11
येशू नेरो बप्तिस्मा पिंबै यूहन्ना
(लूका ७:१८-३५)
1 येशूजी ह्रोंसए च्युसे ङ्हिं चेलामैंने लोदा सैंदा लल् खाँबै लिउँइ चमैंए सहरजरे म्हिमैंलाइ लोमिंबर नेरो परमेश्वरउँइँले खबै सैं तोंबै ताँ बिबर ह्याइ।
2 बप्तिस्मा पिंबै यूहन्नाइ येशू ख्रीष्टजी लबै केमैंए बारेर थेसि ह्रोंसए चेलामैं येशू ङाँर ताँमैं ङ्योएबर कुल्मिंइ।
3 चमैं ह्यासि “ङिए गुरु यूहन्नाइ बिब् धोंले युबै म्हि क्हिन् उ, ङिइ अर्को म्हि अझै प्रेंल् त्हुमुँ?” बिसि येशूने ङ्योएइ।
4 येशूजी चमैंने बिइ, “क्हेमैंइ थेबै ताँमैं नेरो म्रोंबै केमैं यूहन्ना ङाँर ह्यासि बिद्।
5 कनमैंइ मि म्रोंइमुँ, डुँड्मैं प्रइमुँ, कोर खब्मैं सइमुँ, न्ह आथेब्मैंइ न्ह थेइमुँ, सियाब्मैं सोइमुँ धै ङ्हाँदुमैंने परमेश्वरउँइँले खबै सैं तोंबै ताँ बिमिंइमुँ।
6 चु ताँ या बिद्, ङए ताँ क्वेंसि तोइ संका आलबै म्हिइ आशिक योंब्मुँ।”
7 झाइले यूहन्नाए चेलामैं ह्याबै लिउँइ येशूजी यूहन्नाए बारेर चर खबै म्हिए हुलने बिइ, “क्हेमैं क्यु आयोंबै क्ल्ह्योर तो ङ्ह्योबर ह्याल? खैंइ लारिबै म्वो ङ्ह्योबर ह्याल् वा?
8 आङिं बिस्याँ, तो ङ्ह्योबर ह्याल? छ्याँबै क्वें खिबै म्हि ङ्ह्योबर ह्याल् वा? छ्याँबै क्वें खिबै म्हिम् म्रुँमैंए दरबारर टिम्।
9 बित्ति, क्हेमैं क्ह्रोंसेंन् तो ङ्ह्योबर ह्याल? अगमबक्ता ङ्ह्योबर ह्याल् वा? ओं, ङ क्ह्रोंसेंन क्हेमैंने बिमुँ, अगमबक्ता भन्दा थेबै म्हि घ्रि क्हेमैंइ म्रोंइमुँ,
10 तलेबिस्याँ चु यूहन्नाए बारेर परमेश्वरए छ्वेर छले प्ह्रिइमुँ,
‘ङ्ह्योद्, क्हिए घ्याँ तयार लमिंरिगे बिसि
क्हि भन्दा ओंसों ङइ ङए स्यार्बो कुल्मिंम्।’
11 क्ह्रोंसेंन ङ क्हेमैंने बिमुँ, च्हमिरिउँइँले फिब्मैं न्होंर बप्तिस्मा पिंबै यूहन्ना भन्दा थेबै म्हि अरू खाबै आतइमुँ। दिलेया स्वर्गर्बै ग्याल्सर ताँन् भन्दा च्योंब तब्मैं यूहन्ना भन्दा थेब तमुँ।
12 यूहन्नाइ सैं तोंबै ताँ बिमिंबै त्हेउँइँले तोगो समा स्वर्गर्बै ग्याल्स युन्ले ओंसों ह्यारिइमुँ। बिरोध लब्मैं बिस्याँ खैच्हिजिले च ग्याल्स ट्होल् म्हैम्।
13 तलेबिस्याँ बप्तिस्मा पिंबै यूहन्नाए पलो समा स्योंम्बै अगमबक्तामैं नेरो मोशाइ प्ह्रिबै ठिमर स्वर्गर्बै ग्याल्सए बारेर बिल।
14 क्हेमैंइ क्वेंम् बिस्याँ, युल् त्हुबै एलिया यूहन्नान् ग।
15 न्ह मुँब्मैंइ थेरिगे।”
16 “ङइ चु पुस्तार्बै म्हिमैं तो सैने च्हैंले? चुमैंम् बजारर क्ल्योंबै कोलोमैं धों तब् ग। चमैंइ थुमैं हुइसि छ बिसि ताँ लम्,
17 ‘ङिइ क्हेमैंए ल्हागिर मुरलि ह्रामिंइ, दिलेया क्हेमैं आसे।
ङि न्हुँ लसि क्रोमा क्हेमैं खाबै या न्हुँ आल।’
18 छलेन बप्तिस्मा पिंबै यूहन्नाइ परमेश्वरए मिंर बर्त टिब्रें लमल, चइ प्हा या आथुँमल। दिलेया म्हिमैंइ ‘चलाइ मोंइ स्याइमुँ!’ बिमल।
19 म्हिए च्ह युसि चब् थुँब् लमा ‘ङ्ह्योत्ति, च चब्लाँ, प्हा को, बालि रेब्मैं नेरो अरू पापिमैंए थु!’ बिसि म्हिमैंइ बिमल। दिलेया परमेश्वरए बुद्धिए केमैं म्रोंसिन् क्ह्रोसेंन्ले बुद्धि छ्याँब् मुँना बिबै ताँ क्हेमैंइ सेल् खाँम्।”
येशूए फिर बिश्वास आलबै नाँसथेंमैं
(लूका १०:१३-१५)
20 येशूजी ल्हें औदिबै केमैं लबै नाँसजरेबै म्हिमैंइ खेंमैंइ लबै पाप पिसि परमेश्वरउँइ सैं आए। छतसि खीजी चमैंने धिक्कार क्हेमैं बिदै।
21 “ओ खोराजीनथेंमैं नेरो बेथसेदाथेंमैं! धिक्कार मुँ क्हेमैं, तलेबिस्याँ क्हेमैं ङाँर लब् धोंबै औदिबै केमैं टुरोस नेरो सिदोन सहरजरे लस्याँ चमैंइ स्योंमन् ह्रेंगा खिसि मेब्ब्रो फोसि खेंमैंइ लबै आछ्याँबै केमैं पिसि परमेश्वरउँइ सैं एमल।
22 ङ क्हेमैंने बिमुँ, परमेश्वरजी निसाफ लबै त्हिंइर च टुरोस नेरो सिदोनथेमैंइ भन्दा क्हेमैंइ थेबै सजैं योंब्मुँ
23 ओ कफर्नहुमथेंमैं, क्हेमैं स्वर्गर्न फेनेम् बिल् वा? आङिं! क्हेमैं नर्गर्न भ्योंवाब्मुँ। तलेबिस्याँ क्हेमैं ङाँर लब् धोंबै औदिबै केमैं सदोम सहरर लस्याँ च सहर नास आतल्ले तोगो समा तरिमल।
24 छतसि ङ क्हेमैंने बिमुँ, परमेश्वरजी निसाफ लबै त्हिंइर सदोमथेंमैंइ भन्दा क्हेमैंइ ल्हें सजैं योंब्मुँ।”
नारब्मैंलाइ भों न्हल् पिंब
(लूका १०:२१-२२)
25 च त्हेर्न येशूजी प्राथना लसि “ओ आबा, स्वर्ग नेरो पृथ्बीर्बै क्ल्हे, ङ क्हिलाइ धन्यबाद पिंम्, तलेबिस्याँ ज्ञान बुद्धि मुँ बिसि ह्रब्-सेब् प्हैंब्मैंउँइँले क्हिजी चु ताँमैं लोथेंइ। दिलेया कोलोमैं धों तबै तोइ आसेबै म्हिमैंलाइ क्हिजी चु ताँ क्होल् लमिंइ।
26 ओ आबा, क्हिजी छान् लब छ्याँब ङ्हाँइ।”
27 येशूजी धबै बिइ, “ङए आबाजी तोन्दोंरि सै ङने पिंइमुँ। परमेश्वर आबाजी बाहेक अरू खाबज्यै परमेश्वरए च्हलाइ ङो आसे। छलेन च्ह बाहेक खाबज्यै परमेश्वर आबालाइ ङो आसे। ‘परमेश्वर आबा ङो सेरिगे’ बिसि च्हजी तेंमिंब्मैंइ मत्त्रे परमेश्वर आबा ङो सेमुँ।
28 “ओ ताँन् ल्हिबै ते नोसि नारब्मैं, ङ ङाँर खो, ङइ क्हेमैंलाइ भों न्हल् पिंब्मुँ।
29 ङए खर्गु नोद्, धै ङने बालु लोद्, तलेबिस्याँ ङ ताँनए फिर ल्हयो खम्, धै ङ थेब् आप्हैं। छतसि क्हेमैंए सैंर छिं ङ्हाँल् योंब्मुँ।
30 तलेबिस्याँ ङइ नोल् पिंबै खर्गु कर योंब नेरो ङइ नोल् पिंबै ते योंब्मुँ।”