103
ओ ङए सो, याहवेहए मिं क्वेद्
दाऊए भजन घ्रि
1 ओ ङए सो, याहवेहए मिं क्वेद्;
ओ ङए खों, खीए पबित्र मिं थेब लद्!
2 ओ ङए सो, याहवेहए मिं क्वेद्;
धै खीजी लबै छ्याँबै केमैं आम्लेद्।
3 क्हिइ लबै ताँन् छेरन् ङ्हाँबै केमैं खीजी क्षमा लमिंम्;
धै क्हिए ताँन् नब-छब सल् लमिंम्,
4 खीजी क्हि कालउँइँले जोगेमिंम्;
धै मुकुट कुब् धोंले खीए खोंयोंइ आनुबै म्हाँया नेरो ल्हयो खीजी क्हिलाइ लम्।
5 क्व्रे धोंले क्हिए छ्ह धबै छारा तरिगे बिसि
छ्याँ-छ्याँबै सैमैं पिंसि खीजी क्हिलाइ सैं तोंन् लमिंम्।
6 आगुइ क्र ओलै आपिंब्मैं ताँनए ल्हागिरि
याहवेहजी ठिक के नेरो निसाफ लमिंम्।
7 खीजी मोशालाइ ह्रोंसए घ्याँर प्रबर ल्हैदिइ;
धै इस्राएलीमैंए उँइँर खीजी थे-थेबै केमैं लसि उँइँइ।
8 याहवेह ल्हयो खब नेरो दयाम्हाँया मुँबै परमेश्वर ग,
युनन् ह्रिस आखब, ताँनए फिर खोंयोंइ आनुबै म्हाँया लब नेरो भर लल् खाँब मुँ।
9 खीजी खोंयोंइ छ्याब् आल्हैदिरि,
धै खीए खोंर खोंयोंन् बिलै ह्रिस आथेंरि।
10 ङ्योइ कति थेबै पाप ललेया ङ्योइ लबै पापए दण्ड खीजी ङ्योलाइ आपिं,
धै ङ्योइ आछ्याँबै के ललेया ङ्योइ लबै छेरन् ङ्हाँबै केमैंए दण्ड खीजी आपिं।
11 तलेबिस्याँ पृथ्बीउँइँले मु कति नुब मुँ,
खीलाइ मान लब्मैंए फिर खीए खोंयोंइ आनुबै म्हाँया या च्हगन् थेब मुँ।
12 स्यारउँइँले (पूर्व) न्हुँर (पश्चिम) कति ह्रेंगो मुँ,
ङ्योइ लबै छेरन् ङ्हाँबै केमैं खीजी च्हगन् ह्रेंगो स्योवाइमुँ।
13 खैले आबाइ ह्रोंसए च्ह च्हमिमैंए फिर ल्हयो खमुँ,
छलेन खीलाइ मान लब्मैंए फिर याहवेहजी ल्हयो खम्।
14 तलेबिस्याँ ङ्यो खैले बनेइ बिब खीजी सेइमुँ,
ङ्यो स त्हुल मत्त्रे ग बिबै या खीजी सेइमुँ।
15 म्हिए छ्ह छि धों तब् ग,
क्योंर्बै ट धोंले च प्हारसि म्हारम्,
16 दिलेया खैंइ लवामा च खारयाम्,
धै च चुर दने मुँल बिबै या खाबज्यै आसे।
17 दिलेया खी मान लब्मैं
खीजी खोंयोंन् बिलै म्हाँया लरिम्।
धै चमैंए च्ह-क्वेंमैं,
18 खीने फैबै बाछा पूरा लब्मैं,
नेरो खीजी बिबै के लब्मैं
ताँनए ल्हागिर क्वेंल् खाँब् तरिब्मुँ।
19 याहवेहए राजगद्दि स्वर्गर मुँ,
ताँनए फिर खीजी ग्याल्स लम्।
20 ओ खीजी बिबै ताँमै ङिंबै शक्ति मुँबै स्वर्गदूतमैं,
याहवेहए मिं क्वेद्।
21 ओ स्वर्गर्बै ताँन् सेनामैं,
खीए सैंर मैंब् धोंबै के लबै स्वर्गदूतमैं,
याहवेहए मिं क्वेद्।
22 ओ खीजी बनेबै तोंन्दोरि सैमैं,
खीजी ग्याल्स लबै ताँन् क्ल्ह्योर,
याहवेहए मिं क्वेद्!
ओ ङए सो, याहवेहए मिं क्वेद्!