2
योनाए प्राथना
1 छले योनाइ ताँगाए फो न्होंउँइँले ह्रोंसए याहवेह परमेश्वरने प्राथना लसि
2 छ बिइ:
“थेबै दु:ख तसि ङइ याहवेहने ग्वार ह्रिइ,
धै खीजी ङने ज्वाफ पिंइ;
क्रोंर्बै गैरो क्ल्ह्योउँइँले ङइ ग्वार ह्रिइ,
धै क्हिजी ङए कै छेनाले थेमिंइ।
3 मा ङ्युँइए म्हाँजोर क्हिजी ङलाइ भ्योंवाइ,
धै नाँ बाढिइ ङ कारर्ग्यु लइ;
क्हिजी बनेबै छालमैं नेरो क्युए भेल्गमैं
ङलाइ हुवाइ।
4 झाइले ङइ बिइ, क्हिजी ङलाइ ल्हावाइ;
दिलेया क्हिए पबित्र मन्दिरउँइ ङ धबै ङ्ह्योम्।
5 ङए सो किंब् बिसि च क्युमैं ङए फिर खइ;
क्युए गैरु ङ खागु मुँल;
क्युर्बै लेउमैं ङए क्र तिगोंन् बेरदिल।
6 ङम् क्यु न्होंर्बै कोंमैंए तेंर्न फेनेल।
चर क्रोंइ ङलाइ त्होंल् आपिं;
दिलेया ओ ङए याहवेह परमेश्वर,
क्हिजी ङ क्रोंउँइँले तेइरि पखइ।
7 छले ङ सिबिन् छेमा,
ङइ याहवेहलाइ मैंइ,
ङइ लबै प्राथना क्हि ङाँर फेनेइ,
क्हिए पबित्र मन्दिर न्होंर फेनेइ।
8 केर आफेबै स्युलिबै सैमैंर सैं पिंबै म्हिमैंइ
परमेश्वरउँइँले योंबै दयाम्हाँया योंल् आङिं।
9 दिलेया ङ बिस्याँ धन्यबाद पिंबै कै तेदै
क्हिए मिंर ख्रो पिंब्मुँ;
धै ङइ लबै भकल ङ पूरा लब्मुँ।
याहवेहजीन म्हिमैं जोगेमिंम्!”
10 झाइले याहेवेहजी ताँगाने योनालाइ तेवाद् बिमा ताँगाइ योनालाइ क्यु आरेबै क्ल्ह्योर रुइवाइ।