3
प्रभु युबै त्हिंइ
1 ओ ङए खोबै थुमैं, ङइ धबै क्हेमैंलाइ चु प्ह्रिछ्या प्ह्रिइमुँ। क्हेमैंए सैंर खोंयोंन् बिलै छ्याँबै ताँ खरिगे बिसि क्हेमैंइ म्लेयाबै ताँमैं धबै मैंल् लमिंबर ङइ चु प्ह्रिछ्या ङ्हिंना-ङ्हिंनर्न क्हेमैंए सैंर भों खल् लमिंबै ताँमैं प्ह्रिइमुँ।
2 स्योंम्बै पबित्र अगमबक्तामैंइ पोंबै अगमबाणिए ताँमैं नेरो क्हेमैं ङाँर खबै कुल्मिंबै चेला चिब्मैंइ बिबै ताँमैं क्हेमैंइ मैंरिगे बिब ङए सैं मुँ।
3 क्हेमैंइ सेल् त्हुबै ताँ: तारे खबै त्हिंइ जरे ह्रोंसए सैंर तो मैंमुँ, चन् लप्रब्मैं त्होंब्मुँ। क्हेमैंए बिल्लि लदै चमैंइ छ बिब्मुँ,
4 “येशूजी खी धबै युम् बिसि बाछा फैल। तिंयाँ समा तले आयु? ङ्योए खेमैं-माँमैं सियाल् खाँइ, झाइले ह्युलर मुँबै सैमैं या ह्युल् बनेब् ओंनोंबै खैब मुँल तिंयाँ या छाबन् मुँ!” बिसि चमैंइ बिब्मुँ।
5 मु नेरो ह्युल स्योंमन् परमेश्वरजी बिबै ताँजी बनेब् ग बिसि सेना सेन् आसेब् धोंले चमैंइ च ताँए वास्ता आल। खीजी चु ह्युल क्युउँइँले फ्रेमिंसि क्यु आरेबै स बनेइ।
6 धै च त्हेर्बै ह्युल नाँ बाडिए क्युइ प्ल्हुँवासि नास तयाइ।
7 दिलेया परमेश्वरए च ताँउँइँलेन् तिंजरोबै मु नेरो ह्युल लिउँइ मिइ ख्रोंसि नास लबै ल्हागिर तोगो समा नास आतल्ले खीजी थेंइमुँ। छले खीलाइ आम्हाँदिब्मैंलाइ दोषि ठर्दिसि निसाफ लबै त्हिंइर मु नेरो ह्युलै या खीजी नास लवाब्मुँ।
तयार तसि टिल् त्हुम्
8 ओ ङइ खोबै थुमैं, ताँ घ्रि खोंयोंइ आम्लेद्। प्रभुए ल्हागिर तिगैं हजार साल धों तम्, झाइले हजार साल तिगैं धों तम्।
9 को-कोइए सैंर “प्रभु युबर क्हैल् लइ,” ङ्हाँलेया प्रभुजी खीजी फैबै बाछा पूरा लबर क्हैल् आल। खाबै या नास आतरिगे बरु ह्रोंसए पापउँइँले सैं एसि खिउँइ तोरिगे बिसि प्रभुजी क्हेमैंलाइ सैदिसि पैंरिइमुँ।
10 दिलेया खाबज्यै आसेल्ले ह्यो खब् धोंले प्रभु खैलसे युब्मुँ। च त्हिंइर मु थेबै कैले म्हयाब्मुँ, मुर्बै ताँन् सैमैं मिइ ख्रोंसि नास तयाब्मुँ, धै चु ह्युल नेरो ह्युलर्बै सैमैं ताँन् म्हयाब्मुँ।
11 छले तोन्दोंरि नास तयाम् बिब् सेसेरो क्हेमैं खैबै म्हि तल् त्हुम्? परमेश्वरजी बिब ङिंदै छ्याँबै केमैं लसि क्हेमैं छेनाले छ्ह थोसि
12 परमेश्वरए निसाफ लबै त्हिंइलाइ पैंरिल् त्हुम्। झाइले प्रभु येशू युबै त्हिंइ युनन तरिगे बिसि बेल्ले सैं झोंसि खीए के लद्। च त्हिंइर मुर मि लुँब्मुँ, धै चर मुँबै सैमैं ताँन् मिए राबाइ बिलिदिवाब्मुँ।
13 दिलेया ङ्यो बिस्याँ खीजी ङ्योने बाछा फैसि पिंम् बिबै छारा स्वर्ग नेरो छारा ह्युलन् ह्रेरिब्मुँ। चर खीजी ठिक ठर्दिमिंब्मैं टिल् योंब्मुँ।
14 छतसि ओ ङए थुमैं, च त्हिंइ खोंयों तब् ङ्हे बिसि क्हेमैं खीए घ्याँ ङ्ह्योब्मैं ग। छतसि प्रभुए उँइँर तोइ खोट नेरो छ्याब् आरेब् तसि ताँनने क्ह्रिसि टिबै भों लद्।
15 झाइले ङ्योए प्रभुजी म्हिमैंए पापमैं सैदिमा ङ्यो जोगेबै मौका पिंइमुँ बिसि सैंर मैंन्। चु ताँ ङ्योए खोबै आघें पावलज्यै या परमेश्वरजी पिंबै बुद्धिजी चु ताँमैं खीए प्ह्रिछ्यार क्हेमैंए ल्हागिर प्ह्रिइमुँ।
16 पावलइ चु ताँए बारेर खीए ताँन् प्ह्रिछ्यारि छले प्ह्रिइमुँ। प्ह्रिछ्यार मुँबै को-कोइ ताँमैं क्होब गारो मुँ। छतसि दे आखेब्मैं नेरो क्होबै सैं आलब्मैंइ चु ताँलाज्यै अरू छ्वेर्बै ताँमैं धोंलेन् लिग्याँने उग्याँ लवाम्। धै चमैंइ ह्रोंसए फिर्न नास पखम्।
17 ओ ङए खोबै थुमैं, ओंसों ओंनोंन् क्हेमैंइ चु ताँन् ताँमैं सेइमुँ। छतसि ठिम आम्हाँदिबै म्हिमैंइ परमेश्वरए ताँ लिग्याँने उग्याँ लवासि क्हेमैंलाइ आछ्याँबै केर च्होवाल् आखाँरिगे, छतसि ह्रोंसइ लबै बिश्वास आपिल्ले क्हेमैं न्ह क्रों मि क्रोंले टिद्।
18 बरु ङ्योलाइ जोगेमिंबै प्रभु येशू ख्रीष्टए थेबै दयाम्हाँया नेरो बुद्धिर बडिदै ह्याद्। खीलाइ तोगो नेरो खोंयोंइ या थेबै मान तरिगे। आमेन, छान् तरिगे।