16
येशूने औदिबै के उँइँन् बिब
(मर्कूस ८:११-१३; लूका १२:५४-५६)
1 को-कोइ फरिसीमैं नेरो सदुकीमैं येशू ङाँर खसि खीए जाँच लबर “क्हि परमेश्वरउँइँले युब् ग बिस्याँ स्वर्गर्बै औदिबै चिनु घ्रि लसि उँइँन्,” बिइ।
2 छबिमा येशूजी चमैंने बिइ, “त्हिंयाँ लिबर होंमा क्हेमैंइ ‘आहा, तिंयाँम् मु ओल्ग्या तइमुँ प्हँन्हाँ नाँ आयु बिम्।’
3 झाइले न्हाँगर मु ओल्ग्या तसि न्हाँम्स्योइ हुवास्याँ क्हेमैंइ ‘तिंयाँम् नाँ खैं तलै बिम्।’ मु ङ्ह्योसि क्हेमैंइ त्हिंइ खैब तम् बिसि सेल् खाँम्, दिलेया खबर होंबै चिनुए अर्थ क्होल् आखाँ।
4 तिंजोरोबै दुष्ट नेरो ब्यभिचारि म्हिमैंइ चिनु म्हैम्, दिलेया योनाए चिनु बाहेक् अरू चिनुमैं चमैंने उँइँरिब् आरे।” च्हौ बिसि खी चमैं वाथेंसि ह्याइ।
क्हेंर झोंबै प्लेढाए अहान्
(मर्कूस ८:१४-२१)
5 चेलामैं तालए क्योंजा फेनेइ, दिलेया चमैंइ क्हें बोब म्लेयान।
6 येशूजी चमैंने बिइ, “छेनाले मैंन्, क्हेमैं फरिसी नेरो सदुकीमैंए क्हेंर झोंबै प्लेढाउँइँले जोगेसि टिद्।”
7 दिलेया चेलामैंइ येशूए ताँ आक्होसि “ङ्योइ क्हें पखब म्लेयासि प्रभुजी छ बिलै,” बिसि ह्रों-ह्रोंसन् ताँ लबर होंइ।
8 चमैंइ तो ताँ लसिन् मुँ बिब येशूजी सेसि चमैंने बिइ, “ओ, ङए फिर च्युगुदे या बिश्वास आलब्मैं! क्हेमैंने क्हें आरे बिसि तले ह्रों-ह्रोंसन् ताँ लरिल?
9 क्हेमैंइ अझै आक्होइमुँ वा? हजार ङ्ह म्हिमैंलाइ क्हें ङ्हबो चुमिंब म्लेह्याइ वा? क्हेमैंइ कति ट्हलो क्हें लुँठे खुल?
10 झाइले क्हें ङिबोइ हजार प्लि म्हिमैं चल् पिंसि क्हेमैंइ कति ट्हलो क्हें लुँठे खुल?
11 ङइ क्हेमैंने चबै क्हेंए बारेर ताँ लब आङिं बिब क्हेमैंइ तले आक्होल? ङइ फरिसी नेरो सदुकीमैंए क्हेंर झोंबै प्लेढाउँइँले जोगेसि टिद् बिब् ग।”
12 क्हेंर झोंबै प्लेढाने आङिं, फरिसी नेरो सदुकीमैंइ लोमिंबै ताँउँइँले जोगेसि टिद् बिब् मुँना बिसि बल्ल चेलामैंइ येशूजी बिबै ताँ क्होइ।
पत्रुसइ येशूए बारेर बिबै ताँ
(मर्कूस ८:२७-३०; लूका ९:१८-२१)
13 येशू कैसरिया फिलिप्पी बिबै सहरर फेखबै लिउँइ खीजी खीए चेलामैंने “म्हिमैंइ म्हिए च्हने खाब् बिमुँ?” बिसि ङ्योएइ।
14 “कोइ बप्तिस्मा पिंबै यूहन्ना ग बिमुँ, कोइ स्योंम्बै एलिया ग बिमुँ, कोइ यर्मिया अथवा स्योंम्बै अगमबक्तामैं न्होंर्बै घ्रि ग बिम्,” बिसि चमैंइ बिइ।
15 झाइले येशूजी चमैंने “क्हेमैंइ ङलाइ खाब् बिम्दि?” बिसि ङ्योएमा
16 सिमोन पत्रुसइ बिइ, “क्हिम् खोंयोंन् बिलै तरिबै परमेश्वरए च्ह, खीजी कुल्मिंबै जोगेमिंबै म्रुँ ख्रीष्ट ग।”
17 येशूजी चने बिइ, “ओ, योनाए च्ह सिमोन, क्ह्रोसेंन क्हिइ आशिक योंइमुँ! तलेबिस्याँ छाबै ताँ क्हिइ म्हिउँइँले था सेब आङिं, दिलेया स्वर्गर मुँबै ङए आबाजी क्हिलाइ सेल् पिंब् ग।
18 छतसि ङइ क्हिलाइ पत्रुस बिम्। ङए चर्च ङ च पाराए फिर बनेब्मुँ, धै नर्गर्बै म्रामैंइ च चर्चए फिर ट्होल् खाँरिब् आरे।
19 ङइ स्वर्गर्बै ग्याल्सए साँजुमैं क्हिए योर पिंब्मुँ। क्हिइ पृथ्बीर तो फैब्मुँ च स्वर्गर फैब्मुँ, धै क्हिइ पृथ्बीर तो प्ल्हब्मुँ च स्वर्गरै या प्ल्हब्मुँ।”
20 झाइले खीजी चेलामैंने “ङ ख्रीष्ट ग बिसि खाबलाज्यै या आबिद् ओ,” बिसि ल्हैदिइ।
येशूजी खी सिल् त्हुम् बिसि ओंसोंन् बिमिंब
(मर्कूस ८:३१—९:१; लूका ९:२२-२७)
21 च त्हे ओंनोंन् खीजी ह्रोंसए चेलामैंने ह्रोंसइ नोल् त्हुबै दुःखए बारेर बिबर होंइ। “ङ यरूशलेम ह्याल् त्हुम्, धै चिबनाँब्मैं, ख्रो पिंबै खेगि चिब्मैं नेरो शास्त्रिमैंउँइँले ल्हें दुःख योसि सिल् त्हुम्। दिलेया सोंरोंर ङ सोगों तसि खब्मुँ।”
22 छबिमा पत्रुसइ येशूलाइ तिराइ बोसि “परमेश्वरजी क्हिए फिरि खोंयोंइ छ तल् पिंरिब् आरे प्रभु,” बिसि हौदिबर होंइ।
23 दिलेया खीजी पत्रुसने बिइ, “ओ दुष्ट, ङ ङाँइँले स्योह्याद्। क्हि ङ प्रल् त्हुबै घ्याँरि पुजु तइमुँ, तलेबिस्याँ क्हिए चु ताँ म्हिए ताँ ग, परमेश्वरउँइँले खब आङिं।”
24 झाइले येशूजी खीए चेलामैंने बिइ, “ङए लिलि खदा ङ्हाँम्मैं, ह्रोंसए ज्यु म्हाँया आलल्ले दुःख नोसि ङए लिलि खल् त्हुम्।
25 तलेबिस्याँ ह्रोंसलाइ जोगेल् म्हैब्मैं नास तब्मुँ। दिलेया ङए ल्हागिर ह्रोंसए ज्यु पिब्मैंइ खोंयोंइ आखाँबै छ्ह योंब्मुँ।
26 क्हेमैंइ ताँन् ह्युल योंनाबिलेया ह्रोंस नास तयाइ बिस्याँ तो फायदा तम् रो? म्हिइ ह्रोंसए सोए साटोरि तो सै पिंल् खामुँ?
27 तलेबिस्याँ म्हिए च्ह खीए आबाए मान योंसि स्वर्गदूतमैंने युमा म्हिमैंइ खेबै के लइमुँ छाबन् नों खीजी पिंब्मुँ।
28 क्ह्रोंसेंन ङ क्हेमैंने बिमुँ, चुर मुँब्मैं न्होंरि कति म्हिइ म्हिए च्ह खीए ग्याल्सर युरिब आम्रोंन् समा सिरिब् आरे।”