तोगो ङल आयोइमुँ।”
10 याकूबइ धबै फारोलाइ आशिक पिंसि फारोउँइँले त्होंसि ह्याइ।
11 झाइले फारोइ बिब् धोंलेन् योसेफइ ह्रोंसए आबा नेरो आघें-अलिमैंलाइ मिश्रर्बै ताँन् भन्दा छ्याँब रामसेस बिबै ह्युलर चमैं क्ल्हे तबर क्ल्ह्योमैं पिंइ।
12 योसेफइ ह्रोंसए आबा आघें-अलिमैं नेरो ह्रोंसए आबाए परवा ताँनलाइ चमैंए प्हसेमैं कति मुँ च ङ्ह्योसि चबै सैमैं या पिंइ।
योसेफइ मिश्र ह्युलर चाँजो लब
13 बेल्ले थेबै अँङ्गल् तबइले ह्युलर चबै सैमैं तोइ आरेल। अंङ्गलइ लमा मिश्र नेरो कनान ह्युल ङ्हिंर्बै म्हिमैं चल् आयोंल।
14 मिश्र नेरो कनान ह्युलर्बै म्हिमैंने म्ल्ह-नारिमैं चुँसि योंबै मुइ ताँन् योसेफइ खागु लसि फारोए दरबारर थेंल।
15 च त्हेर मिश्र नेरो कनान ह्युलर्बै म्हिमैंए मुइ ताँन् म्ल्ह-नारिमैं किंसि खाँयाल। छतसि मिश्रीमैं ताँन् योसेफ ङाँर खसि बिइ, “ङिलाइ धबै म्ल्ह-नारिमैं पिंन्। क्हि मुँना-मुँन् क्हिए उँइँर्न ङि खैले सिब? ङिने मुँबै मुइ ताँन् खाँयाइ।”
16 योसेफइ चमैंने बिइ, “क्हेमैंए मुइ खाँयास्याँ खेदोमैं पखो। क्हेमैंए खेदोमैंए साटोर ङइ म्ल्ह-नारिमैं पिंस्यो।”
17 योसेफइ बिब् धोंलेन् चमैंइ खेंमैंए खेदोमैं योसेफ ङाँर पखइ। धै योसेफइ चमैंए घोडा, क्यु, म्ये, गधामैंए साटोर चमैंलाइ म्ल्ह-नारिमैं पिंसि ल्होइ। च सालर चइ खेदोमैंए साटोर चमैंलाइ म्ल्ह-नारिमैं पिंइ।
18 च बर्ष खाँसि क्हुरिंम्बै सालरै या धबै चमैं खसि योसेफने बिइ, “ङिए मुइ ताँन् खाँयाबै ताँ क्हिइ सेइमुँ। खेदोमैंए बगालमैं या ताँन् क्हिलन् तल् खाँइमुँ। तारे क्हिलाइ पिंबर ङिए ज्यु नेरो क्ल्ह्यो बाहेक ङिने बालु तोइ आरे।
19 ङि सिल् आपिंन्। ङिए क्ल्ह्यो या बाँजो तल् आपिंन्। ङिलाइ म्ल्ह-नारिमैं पिंसि ङि नेरो ङिए क्ल्ह्यो-न्हेंमैं या किंन्। धै ङि ह्रोंसए क्ल्ह्यो-न्हेने बालुन् म्रुँए केब्छैं-केब्स्योमैं तब्मुँ। बरु ङिए क्ल्ह्यो-न्हें या बाँझ आतरिगे ङि या सोल् योंरिगे,” बिसि ङिलाइ प्लु पिंन्।
20 छले योसेफइ मिश्रर्बै ताँन् क्ल्ह्यो फारोए ल्हागिर किंइ। चर थेबै अँङ्गल् तबइले मिश्रीमैंइ ह्रोंसए ताँन् क्ल्ह्यो-न्हें या चुँइ, धै चमैंए क्ल्ह्योमैं फारो म्रुँल् तयाइ।
21 मिश्रर्बै छेउ घ्रिइले अर्को छेउ समार्बै ताँन् म्हिमैं चइ केब्छैंमैं तइ।
22 दिलेया खेगिमैंए क्ल्ह्यो बिस्याँ चइ आकिं, तलेबिस्याँ खेगिमैंए ल्हागिर फारोउँइँले म्ल्ह-नारिए भाउ स्यो लल। धै फारोइ पिंबै भागउँइँले चमैंइ चमल। छतसि चमैंइ खेंमैंए क्ल्ह्यो-न्हें चुँल् आत्हु।
23 योसेफइ मिश्रीमैंने बिइ, “ङ्ह्योद्, तिंयाँ ङइ फारोए ल्हागिर क्हेमैं नेरो क्हेमैंए क्ल्ह्यो न्हेंमैं किंइमुँ। तारे क्हेमैंए ल्हागिर प्लु चुर मुँ म्रोंर प्लु प्लुद्।
24 दिलेया रोमैं मिंबै त्हेर चए ङ्हबाँ क्हेमैंइ फारो म्रुँलाइ पिंल् त्हुम्। धै प्लिबाँ बिस्याँ प्लुए ल्हागिर नेरो क्हेमैंए परवा, प्हसेमैं चबर क्हेमैंल तब्मुँ।”
25 चमैंइ बिइ, “ङिए सो क्हिइ जोगेमिंइमुँ। छलेन क्हिए म्हाँया ङि फिर तरिगे। ङि फारोए केब्छैंमैं तब्मुँ।”
26 छतसि मिश्र ह्युलर्बै क्ल्ह्यो-न्हेंउँइँले खबै रोमैंए ङ्हबाँ फारोल तब्मुँ बिसि योसेफइ ठिम घ्रि बनेइ। च ठिम तिंयाँ समन् मुँ। खेगिमैंए क्ल्ह्यो मत्त्रे फारोल आत।
27 इस्राएलीमैं मिश्रर्बै गोशेन ह्युलर टिसि चर्बै क्ल्ह्योमैं ह्रोंसइ क्ल्हे लइ। चर चमैंल बिब् धों मैंब् धों तइ, धै चमैंए सन्तानमैं या ल्हें ततै ह्याइ।
28 छले याकूब मिश्रर च्युसे ङिदिं टिइ, च प्रसे प्लिच्युसे ङिदिं सोइ।
29 याकूब सिबै त्हे तमा चइ ह्रोंसए च्ह योसेफ हुइसि बिइ, “क्ह्रोंसेंन ङइ बिबै ताँ ङिंम् बिस्याँ क्हिए यो ङए प्हाँ न्होंर थेंसि ङलाइ मिश्रर पारिब् आरे बिसि ङने कसम चद्।
30 ङए खेमैं-माँमैं मुँबै क्ल्ह्योर्न ङए छगों तरिगे। छतसि ङ सियामा मिश्रउँइँले बोसि ङए खेमैं पाबै क्ल्ह्योर्न ङ पाद्।”
योसेफइ आबाने बिइ, “क्हिइ बिब् धोंलेन् ङइ लस्यो आबा।”
31 धबै याकूबइ योसेफने बिइ, “छ बिस्याँ ङइ बिब् धोंलेन् लम्,” बिसि ङने कसम चद् बिमा योसेफइ कसम चइ। झाइले याकूब ह्रोंस रोबै क्ल्ह्योर्बै क्रेगुँर पद्खु तइ।