14
येशू फरिसीए धिंर ह्याब
1 तिगें प्रिबै त्हिंइर येशू फरिसी घ्रिए धिंर चब् चबर ह्याइ। च म्हि फरिसीमैं न्होंर्बै चिब मुँल। “येशूजी तो-तो लमगे?” बिसि म्हिमैंइ छैं लरिल।
2 च त्हेर्न यो प्हले रोंबै म्हि घ्रि येशूए उँइँर मुँल।
3 “प्रिबै त्हिंइर नबै म्हिमैं सल् लब ठिक मुँ उ आरे? बिसि येशूजी धर्मगुरुमैं नेरो फरिसीमैंने ङ्योएइ।”
4 दिलेया चमैंइ तोइ बिल् आखाँ। येशूजी च यो प्हले रोंसि नबै म्हिए फिर यो थेंसि चलाइ सल् लमिंसि कुल्मिंइ।
5 च लिउँइ येशूजी चमैंने बिइ, “क्हेमैं न्होंरि खबलैया प्रिबै त्हिंइर क्ल्या खोल्सर पायस्याँ क्हेमैंइ खोल्सउँइँले आते रो वा?”
6 चमैंइ चु ताँरै या तोइ ज्वाफ पिंल् आखाँ।
7 च फरिसीए धिंर खबै प्ह्रेंमैंइ चिब्मैं क्हुँबै छ्याँ-छ्याँबै क्ल्ह्यो त्हाँरिब् म्रोंसि येशूजी चु अहान् बिइ,
8 “क्हेमैं ब्ह्या भत्यारर ह्यामा छ्याँबै क्ल्ह्योर आक्हुँन्, तलेबिस्याँ क्हि भन्दा थेबै म्हि च न्हिम्तोर खल् खाँम्।
9 न्हिम्तो लबै म्हिइ क्हिने ‘चु क्ल्ह्योर चु म्हि क्हुँल् पिंन् बिस्याँ’ क्हि फापिन् तसि ताँन् भन्दा च्योंब्मैंए क्ल्ह्योर क्हुँल् त्हुब्मुँ।
10 छतसि खाबज्यै क्हिलाइ न्हिम्तो लइ बिस्याँ ताँन् भन्दा च्योंब्मैं टिबै क्ल्ह्योर ह्यासि टिद्। झाइले न्हिम्तो लबै म्हि खसि क्हिने ‘ओहो, ङए थु, चु छ्याँबै क्ल्ह्योर क्हुँन्’ बिब्मुँ, च त्हेर क्हिने बालु मुँबै प्ह्रेंमैंए उँइँर क्हिइ मान योंब्मुँ।
11 तलेबिस्याँ ह्रोंसन् थेब् प्हैंबै म्हिमैं परमेश्वरजी च्योंब लवाब्मुँ, दिलेया ह्रोंसन् च्योंने तसि टिब्मैंलाइ परमेश्वरजी थेब लमिंब्मुँ।”
12 छलेन खीलाइ न्हिम्तोर हुइबै म्हिलाज्यै या येशूजी बिइ, “क्हिइ भत्यार लमा ह्रोंसए थुमैं, ह्रजे-म्हजे, आघें-अलि ह्रोंसए म्हिमैं नेरो प्ल्होबै ङ्हेब-ट्हुब्मैं न्हिम्तो आलद्, तलेबिस्याँ चमैंज्यै क्हिलाइ न्हिम्तोर हुइब्मुँ, धै खि फोब् धोंन् तब्मुँ।
13 बरु भत्यार लमा ङ्हाँदुमैं, डुँडामैं, खोडमैं नेरो कनमैं हुइद्।
14 छ लस्याँ क्हिइ आशिक योंब्मुँ। तलेबिस्याँ क्हिए खि चमैंइ फोल् आखाँ। दिलेया परमेश्वरजी बिब म्हाँदिबै म्हिमैं सिसि धबै सोगों तमा आयोंब्मैंलाइ पिंबै सैमैंए खि परमेश्वरजी क्हि पिंब्मुँ।”
थेबै भत्यारए अहान्
(मत्ती २२:१-१०)
15 चु ताँ थेसि येशूने बालु चबर टिब्मैं न्होंर्बै म्हि घ्रिइ खीने बिइ, “परमेश्वरए ग्याल्सर्बै भत्यार चल् योंब्मैं ङ्हो सब्मैं ग!”
16 येशूजी चने अहान् घ्रि बिइ, “म्हि घ्रिइ बेल्ले थेबै भत्यार लसि ल्हें म्हिमैं हुइ।
17 भत्यार चबै त्हेर च म्हिइ न्हिम्तो योंब्मैंने ‘भत्यार तयार तइ तारे चबर खो’ बिसि हुइबर कुलइ।
18 “दिलेया चमैं ताँनइ निउ घ्रि-घ्रि लबर होंइ। ओंसों त्होबै म्हिइ ‘ङलम् म्रों किंइमुँ छतसि ङ च म्रों ङ्ह्योबर ह्याल् त्हुम्। माफ लद् ओ ङ खल् आखाँ,’ बिइ।
19 झाइले अर्कोइ ‘ङइ क्ल्या ङ्हगुर किंइमुँ, छतसि ङ क्ल्या क्योब ङ्ह्योबर ह्याबि छेइमुँ। माफ लद् ओ ङ खल् आखाँ,’ बिइ।
20 छलेन अर्कोज्यै या ‘ङल भर्खर ब्ह्या लइमुँ, छतसि ङ खल् आयों,’ बिइ।
21 “झाइले के लबै म्हि एखसि ताँन् ताँ ह्रोंसए क्ल्हेने बिइ, छतमा धिं क्ल्हे ह्रिस खसि के लबै म्हिने बिइ, ‘तारे युन्ले सहरर ह्याद् धै सहरर्बै घ्याँए रेजरेबै ङ्हाँदुमैं, डुँडामैं, खोडमैं नेरो कनमैं हुइसि पउ,’ बिमा के लबै म्हि धबै हुइबर ह्याइ।
22 “के लबै म्हि एखसि बिइ, ‘ओ चिब, क्हिइ हुइ पउ बिबै म्हिमैं ङइ हुइ पखइ। दिलेया भत्यारर टिबै क्ल्ह्यो अझै मुँ।’
23 “धबै धिं क्ल्हेइ के लबै म्हिने बिइ, ‘ङए धिं प्लिंबै ल्हागिर सहरर्बै घ्याँए रेजरे खन्तोंदोंन् ह्यासि चर्बै ताँन् म्हिमैं कर ल्हैदिसि पखो।
24 छेनाले थेद्! ओंसोंबै न्हिम्तो योंब्मैं न्होंरि खाबज्यै या ङए भत्यारर्बै चबै सैमैं कति लिंब मुँगे बिसि म्ह्योंल् योंरिब् आरे।’ ”
येशूए चेलामैंइ फोल् त्हुबै नों
(मत्ती १०:३७,३८)
25 म्हि हुल येशूने बालु ह्यारिमा खीजी लिंउँइ तोसि चमैंने बिइ,
26 “ङए लिलि खब्मैंइ ह्रोंसए आबा, आमा, प्ह्रेंस्यो, प्हसेमैं, अलि-अङाँमैं नेरो ह्रोंसए ज्यु या तो धोंइ आङ्हाँ बिस्याँ च ङए चेला तल् आखाँ।
27 खाबइ ह्रोंसए क्रूस नोसि ङए लिलि आप्र च ङए चेला तल् आखाँ।
28 “क्हेमैं न्होंरि खाबज्यै या धिं बनेदा ङ्हाँस्याँ ‘धिं लबै ल्हागिर खर्ज कति ल्हैदिम्? ङने मुँबै मुइइ योम् उ आयो?’ बिसि ओंसोंन् चइ बिचार आल रो वा?
29 बिचार आलस्याँ चइ जग मत्त्रे झोंसि धिं प्हें सैल् आखाँस्याँ म्रोंब्मैं ताँनइ क्हिलाइ प्ह्रब्मुँ।
30 ‘चु म्हिइ धिं बनेबर होंइ दिलेया धिं प्हें सैल् आखाँ बिसि चमैंइ,’ बिब्मुँ।
31 “झाइले अर्को ताँ: म्रुँ घ्रिइ अर्को म्रुँने नेबर ह्यामा ‘ङए हजार च्यु फौजइ ङ्हिस्यु हजार फौजलाइ ट्होल् खाँम् उ आखाँ बिसि चइ ओंसोंन् आमैं रो वा?’
32 ह्रोंसने बालु भों आरेस्याँ अर्को म्रुँ ह्रेंगोन् मुँमा चइ क्ह्रिबै ल्हागिर म्हि कुलब्मुँ।
33 छतसि क्हेमैंए न्होंरि खाबइ ह्रोंसने मुँबै तोन्दोंरि सै आवथें च ङए चेला तल् आखाँ।
आङ्हाँबै चज
(मत्ती ५:१३; मर्कूस ९:५०)
34 “चज छ्याँबै सै ग, दिलेया चजए स्वाद म्हयाइ बिस्याँ तो सैइ धबै चए स्वाद खल् लब?
35 च म्हिमैंए ल्हागिर केर आफे सए ल्हागिरै या मला आत। छतसि च स्वाद आरेबै चज म्हिमैंइ भ्योंवाम्।
“थेबै न्ह मुँब्मैंइ थेरिगे।”