9
येशूजी फिब् ओंनोंबै कन म्हि म्रोंल् लमिंब
1 येशू च क्ल्ह्योउँइँले ह्यारिमा फिब् ओंनोंबै कन तबै म्हि घ्रि म्रोंइ।
2 छाब् म्रोंसि खीए चेलामैंइ खीने, “गुरु, चु म्हि फिब् ओंनोंबै तले कन तगे? खाबइ पाप लगे? चुइ उ चुए आबा-आमाइ पाप लगे?” बिसि ङ्योएमा।
3 येशूजी बिइ, “चुज्यै पाप आल, चुए आबा-आमाज्यै पाप आल। चु कनउँइँले परमेश्वरए थेबै केमैं म्हिमैंइ म्रोंरिगे बिसि चु म्हि कन तब् ग।
4 ङ कुल्मिंबै आबाजी ल्हैदिबै केमैं ङ्योइ त्हिंयाँ मुँमन् लल् त्हुम्। म्हुँइँस तयासेरो खाबज्यै के लल् आखाँ।
5 ङ ह्युलर मुँरिन् समा ङ ह्युलर्बै चारबै ह्वे ग।”
6 चु ताँ बिसि येशूजी सर थुइसि स च्येंसि च कनए मिर फोमिंइ।
7 धै खीजी चने बिइ, “सिलोआम ङ्ह्योखोर ह्यासि क्हिए मि ख्रुद्।” (सिलोआमए अर्थ कुल्मिंब् ग।) छबिमा च ह्यासि ख्रुइ, झाइले मि म्रोंल् खाँब् तसि एखइ।
8 चए ङ्हेब् ट्हुब्मैं नेरो ओंसोंन् घ्याँजरे ह्रिसि टिरिब् म्रोंब्मैंइ “ह्रिसि टिबै म्हि चुन् आङिं वा?” बिइ।
9 को-कोइ “ओं, चु च म्हिन् ग,” बिइ। कोइ “आङिं, चुम् च धों ब्योंब् म्रोंइमुँ,” बिइ।
दिलेया च म्हिइ “ङ चन् ग,” बिइ।
10 झाइले “क्हिए मि खैले म्रोंल् खाँब् तइ?” बिसि चमैंइ ङ्योएमा।
11 चइ बिइ, “येशू बिबै म्हिजी स च्येंसि ङए मिर फोमिंइ, धै ‘सिलोआमर ह्यासि ख्रुद्’ बिइ। ङ ह्यासि ख्रुबै तोंदोंन् ङए मि म्रोंल् खाँब् तइ।”
12 “येशू खनिर मुँ दि?” बिसि चमैंइ ङ्योएमा चइ “तुसि ङइ आसे,” बिइ।
फरिसीमैंइ चु ताँ था सेल् म्हैब
13 ओंसों मि आम्रोंबै म्हिलाइ चमैंइ फरिसीमैं ङाँर पखइ।
14 येशूजी स च्येंसि च म्हिए मि म्रोंल् लमिंबै त्हिंइ प्रिबै त्हिंइ मुँल।
15 छतसि “क्हि खैले मि म्रोंल् खाँब् तइ?” बिसि फरिसीमैंइ चने ङ्योएमा।
चइ बिइ, “खीजी ङए मिर स चेंसि फोमिंइ। झाइले ङइ ख्रुमा ङए मि म्रोंल् खाँब् तयाइ।”
16 फरिसीमैं न्होंर्बै को-कोइ बिइ, “च परमेश्वरउँइँले युबै म्हि आङिं, तलेबिस्याँ चइ प्रिबै त्हिंइ आम्हाँदि।”
दिलेया अरूमैंइ बिइ, “चु पापि म्हि मुँस्याँ, चुइ छाबै औदिबै चिनुमैं खैले लल् खाँइ?”
चु ताँइ लमा चमैं न्होंरि आक्ह्रि।
17 “चइ क्हिए मि म्रोंल् लमिंसेरो तारे चए बारेर क्हिइ तो बिम्दि?” बिसि चमैंइ च म्हिने ङ्योएमा
चइ बिइ, “खी अगमबक्ता ग।”
18 यहूदी चिबनाँब्मैंइ च कन मुँल धै तोगो म्रोंल् खाँब् तइ बिबै ताँ आक्वें। छतसि चमैंइ चए आबा-आमा हुइसि ङ्योएइ।
19 “चु क्हेमैंए च्ह वा? चु फिब् ओंनोंबै कन मुँल् वा? धै तोगो चु खैले मि म्रोंल् खाँब् तइ?”
20 छबिमा चए आबा-आमाइ बिइ, “अँ, चु ङिए च्ह ग, चु फिब् ओंनोंन् कन मुँल।
21 दिलेया चुइ खैले मि म्रोंल् खाँब् तइ बिसि ङिइ आसे। धै चुए मि खाबइ म्रोंल् लमिंइ, चै या ङिइ आसे। चु सैं चियाल् खाँइमुँ छतसि चुनेन् ङ्योएद्। ह्रोंसए बारेर च ह्रोंसइन पोंब्मुँ।”
22 “येशून् परमेश्वरजी कुल्मिंबै म्रुँ ख्रीष्ट ग बिबै म्हिलाइ च्हों धिंउँइँले तेवाल त्हुम्,” बिसि यहूदीमैंइ ओंसों ओंनोंन् मत लल। छतसि चए आबा-आमा यहूदी चिबनाँब्मैं म्रोंसि ङ्हिंसि
23 “चुए उमेर योल् खाँइमुँ। चनेन् ङ्योएद्,” बिइ।
24 छतमा चमैंइ च मि म्रोंल् खाबै म्हि धबै हुइसि बिइ, “परमेश्वरए मिं थेब् लद्। चु म्हि पापि ग बिसि ङिइ सेइमुँ।”
25 चइ बिइ, “खी पापि म्हि ङिंब् उ आङिं, ङइ आसे। ताँ घ्रि मत्त्रे ङइ सेइमुँ। ङ कन मुँल, तोगो म्रोंल् खाँब् तइमुँ।”
26 “चइ क्हि तो लइ? चइ क्हिए मि खैले म्रोंल् लमिंइ?” बिसि चमैंइ चने ङ्योएमा।
27 चइ चमैंने बिइ, “ङइ तलन् बिल् खाँइ, दिलेया क्हेमैंइ आथे। धबै तोगो तले थेदा ङ्हाँइ? क्हेमैं या खीए चेला तदा ङ्हाँइमुँ उ तो?”
28 चमैंइ चलाइ हौदिदै बिइ, “क्हि ग चए चेला तइ! ङिम् आङिं! ङिम् मोशाए चेलामैं ग।
29 मोशाने परमेश्वर पोंमल बिसि ङिइ सेइमुँ, दिलेया चु म्हि खाब् जा? खनिर्बै जा? बिसि ङिइ था आसे।”
30 च म्हिइ चमैंने बिइ, “खैतबै औदिबै ताँ! खी खनिउँइँले खइ बिसि क्हेमैंइ आसे, दिलेया ङए मि खीजीन् म्रोंन् लमिंइ।
31 परमेश्वरजी पापिमैं ताँ आथे, दिलेया परमेश्वरने ङ्हिंसि खीए मान लब्मैं नेरो खीजी बिब् धोंले के लब्मैंए ताँ परमेश्वरजी थेम् बिसि ङ्योइ सेइमुँ।
32 ह्युल बनेब् ओंनोंन् फिब् ओंनोंबै आम्रोंबै म्हिए मि म्रोंल् लमिंबै ताँ खाबज्यै आथेइमुँ!
33 छतसि चु म्हि परमेश्वरउँइँले आयुस्याँ खीजी तोइ लल् आखाँमल।”
34 छबिमा “क्हिम् पापर्न फिल! छाबै म्हिज्यै ङि लोमिंल् म्हैम्मा?” बिसि चमैंइ चलाइ च्हों धिंउँइँले बैरु तेवाइ।
सैं न्होंर कन तब्मैंए ताँ
35 चमैंइ च म्हि बैरु तेवाइ बिब येशूजी थेइ, छतसि येशूजी चने त्होसि “क्हि ‘म्हिए च्हए’ फिर बिश्वास लम्मा?” बिसि ङ्योएइ।
36 च म्हिइ बिइ, “प्रभु, खी खाब् जा? ङ खीए फिर बिश्वास लब्मुँ।”
37 येशूजी चने बिइ, “क्हिइ खीलाइ म्रोंइमुँ, तोगो क्हिने पोंरिब खीन् ग।”
38 झाइले चइ “प्रभु, ङ बिश्वास लम्,” बिसि येशूलाइ फ्योइ।
39 झाइले येशूजी बिइ, “आम्रोंब्मैंइ म्रोंरिगे धै म्रोंब्मैंइ म्रोंल् आखाँरिगे बिसि ङ निसाफ लबर ह्युलर युइ।”
40 चु ताँ थेसि येशूए ङाँर मुँबै फरिसीमैंए न्होंर्बै को-कोइ खीने “ङि या कनमैं रो वा?” बिसि ङ्योएमा।
41 येशूजी चमैंने बिइ, “क्हेमैं कनमैं मुँस्याँम् पापए दोषि आतमल, दिलेया क्हेमैंइ ‘ङि म्रोंल् खाँम्’ बिमुँ, छतसि क्हेमैंए पाप क्हेमैंनेन् तरिम्।”