5
येशूजी मोंइ स्याबै म्हि सल् लमिंब
(मत्ती ८:२८-३४; लूका ८:२६-३९)
1 झाइले खेंमैं तालए क्योंजा गिरासिनी बिबै क्ल्ह्योर फेनेइ।
2 चर येशू डुँङ्गाउँइँले बैरु त्होंबै तोदोंन् मोंइ स्याबै म्हि घ्रि छगोंउँइँले खरिब त्होइ।
3 च छगोंजरे टिमल। खाबज्यै चलाइ सँउँलिइ फैथेंल् आखाँमल।
4 तलेबिस्याँ ल्हें खे च म्हि सँउँलिइ फैथेंमल, दिलेया चइ सँउँलि टोंवामल। खाबज्यै या चलाइ क्हाल् आखाँमल।
5 त्हिंयाँ, म्हुँइँसा च म्हि छगों नेरो कोंजरे ओरदै ह्रोंसलाइन युँमाइ रुएदै प्रमल।
6 छले प्ररिमा चइ ह्रेंगोउँइँले येशू खरिब् म्रोंमा न्हेह्यासि खीलाइ फ्योइ।
7-8 येशूजी चने “ओ मों, चु म्हिउँइँले त्होंइ खो” बिमा
च म्हिइ थेबै कैले बिइ, “ओ ताँन् भन्दा थेबै परमेश्वरए च्ह येशू, क्हिजी ङ तो लल् म्हैल? ङ क्हिने यो छ्युँ लमुँ, ङ दुःख आपिंन्।”
9 झाइले येशूजी चने “क्हिए मिं तो जा?” बिसि ङ्योएमा
चइ येशूने बिइ, “ङए मिं फौज ग तलेबिस्याँ ङि ल्हेन् मुँ।”
10 झाइले स्यागि म्होंगिमैं च क्ल्ह्योउँइँले बैरु आल्हामिंन् बिसि च म्हिइ येशूने यो छ्युँ लइ।
11 चर्बै पखजरे तिलिए थेबै बगाल रेंरिल।
12 “ङि च तिलिमैंए ङाँर ह्याल् पिंन्, ङि चमैं न्होंर होंम्,” बिसि च मोंमैंइ येशूने यो छ्युँ लइ।
13 झाइले येशूजी चमैंने ह्याद् बिमा मोंमैं च म्हिउँइँले त्होंसि तिलिमैंए न्होंर होंबै तोदोंन् हजार ङ्हिंदे तिलिमैं प्रोउँइँले तेयासि तालर प्ल्हुँह्यासि सियाइ।
14 छतमा च तिलि छबै प्ह्रोंछैंमैं नाँसउँइ न्हेह्यासि नाँस नाँसजरे छ छ तइ बिइ। झाइले तो तगे बिसि ताँन् म्हिमैं चर ङ्ह्योबर खइ।
15 चमैं येशू ङाँर खमा मोंइ स्याबै म्हि सैं चिसि क्वें खिसि टिरिब् म्रोंइ। छाब् म्रोंसि चमैं या ङ्हिंइ।
16 झाइले च ताँमैं म्रोंबै म्हिमैंइ चर खब्मैंने मोंइ स्याबै म्हि नेरो च तिलिमैंए बारेर ताँन् ताँ बिमिंइ।
17 चु ताँ थेसि “चु क्ल्ह्योउँइँले ह्यामिंन्,” बिसि च म्हिमैंइ येशूने यो छ्युँ लइ।
18 येशू ह्याबै ल्हागिर डुँङ्गा क्रेबर होंमा मोंइ स्यासि सबै म्हिइ येशूने बालु ह्याम् बिसि यो छ्युँ लइ।
19 दिलेया खीजी च म्हिलाइ खल् आपिं। बरु “क्हिए धिंर ह्यासि परमेश्वरजी क्हिए फिर ल्हयो खसि क्हिए फिर कति थेबै के लमिंइ बिब क्हिए म्हिमैंने बिमिंन् बिसि खीजी चने,” बिइ।
20 छ बिबै तोंदोंन् च ह्यासि येशूजी खीए फिर थेबै के लमिंइ बिसि डेकापोलिस ह्युलर बिप्रबर होंइ। चए ताँ थेसि ताँन् म्हिमैं प्लेटोयाइ।
याइरसए च्हमि नेरो येशूए क्वें छुइबै च्हमिरि
(मत्ती ९:१८-२६; लूका ८:४०-५६)
21 च लिउँइ येशू डुङ्गा क्रेसि तालए चोंजा एखमा चर म्हिए हुल खीए कारर्ग्यु तखइ।
22 चर्बै च्हों धिंर्बै चिब्मैं न्होंर्बै याइरस बिबै म्हि घ्रि चर खइ, धै येशू म्रोंसि खीए प्हलेर फ्योसि
23 “ङए च्हमि च्योंब्स्यो नसि सार तइमुँ। छतसि च ससि सोरिगे बिसि क्हि ङए धिंर खसि चए फिर यो थेंमिंन्,” बिसि चइ यो छ्युँ लइ।
24 छबिमा येशू च म्हिने ह्याइ। म्हिए हुल या येशूए लिलिन् ह्याइ, खीए कारर्ग्यु ल्हें म्हि तबइले म्हिमैं खीने थुरमल।
25 चर च्युसे ङ्हिं बर्ष ओंसों ओनोंन् को त्हसि नरिबै च्हमिरि घ्रि मुँल।
26 ल्हें बैद्यमैंने मैं ललेया च सल् आखाँल। चने मुँबै मुइ ताँन् नुयाल, नब बिस्याँ आसल, बरु झन् सार ततै ह्याल।
27 येशूजी नब् छब्मैं सल् लमिंम् रो बिबै ताँ चइ ओंसोंन् थेल, छतसि म्हिए हुल न्होंर होंसि चइ लिउँइँले खसि येशूए क्वेंर छुइ।
28 तलेबिस्याँ “येशूए क्वें मत्त्रे छुइल् योंलेया ङ क्ह्रोंसेंन्ले सयामल,” बिसि चइ सैं न्होंर मैंल।
29 छले येशूए क्वें छुइबै तोंदोंन् च च्हमिरिए को त्हब टियाइ। छतमा ह्रोंस सयाब चइ था सेइ।
30 च तोदोंन् येशूजी ह्रोंसउँइँले शक्ति त्होंह्याब था सेसि म्हिए हुलउँइ तोसि “ङए क्वें खाबइ छुइ?” बिसि ङ्योएइ।
31 च्हमा येशूए चेलामैंइ खीने बिइ, “च्हौ ल्हें म्हि ह्रोंसने थुरब सेनासेन्, ‘ङलाइ खाबइ छुइ’ बिसि ङ्योएब् वा?”
32 दिलेया येशूजी खी छुइबै म्हि खाब् मुँगे बिसि छाइ छुइ ङ्ह्योबर होंइ।
33 च च्हमिरि सब था सेसि ङ्हिंसि त्हारदै येशूए ओंसों च्हि तुँसि ह्रोंसने तबै ताँन् ताँमैं येशूने बिइ।
34 झाइले येशूजी च च्हमिरिने बिइ, “ओ नानि, क्हिए बिश्वासइ क्हि सयाइमुँ। आङ्हिंनले ह्याद्, तारे क्हिए नब सयाइ।”
35 येशू छले पोंरिमा याइरसए धिंउँइँले खबै म्हिमैंइ याइरसने बिइ, “क्हिए च्हमि सियाइ। तारे गुरुलाइ तले दुःख पिंब?”
36 दिलेया चमैंइ लबै ताँमैं थेसेया आथेब् धों लसि येशूजी याइरसने बिइ, “आङ्हिंन्, तोइ आङ्हाँन्ले बिश्वास लद्।”
37 च्हौ बिसि खीजी पत्रुस, याकूब नेरो याकूबए अलि यूहन्ना बाहेक् अरू खाबलाज्यै खीने बालु ह्याल् आपिं।
38 खेंमैं याइरसए धिंर फेखमा चर म्हिमैं शोकइ खैला तोला तसि क्रोरिब खीजी म्रोंल।
39 छ तब् म्रोंसि खीजी चमैंने बिइ, “क्हेमैं तले क्रोल? तले खैला तोला तरिल? चु कोलो आसिइमुँ, चु न्हरु च्हुरिइब् ग।”
40 दिलेया खीए ताँ थेसि चमैंइ बिल्लि लसि निस्युइ। छतसि येशूजी चर मुँब्मैं ताँन् बैरु कुलसि च कोलोए आबा-आमा नेरो खीने मुँबै चेलामैं सों बोसि कोलो मुँबै क्ल्ह्योर ह्याइ।
41 झाइले कोलोए यो क्हासि खीजी बिइ, “तालिता कूमि!” छ बिब, “ओ नानि, ङइ क्हिने बिमुँ, रेद्!” बिब् ग।
42 खीजी छ बिबै तोदोंन् च कोलो रेसि प्रबर होंइ। च कोलो च्युसे ङ्हिदिंर्बै मुँल। छ तब् म्रोंसि चर मुँबै म्हिमैं प्लेटोयाइ।
43 येशूजी चमैंने “चु ताँ खैलसेया खाब्ने या आबिद्,” बिइ। झाइले “चु कोलो चबै सैमैं पिंन्,” बिसि चर्बै म्हिमैंने ल्हैदिइ।