21
येशू यरूशलेम ह्यामा चर्बै म्हिमैंइ बेल्ले मान लब
(मर्कूस ११:१-११; लूका १९:२८-४०; यूहन्ना १२:१२-१९)
1 झाइले खेंमैं यरूशलेमए चेंदो जैतून कोंए बेथफागे बिबै नाँसर फेखमा येशूजी चेलामैं ङ्हिंने छ बिसि कुल्मिंइ,
2 “क्हेमैं च ओंसोंबै नाँसर ह्याद्। चर फेनेबै तोदोंन् गधाए आमा नेरो प्हसे च्युँइँथेंब क्हेमैंइ स्याब्मुँ। चमैं पिसि ङ ङाँर पखो।
3 खाबज्यै क्हेमैंने तोइ बिस्याँ, ‘प्रभुए ल्हागिरि चुमैं चैदिइमुँ’ बिद्। छ बिबै तोदोंन् च म्हिइ चमैं कुल्मिंब्मुँ।”
4 स्योंम्बै अगमबक्ताइ बिबै ताँ पूरा तबर छ तब् ग।
5 “सियोनए च्हमिने छ बिमिंन्,
तारे क्हिए म्रुँ क्हि ङाँर खइन मुँ,
थेब् आप्हैंन्ले गधाए फिर क्रेसि खइन मुँ,
खी गधा झजए फिर क्रेसि खइमुँ,” बिसि बिल।
6 चेलामैं ह्यासि येशूजी बिब् धोंन् लइ।
7 चमैंइ गधा नेरो गधाए झज येशू ङाँर पखसि ह्रोंसए क्वेंमैं प्लिसि चमैंए फिर तिमिंइ। धै येशू चए फिर क्हुँइ।
8 खी छले खब् म्रोंसि चर्बै म्हि हुलइ ह्रोंसए क्वेंमैं प्लिसि घ्याँर तिमिंइ। अरू म्हिमैंइ सिं धुँए हाँगमैं थोसि घ्याँर तिमिंइ।
9 खीए लिलि ओंसों प्रब्मैंइ छले ओरल,
“दाऊदए च्हए जय जय तरिगे!
याहवेहए मिंर खबै म्हिला आशिक तरिगे!
धाँसे थेबै परमेश्वरए जय जय तरिगे!”
10 छले येशू यरूशलेमर फेनेमा सहर तिगोंन् खैला-बैला तइ। धै “चु म्हि खाब् जा?” बिसि म्हिमैंइ ङ्योएबर होंइ।
11 येशूने मुँबै हुलइ बिइ, “चु गालील ह्युलर्बै नासरतउँइँले खबै अगमबक्ता येशू ग।”
येशू मन्दिरर ह्याब
(मर्कूस ११:१५-१९; लूका १९:४५-४८; यूहन्ना २:१३-२२)
12 झाइले येशू परमेश्वरए मन्दिरर ह्यासि चर किंबा-चुँब लबै म्हिमैं ताँन् बैरु ल्हामिंइ। धै मुइ त्हेब्मैंए टेबलमैं नेरो तोंगु चुँब्मैंए क्हुँबै सैमैं प्लिंवाँइ।
13 येशूजी चमैंलाइ हौदिसि बिइ, “ ‘ङए धिं प्राथना लबै धिं बिब्मुँ,’ बिसि परमेश्वरए छ्वेर प्ह्रिइमुँ। दिलेया क्हेमैंइमि चु ह्योमैं टिबै क्ल्ह्यो ग लना।”
14 च लिउँइ कनमैं नेरो स्यालेमैं मन्दिरर खी ङाँर खइ, धै खीजी चमैं सल् लमिंइ।
15 झाइले ख्रो पिंबै खेगि चिब्मैं नेरो शास्त्रिमैंइ येशूजी लबै औदिबै केमैं म्रोंइ, धै “दाऊदए च्हए जय जय तरिगे!” बिसि कोलोमैंइ मन्दिरर ओररिब् चमैंइ थेइ। छतमा चमैं बेल्ले ह्रिस खसि
16 “चु कोलोमैंइ बिरिबै ताँ क्हिइ थेइमुँ वा?” बिसि येशूने ङ्योएइ।
येशूजी बिइ, “थेइमुँ, तले आथेब!
‘च्योंबै कोलोमैं नेरो ओलाँ कोलोमैंए सुँउँइँले या
परमेश्वरजी खीए मिं क्वेबर ल्हैदिइमुँ,’ बिसि परमेश्वरए छ्वेर प्ह्रिबै ताँ क्हेमैंइ खोंयोंइ आखेइमुँ वा?”
17 च्हौ बिसि चमैंलाइ वाथेंसि खी सहरउँइँले त्होंसि बेथानियार ह्यासि चर्न बास टिइ।
येशूजी रो आरोबै तुँबु धुँलाइ सराप पिंब
(मर्कूस ११:१२-१४,२०-२४)
18 प्हँन्हाँग्धों न्हाँक्कर्न सहरउँइ एखमा येशू फो ख्रेंइ।
19 घ्याँए रेर खीजी तुँबुए धुँ घ्रि म्रोंसि च धुँए ङाँर खमा च धुँर प्हो मत्त्रे म्रोंइ रो आयों। छतमा खीजी च धुँने बिइ, “तारे पिरु क्हिने खोंयोंइ रोमैं आरोरिगे।” छ बिबै तोदोंन् च धुँ ङ्योंलोंयाइ।
20 छाब् म्रोंसि चेलामैं प्लेटोयासि “च्हौ युनन् चु तुँबुए धुँ खैले ङ्योंलोंयागे?” बिइ।
21 येशूजी चमैंने बिइ, “क्ह्रोंसेंन ङ क्हेमैंने बिमुँ, क्हेमैंइ तोइ संका आलनाले क्वेंस्याँ चु तुँबुए धुँलाइ ङइ लब् धोंले क्हेमैंज्यै लल् खाँम्। च्हौ मत्त्रे आङिं, क्हेमैंइ चु कोंलाज्यै या ‘स्युसि मा ङ्युँइर तेयाद्’ बिलेया छान् तब्मुँ।
22 क्हेमैंइ परमेश्वरए फिर बिश्वास लसि प्राथनानर तो सै ह्रिलेया योंब्मुँ।”
येशूए हगर संका लब
(मर्कूस ११:२७-३३; लूका २०:१-८)
23 च लिउँइ येशू मन्दिरर ह्यासि ताँमैं लोमिंबर होंमा ख्रो पिंबै खेगि चिब्मैं नेरो यहूदी चिबनाँब्मैं खी ङाँर खसि “क्हिइ खाबै हगउँइँले चु केमैं लल? खाबइ चु केमैं लबै हग पिंइ?” बिसि ङ्योएइ।
24 येशूजी चमैंने बिइ, “ङज्यैया ओंसों क्हेमैंने ताँ घ्रि ङ्योएम्। क्हेमैंइ ज्वाफ पिंइबिस्याँ, खाबइ हग पिंसि ङइ चु के लम् बिसि क्हेमैंने बिस्यो।
25 लु बित्ति! यूहन्नाइ बप्तिस्मा पिंबै हग खनिउँइँले योंइ? परमेश्वरगउँइँले योंइ उ म्हिमैंउँइँले योंइ?”
छबिमा चमैं ह्रों-ह्रोंसन्, “स्वर्गउँइँले बिले बिस्याँ ‘छ बिस्याँ यूहन्नाइ बिबै ताँ क्हेमैंइ तले आक्वेंल?’ बिसि चइ बिब्मुँ बिदै छलफल लबर होंइ।
26 दिलेया ‘म्हिमैंउँइँले’ बिले बिस्याँ म्हिमैंइ तोइ लम् उ बिसि ङ्हिंल् त्हुइमुँ। तलेबिस्याँ यूहन्ना अगमबक्ता ग बिसि ताँन् म्हिमैंइ म्हाँदिम्।”
27 छतमा चमैंइ येशूने “तुसि, खनिउँइँले योंगे ङिइ आसे,” बिइ।
छबिमा येशूजी चमैंने बिइ, “छ बिस्याँ ङज्यै या खनिउँइँले चु केमैं लबै हग योंइ बिसि क्हेमैंने आबि।”
च्ह ङ्हिंए अहान्
28 येशूजी चमैंने धबै बिइ, “चु ताँए बारेर क्हेमैं खै ङ्हाँम्? म्हि घ्रिला च्ह ङ्हिं मुँल। आबा च्ह थेब ङाँर ह्यासि ‘ओ ठागु, तिंयाँ क्हि म्रोंर ह्यासि के लद्,’ बिमा
29 ठागुइ ‘ङ आह्या,’ बिइ। दिलेया लिउँइ चए सैं एसि म्रोंर के लबर ह्याइ।
30 “आबाइ च्ह च्योंब्ने या छान् बिइ। च्योंबइ ‘तम् तम्, ङ ह्यास्यो,’ बिइ दिलेया च आह्या।
31 “चु च्ह ङ्हिंर आबाइ बिबै ताँ खाबइ ङिंइ? ठागुइ उ च्योंबइ?”
चमैंइ “ठागुइ,” बिइ।
झाइले येशूजी चमैंने बिइ, “क्ह्रोंसेंन ङ क्हेमैंने बिमुँ, रोमी म्रुँए ल्हागिर बालि रेब्मैं नेरो फ्यालुस्यो के लब्मैं क्हेमैं भन्दा ओंसों परमेश्वरए ग्याल्सर होंब्मुँ।
32 तलेबिस्याँ यूहन्ना छ्याँबै घ्याँ उँइँबर क्हेमैं ङाँर युँइ, दिलेया क्हेमैंइ चए फिर बिश्वास आल। दिलेया रोमी म्रुँए ल्हागिर बालि रेब्मैं नेरो फ्यालुस्योमैंइ चए फिर बिश्वास लइ। चु म्रोंसेया क्हेमैंइ पापउँइँले सैं आए, धै चए फिर बिश्वास आल।”
म्रोंए क्ल्हे नेरो आधे लब्मैंए अहान्
(मर्कूस १२:१-१२; लूका २०:९-१९)
33 येशूजी चमैंने बिइ, “धबै अर्को ताँ थेद्। म्हि घ्रिइ अँगुरए खेति लसि कारग्युले बार थोइ। अँगुर म्हाबै कोल नेरो अँगुर रुँबै ल्हागिर म्हि टिबै क्ल्ह्यो या बनेइ। झाइले च म्रों आधे पिथेंसि च ह्रेंगोर्बै ह्युलउँइ ह्याइ।
34 “लिउँइ अँगुर खुबै त्हे तमा चइ के लबै म्हिमैं ह्रोंसए भाउ किंबर आधे लब्मैं ङाँर कुल्मिंइ।
35 दिलेया च आधे लब्मैंइ च के लबै म्हिमैं क्हासि घ्रिलाइ धोंइ, घ्रि सैवाइ, धै अर्कोलाइ युँमाइ ल्हिइ।
36 धबै च म्रोंए क्ल्हेइ ओंसोंबै भन्दा ल्हें के लबै म्हिमैं कुल्मिंइ। दिलेया च आधे लब्मैंइ ओंसों खब्मैंए फिर खै लल छान् लइ।
37 “लिउँइ च म्रोंए क्ल्हेइ ‘ङए च्हलाइमि मान ललै’ ङ्हाँसि खीए च्ह चमैं ङाँर कुल्मिंइ।
38 दिलेया च आधे लब्मैंइ क्ल्हेए च्ह खरिब् म्रोंमा ‘झन्, चम् हग योंल् त्हुबै च्ह ग। चलाज्यै या सैवाले! चलाइ सैवास्याँ चए ताँन् सै न्होर ङ्योलन् तब्मुँ,’ बिसि मत लइ।
39 झाइले चमैंइ चलाज्यै या क्हासि म्रोंउँइँले बैरु बोसि सैवाइ।
40 “छतमा तारे च म्रोंए क्ल्हे खसि आधे लब्मैंलाइ तो ललै?”
41 चमैंइ खीने बिइ, “क्ल्हे खसि च दुष्ट म्हिमैं सैवाब्मुँ। धै रा-रोमैं खुबै त्हेर ह्रोंसइ योंल् त्हुबै भाउ पिंबै म्हिमैंनेन् आधे पिंब्मुँ।”
42 येशूजी चमैंने बिइ, “परमेश्वरए छ्वेर प्ह्रिबै चु ताँ क्हेमैंइ आखेइमुँ वा?
‘धिं लब्मैंइ केर आफे बिसि भ्योंवाबै युँमान्
धाँसे तेंर्बै क्र युँमा तइमुँ।
चु परमेश्वरउँइँले तब् ग।
ङ्योए उँइँर चु के आचम्मबै मुँ।’
43 छतसि ङ क्हेमैंने बिमुँ, परमेश्वरए ग्याल्सर टिबै हग तारे परमेश्वरजी क्हेमैंउँइँले प्हेंसि रोमैं रोल् खाँबै अरू ह्रेंलाइ पिंब्मुँ।”
44 [चु युँमाए फिर क्हुरिह्याब्मैं नास तयाब्मुँ, धै खाबै फिर च युँमा तेयामुँ चलाइ प्लेवाब्मुँ।]
45 ख्रो पिंबै खेगि चिब्मैं नेरो फरिसीमैंइ खीजी बिबै अहान् थेसि “खीजी चु अहान् ङ्योए बारेर्न बिब् ग,” बिसि चमैंइ क्होइ।
46 छतसि चमैंइ येशूलाइ क्हाल् म्हैइ, दिलेया चमैं म्हिए हुल म्रोंसि ङ्हिंइ। तलेबिस्याँ म्हिमैंइ “येशू अगमबक्ता ग,” बिसि मैंमल।