3
येशूजी निकोदेमसने ताँ लब
1 फरिसीमैं न्होंर निकोदेमस मिं मुँबै म्हि घ्रि मुँल। च यहूदी चिबनाँब्मैं न्होंर्बै म्हि घ्रि मुँल।
2 च म्हुँइँसर येशू ङाँर खसि खीने बिइ, “ओ गुरु, क्हि परमेश्वरउँइँले युबै लोमिंबै म्हि ग बिसि ङिइ सेइमुँ, तलेबिस्याँ परमेश्वरजी आल्होमिंस्याँ क्हिइ लब् धों तबै चु औदिबै चिनुमैं खाबज्यै लल् आखाँ।”
3 येशूजी चने बिइ, “क्ह्रोंसेंन ङ क्हिने बिमुँ, छारा तसि आफिइ बिस्याँ खाबै या परमेश्वरए ग्याल्स म्रोंल् आखाँ।”
4 निकोदेमसइ खीने बिइ, “म्हि खिब् तल् खाँबै लिउँइ धबै खैले फिल् खाँमुँ? च आमाए फोर धबै होंसि फिल् खाँम्मा?”
5 येशूजी बिइ, “क्ह्रोंसेंन ङ क्हिने बिमुँ, क्यु नेरो परमेश्वरए प्ल्हउँइँले आफिइ बिस्याँ खाबै या परमेश्वरए ग्याल्सर होंल् आखाँ।
6 ज्युउँइँले फिब ज्युन् ग, धै पबित्र प्ल्हउँइँले फिब प्ल्हन् ग।
7 ङइ क्हिने ‘छारा तसि फिल् त्हुमुँ’ बिमा अचम्मा आङ्हाँन्।
8 खैं खनि ह्यादा ङ्हाँमुँ छाइन ह्याम्। क्हिइ खैंए कै थेमुँ, दिलेया खैं खनिउँइँले खसि खनि ह्याम् च क्हिइ आसे। छलेन परमेश्वरए प्ल्हउँइँले फिबै म्हि या छाबन् तम्।”
9 निकोदेमसइ खीने “चु खैले तल् खाँमुँ?” बिसि ङ्योएमा
10 येशूजी चने बिइ, “क्हि इस्राएलीमैंए गुरु तसेया च्हग ताँ या आक्हो वा?
11 क्ह्रोंसेंन ङ क्हिने बिमुँ, ङिइ था सेबै ताँए बारेर बिम्, धै ङिइ म्रोंबै ताँए ग्वाइ पिंम्, दिलेया क्हेमैंइ ङिए ताँ आक्वें।
12 ङइ क्हेमैंने पृथ्बीर तबै ताँए बारेर बिमा क्हेमैंइ आक्वें बिस्याँ, झन् स्वर्गर्बै ताँ बिइ बिस्याँ खैले क्वेंल् खाँमुँ?
13 स्वर्गउँइँले युबै म्हिए च्ह बाहेक अरू खाबै या स्वर्गर आह्याइमुँ।
14 “मोशाइ म्हि आटिबै क्ल्ह्योर पितलए प्हुरि खैले त्होर च्योसि क्वेल,
15 छलेन ङ म्हिए च्हए फिर बिश्वास लब्मैंइ खोंयोंइ आनुबै छ्ह योंरिगे बिसि ङलाज्यै या क्वेल् त्हुब्मुँ।
16 तलेबिस्याँ खीए च्हए फिर बिश्वास लब्मैं खाबै या नास आतरिगे, बरु खोंयोंइ आनुबै छ्ह योंरिगे बिसि परमेश्वरजी ह्युलर्बै म्हिमैंने ल्हें म्हाँया लसि खीए घ्रि दे मुँबै च्ह पिंइ।
17 तलेबिस्याँ ह्युलर्बै म्हिमैं दोषि ठर्दिबर परमेश्वरजी ह्रोंसए च्हलाइ कुलब आङिं, दिलेया चमैंलाइ जोगेबर कुल्मिंइ।
18 “खीए फिर बिश्वास लब्मैं दोषि आठर्दि, दिलेया बिश्वास आलब्मैं बिस्याँ ओंसोंन् दोषि ठर्दिल् खाँइमुँ, तलेबिस्याँ परमेश्वरए घ्रिदे मुँबै च्हए फिर चमैंइ बिश्वास आलइँमुँ।
19 ताँ चुन् ग: चारबै ह्वे ह्युलर युइमुँ, दिलेया म्हिमैंए के दुष्ट मुँबइले चमैंइ चारबै ह्वे भन्दा मिछु खैबन् खोइ।
20 तलेबिस्याँ दुष्ट के लब्मैंइ चारबै ह्वेलाइ आखो, तलेबिस्याँ खेंमैंइ लबै के म्हिमैंइ म्रोंवाब्मुँ बिसि चमैं चारबै ह्वेर आखा।
21 दिलेया क्ह्रोंसेंन्बै छ्ह थोबै म्हिमैं चारबै ह्वेर खम्। धै चमैंइ लबै केमैं परमेश्वरजी बिब् धोंले लब् ग बिसि छेनले म्रोंल् खाँम्।”
येशू नेरो बप्तिस्मा पिंबै यूहन्ना
22 च लिउँइ येशू नेरो खीए चेलामैं यहूदीया ह्युलर ह्याइ, धै चर दे त्हिंइ समा चमैंने टिमा म्हिमैं बप्तिस्मा पिंइ।
23 यूहन्नाज्यै या सालीम नाँसए रेर्बै एनोन बिबै क्ल्ह्योर म्हिमैं बप्तिस्मा पिंमल, तलेबिस्याँ चर क्यु ल्हें मुँल। छतसि चर ल्हें म्हि खसि बप्तिस्मा किंमल।
24 च त्हे समा यूहन्ना झेलर आफेल।
25 च त्हेर्न यूहन्नाए चेलामैं यहूदी घ्रिने क्युइ ख्रुसि चोखो तबै बारेर छलफल तइ।
26 चमैं यूहन्ना ङाँर खसि बिइ, “गुरु! यर्दन स्यों क्योंजा क्हिने मुँबै म्हिए बारेर ओंसों क्हिइ ग्वाइ पिंल, तिंजोरोम् खीजीन् म्हिमैं क्युर प्ल्हुँसि बप्तिस्मा पिंरिइमुँ। धै ताँन् म्हिमैं खी ङाँर्न ह्यारिइमुँ।”
27 यूहन्नाइ बिइ, “परमेश्वरजी स्वर्गउँइँले आपिंइ बिस्याँ म्हिमैंइ तोइ सै योंल् आखाँ।
28 ‘परमेश्वरजी कुल्मिंबै म्रुँ ख्रीष्ट ङ आङिं, दिलेया खी भन्दा ङ ओंसों कुल्मिंब् ग।’ बिसि ङइ बिबै ताँ क्हेमैंइ ओंसोंन् थेइमुँ
29 खाब्ने बालु प्ह्रेंस्यो मुँ, चन् प्ह्रेंरो ग। प्ह्रेंरोए थु प्ह्रेंरो ङाँर रासि खीए कै थेसि बेल्ले सैं तोंम्। छतसि ङ बेल्ले सैं तोंइँमुँ।
30 खी थेब् तदै ह्याल् त्हुम्, ङ बिस्याँ च्योंब तदै ह्याल् त्हुम्।
31 “स्वर्गउँइँले युबै म्हि ताँन् भन्दा थेब मुँ। पृथ्बीर फिब्मैं पृथ्बीर्बैन् ग, छतसि पृथ्बीर्बै ताँ पोंम्। दिलेया स्वर्गउँइँले युबै म्हि ताँन् भन्दा थेब मुँ।
32 खीजी तो म्रोंइँमुँ, तो थेइमुँ, चन् बिम्, दिलेया खीजी बिबै ताँ खाबज्यै आक्वें।
33 दिलेया खीए ताँ क्वेंब्मैंइ परमेश्वर क्ह्रोंसेंन्बै मुँ बिसि प्रमाण पिंम्।
34 परमेश्वरजी कुल्मिंबै म्हिइ परमेश्वरए ताँ पोंम्, तलेबिस्याँ परमेश्वरजी खीए पबित्र प्ल्हइ प्लिमिंम्।
35 परमेश्वर आबाजी खीए च्हलाइ म्हाँया लम्, छतसि तोन्दोंरि सै खीए योर्न पिंइमुँ।
36 परमेश्वरए च्हए फिर बिश्वास लब्मैंने खोंयोंइ आनुबै छ्ह मुँ। परमेश्वरए च्हइ बिबै ताँ आङिंब्मैंइ खोंयोंइ आनुबै छ्ह योंल् आखाँ, दिलेया परमेश्वरए दण्ड खोंयोंइ बिलै चए फिर तरिम्।”