9
पृथ्बी नेरो स्वर्गर्बै सेवा लबै तरिका
1 ओंसोंबै बाछार परमेश्वरए मिं क्वेबर ओलेबै ठिममैं नेरो परमेश्वर म्हाँदिबै ल्हागिर म्हिमैंइ बनेबै पबित्र क्ल्ह्यो घ्रि या मुँल।
2 च पबित्र क्ल्ह्योए ओंसोंबै कोठार अर्को च्योंबै कोठा या मुँल। ओंसोंबै कोठार बत्ति म्रोंबै पानस घ्रि नेरो टेबल घ्रि मुँल। च टेबलए फिर परमेश्वरए मिंर पिंबै क्हें थेंमल। च ओंसोंबै कोठाने “पबित्र क्ल्ह्यो” बिमल।
3 च न्होंर्न पर्दा क्वें लिउँइ अर्को च्योंने कोठा मुँल। च “ताँन् भन्दा पबित्र क्ल्ह्यो” मुँल।
4 च क्ल्होरी माराइ बनेबै धुप झोंबै ख्रो पिंबै क्ल्ह्यो नेरो माराइ म्होरबै बाकस मुँल। च बाकसर बाछा मैंबै ल्हागिर चिनुमैं झोंथेंल, अथवा मन्ना बिबै क्हें झोंबै माराए भाँडो नेरो स्योंम्बै हारून बिबै म्हिइ छेबै पलुवा खबै प्हरे, नेरो बाछार्बै ठिममैं प्ह्रिथेंबै युँम् प्ला ङ्हिं मुँल।
5 च बाकसए फिर छरि तबै ल्हागिर माराइ बनेबै करूबमैं मुँल। चमैंइ प्ह्या फैसि क्षमा नेरो ल्हयो लबै क्ल्ह्यो उथेंल। दिलेया चु ताँमैंए बारेर घ्रि घ्रिले ङिइ तोगो बिल् आखाँ।
6 चु ताँन् सैमैं लल् खाँबै लिउँइ ख्रो पिंबै खेगिमैं ह्रोंसइ लल् त्हुबै के लबर त्हिंइ ह्रोंसे बैरुउँइँबै पबित्र तम्बु न्होंर ह्यामल।
7 दिलेया ताँन् भन्दा न्होंर्बै पबित्र क्ल्ह्योर ख्रो पिंबै खेगि क्रथे मत्त्रे बर्षर तिब्ले ह्याल् योंमल। खेगि क्रथे चर ह्यामा कोइ या बोसि ह्याल् त्हुमल, तलेबिस्याँ ह्रोंसइ लबै पापए ल्हागिर नेरो म्हिमैंइ था आसेन्ले लबै पापए ल्हागिर को पिंल् त्हुमल।
8 बैरुउँइँबै पबित्र क्ल्ह्यो मुँरिन् समा “ताँन् भन्दा पबित्र क्ल्ह्योर” ह्याबै घ्याँ थोंरिब् आरे बिसि पबित्र प्ल्हजी उँइँमिंइमुँ।
9 चु ताँ तिंजरेबै ल्हागिर नमुना घ्रि ग। चुए मतलब भेटिमैं नेरो परमेश्वरए मिंर पिंबै र-क्युए ख्रोइ म्हिए सैंलाइ ख्रुसि चोखो लल् आखाँ।
10 तलेबिस्याँ चु सैमैं ताँन् चब्, थुँबै ल्हागिर नेरो ज्यु ख्रुसि चोखो लबै रोसमैं मत्त्रे ग। परमेश्वरउँइँले अर्को छारा ठिम आयुन् समा चु रोसमैंइ ज्युए ल्हागिर मत्त्रे के लम्।
ख्रीष्टए को
11 दिलेया ख्रीष्ट बिस्याँ युल् खाँबै ताँन् भन्दा छ्याँबै सैमैंए ख्रो पिंबै खेगि क्रथे तसि युइ। खी अझै थेब नेरो पबित्र क्ल्ह्योउँइँले ह्याइ, च क्ल्ह्यो म्हिमैंइ बनेब आङिं। धै चु ह्युलर्बै सै या आङिं।
12 र-क्युए कोजी आङिं, दिलेया म्हिमैंए पाप क्षमा लबर ख्रीष्टजी ह्रोंसए को पिंसि म्हिमैंलाइ खोंयोंइ आखाँबै छ्ह पिंबै ल्हागिर तिखेर्न ताँन् भन्दा पबित्र क्ल्ह्योर होंइ।
13 ओंसोंबै बाछार, र-क्यु, क्ल्या भाराए को नेरो क्ल्या भारालाइ ख्रोंबै मेब्रो म्हिमैंए फिर फ्रुँस्याँ चमैंए ज्यु चोखो तम् बिस्याँ।
14 ख्रीष्टए पबित्र कोजी झन् ङ्योए आछ्याँबै सैंलाइ कति छेनाले ख्रुमिंमुँ। तलेबिस्याँ खीजी परमेश्वरए प्ल्हउँइँले ह्रोंसलाइ तोइ खोट आरेबै ख्रो तसि परमेश्वरलाइ पिंवाइ। छतसि ख्रीष्टए कोजी ङ्योए सैंलाइ छेनाले चोखो लमिंबइले ङ्योइ सोगों परमेश्वरए सेवा लल् खाँम्।
15 छतसि ख्रीष्टजी छारा बाछा लमिंबइले परमेश्वरजी त्हाँबै म्हिमैंइ खीजी फैबै बाछार्बै खोंयोंन् बिलै तरिबै आशिक योंल् खाँम्। तलेबिस्याँ ओंसोंबै बाछाए न्होंर टिमा चमैंइ पाप लइ, दिलेया चमैंए पापए ल्हागिर ख्रीष्ट सिमिंसि चमैंलाइ जोगेमिंइमुँ।
16 खाबज्यै या ह्रोंसने मुँबै सै न्होर ह्रोंस सिबै लिउँइ अरूलाइ पिंदा ङ्हाँस्याँ चइ बाकसपत्र कागज प्ह्रिमिंम्। धै “च म्हि सियाना” बिसि प्रमाण तबै लिउँइ मत्त्रे म्हिमैंइ च कागतर प्ह्रिमिंबै सैमैं योंम्।
17 च बाकसपत्र कागज प्ह्रिबै म्हि आसिन् समा चए सै न्होर अरूइ आयों, प्ह्रिथेंबै म्हि सिबै लिउँइ मत्त्रे च प्ह्रिथेंबै ताँ पक्का तम्।
18 छतसि ओंसोंबै बाछा या को आबगेन् समा पक्का तल् आखाँ।
19 ठिमर बिब् धोंले लल् त्हुबै ताँमैं मोशाइ इस्राएलीमैंने बिमिंबै लिउँइ चइ क्ल्या भारा, र-बुख्या नेरो क्युए को, क्यु, ओल्ग्या पै नेरो हिसप बिबै धुँए प्हो ठिमए फिर नेरो ताँन् म्हिमैंए फिर प्राइ।
20 छले कोइ प्रामा मोशाइ बिइ, “परमेश्वरजी क्हेमैंने बिबै बाछाए को चुन् ग।”
21 छलेन परमेश्वरए मिंर ख्रो पिंबै पबित्र क्ल्ह्यो नेरो पूजा लमा ओलेबै भाँडजरे या मोशाइ च को प्राइ।
22 क्ह्रोंसेंन ठिमर बिब् धोंले कोइ ताँन् सै चोखो लम्। को आबगेन् समा पापए क्षमा तलन् आखाँ।
ख्रीष्टजी को बगेसि ख्रो पिंबइले ङ्योए पाप क्षमा तइ
23 स्वर्गर्बै नकल लबै सैमैंलाइमि छले पबित्र लल् त्हुम् बिस्याँ, स्वर्गर्बै सैमैंलाइ पबित्र लबै ल्हागिर झन् बेल्ले पबित्र सैए ख्रो चैदिइ।
24 ओंसोंबै पबित्र क्ल्ह्यो क्ह्रोंसेंन्बै पबित्र क्ल्ह्योए नकल मुँल। दिलेया ख्रीष्ट म्हिमैंइ बनेबै पबित्र क्ल्ह्योर आहों, खी स्वर्ग न्होंर्न होंइ। छले खी ङ्योए ल्हागिर परमेश्वरए उँइँर टिइमुँ।
25 यहूदी ख्रो पिंबै खेगि क्रथे पृथ्बीर्बै “ताँन् भन्दा पबित्र क्ल्ह्योर” सालर तिला खेदोए को बोसि ह्यामल। दिलेया येशू ख्रीष्ट बिस्याँ खीए ज्यु ख्रो पिंबर घरि घरि ह्याल् आत्हु।
26 ख्रो पिंबर ह्याब्रे लल् त्हुस्याँम् खी ह्युल बनेबै त्हे ओंनोंन् ल्हें खे दुःख नोब्रें लल् त्हुमल। दिलेया म्हिमैंए पाप क्षमा लमिंबर खोंयोंइ बिलैए ल्हागिर ख्रीष्ट तिब्ले मत्त्रे खीए ज्युलाइ ख्रों पिंबर चु जुग नुबै त्हेर युइमुँ।
27 ताँन् म्हिमैं तिब्ले सिल् त्हुम्, धै सिबै लिउँइ परमेश्वरजी लबै इन्साफर राल् त्हुम्।
28 छलेन ल्हें म्हिमैंए पाप त्होमिंबर ख्रीष्ट या तिब्ले ख्रो तसि सिमिंइ। दिलेया खी धबै युब्मुँ। च त्हेर खी म्हिमैंए पाप त्होमिंबै ल्हागिर आङिं, दिलेया सैं तोंदै खीलाइ ह्रेरिब्मैंलाइ जोगेमिंबर युब्मुँ।