106
याहवेहलाइ धन्यबाद पिंन्, तलेबिस्याँ खीजी ङ्योए फिर ल्हयो खम्
1 याहवेहए मिं थेब् लद्!
याहवेहलाइ धन्यबाद पिंन्, तलेबिस्याँ खीजी ङ्योए फिर ल्हयो खम्,
धै खोंयोंइ आनुबै म्हाँया लरिम्!
2 याहवेहजी लबै थेबै केमैंए बयन खाबइ लल् खाँमुँ?
“खी कति थेब मुँ!” बिसि खीए बयन खाबइ लल् खाँमुँ?
3 ठिक निसाफ लब्मैंइ आशिक योंब्मुँ,
धै चमैंइ खोंयोंन् बिलै ठिक के लसि सैं तोंरिब्मुँ।
4 ओ याहवेह, क्हिजी त्हाँबै म्हिमैंइ सुख शान्ति योंब ङइ म्रोंल् योंरिगे,
धै क्हिए म्हिमैं सैं तोंमा ङै या सैं तोंल् योंरिगे,
झाइले क्हिए हगवाला म्हिमैंने क्ह्रिसि क्हिए मिं थेब् लल् खाँरिगे बिसि
5 क्हिजी ह्रोंसए म्हिमैंए फिर ल्हयो खमा ङलाज्यै या मैंमिंन्,
धै चमैंलाइ खामिंमा ङलाज्यै या ल्होमिंन्।
6 ङिए खेमैंइ धोंले ङिज्यै या पाप लइमुँ;
ङिइ छेरन् ङ्हाँब नेरो दुष्ट केमैं लइमुँ।
7 ङिए खेमैं मिश्र ह्युलर मुँमा
क्हिजी लबै औदिबै केमैं चमैंइ वास्ता आल,
क्हिजी लबै खोंयोंइ आनुबै म्हाँया चमैंइ आमैं,
झन् काँसए घारि मुँबै मा ङ्युँइर चमैं ताँनइ क्हिए बिरोध लइ।
8 बिरोध ललेया ह्रोंसए बेल्ले थेबै शक्ति म्रोंरिगे बिसि,
खीजी ह्रोंसए मिंए आब्रु जोगेबै ल्हागिर चमैं जोगेमिंइ।
9 खीजी काँसए घारि मुँबै मा ङ्युँइलाइ हौदिमा च ङ्हारयाइ,
धै खीजी क्यु आयोंबै क्ल्ह्योर्बै घ्याँर धोंलेन् च गैरु क्ल्ह्योउँइँले ह्रोंसए म्हिमैं डोरेसि बोइ।
10 छले खीजी चमैंलाइ शत्तुरमैंए योउँइँले जोगेसि
शत्तुरमैंए योउँइँले फ्रेमिंइ।
11 चमैंए शत्तुरमैंलाइ बिस्याँ मा ङ्युँइए क्युइ हुवाइ,
चमैंए न्होंरि घ्रि या आसो।
12 झाइले खीजी बिबै ताँर बिश्वास लसि
चमैंइ खीए मिं थेब् लदै भजन क्वेमैं प्रिंइ।
13 दिलेया खीजी लबै केमैं चमैंइ युनन् म्लेयाइ;
धै खीजी तो बिब् ङ्हे बिसि चमैंइ थेबर आपैं।
14 तोइ आकेबै क्ल्ह्योर चमैंइ मिश्रर्बै लिंब-लिंबै चबै सै मैंसि बेल्ले चदा ङ्हाँइ,
धै चमैंइ क्यु आयोंबै क्ल्ह्योर परमेश्वरए जाँच लइ।
15 छतसि चमैंइ ह्रिबै सैमैं खीजी पिंइ,
दिलेया चमैंए फिर खीजी ह्रिं कुल्मिंइ।
16 तम्बुर चमैंइ मोशा नेरो
याहवेहए पबित्र म्हि हारूनए फिर ह्रिस लइ।
17 छतमा पृथ्बी क्ल्येयासि दातानलाइ क्ल्ह्योंवाइ,
झाइले अबिरामए म्हिमैंलाइ म्यालवाइ।
18 चमैंने क्ह्रिब्मैंए म्हाँजोर मि लुँइ;
मिए राबाइ दुष्टमैं मेब्रो लवाइ।
19 चमैंइ होरेब बिबै क्ल्ह्योर क्ल्या भाराए कु बनेसि
चए पूजा लइ।
20 छले चमैंइ बेल्ले थेबै परमेश्वर पिसि
छि चबै क्ल्याए कुलाइ मान लइ।
21 मिश्र ह्युलर थेबै केमैं लसि
खेंमैं जोगेमिंबै परमेश्वर चमैंइ म्लेयाइ।
22 चमैंए ल्हागिर्न खीजी हामए ह्युलर औदिबै केमैं
नेरो ओल्ग्या मा ङ्युँइर ङ्हिंन् ङ्हाँबै केमैं लल।
23 छतसि खीजी चमैं नास लवाम् बिल,
दिलेया खीए नास लबै ह्रिस म्हल् लबै ल्हागिर
खीजी त्हाँबै मोशा खीए ओंसों राइ।
24 चमैंइ खीजी बिबै बाछा आक्वें,
छतसि चमैंइ कनान ह्युलर होंल् आङिंसि च छ्याँबै ह्युललाइ तो धोंइ आङ्हाँ।
25 चमैंइ ह्रोंसए तम्बुर गनगन लइ,
धै याहवेहजी बिबै ताँ आथे।
26 छतमा चमैंलाइ क्यु आयोंबै क्ल्ह्योर नास लवाम् बिसि
खीजी यो रेसि कसम चइ।
27 झाइले चमैंए सन्तानमैं अरू ह्रेंमैंए म्हाँजोर
नेरो ह्यु-ह्युलर प्हुँवाब्मुँ बिइ।
28 चमैंइ पोर बिबै क्ल्ह्योर बाल बिबै देवताए पूजा लइ,
धै सो आप्ह्याबै देवतामैंलाइ चडेबै सैमैं चइ।
29 चमैंइ आछ्याँबै केमैं लसि याहवेह ह्रिस खल् लइ,
छतमा चमैंए म्हाँजोर ङ्हिंन् ङ्हाँबै ह्रिं खइ।
30 दिलेया पिनहास बिबै म्हि रेसि छेरन् ङ्हाँबै के लबै म्हिलाइ सजैं पिंइ,
धै याहवेहजी च ङ्हिंन् ङ्हाँबै ह्रिं म्हल् लवाइ।
31 चु केइ लमा चए पुस्ता-पुस्ता समा
खोंयोंन् बिलै चलाइ ठिक के लबै म्हि बिम्।
32 मेरिबाए क्युरै या चमैंइ याहवेह ह्रिस खल् लइ,
चमैंइ लमा मोशाइ दु:ख योंइ।
33 चमैंइ खीए सैं नल् लइ,
छतसि मोशाइ तब आतब ताँ पोंइ।
34 याहवेहजी आछ्याँबै के लबै ह्रेंमैं नास लवाद् बिसि चमैंने बिलेया
चमैंइ चमैं नास आल।
35 झन् चमैं आगु ह्रेंमैंनेन् प्रब टिब लसि
चमैंइ लब् धोंबै केमैंन् लइ।
36 परमेश्वरए म्हिमैंइ चमैंए कुमैं फ्योइ,
च कुमैं चमैंए ल्हागिर ङो चुब् धोंन् तइ।
37 चमैंइ ह्रोंसए च्ह-च्हमिमैं
स्यागि म्होंगिलाइ ख्रो पिंइ;
38 तोइ छ्याब् आरेबै ह्रोंसए च्ह-च्हमिमैं
चमैंइ कनानर्बै कुमैंए ल्हागिर ख्रो पिंइ,
धै चमैंए कोइ च ह्युल अपबित्र तइ।
39 छले चमैं ह्रोंसए केइन पापर च्होयाइ,
धै ह्रोंसइ लबै आछ्याँबै केइ लमा चमैं ब्यभिचार लब् धोंन् तइ।
40 छतसि ह्रोंसए म्हिमैंए फिर याहवेह बेल्ले ह्रिस खइ,
धै ह्रोंसजी त्हाँबै म्हिमैं म्रोंसि खी छेरइ।
41 झाइले खीजी चमैं अरू ह्रेंमैंए योर पिंवाइ,
धै चमैंए शत्तुरमैंइ चमैंए फिर ग्याल्स लइ।
42 चमैंए शत्तुरमैंइ चमैंलाइ क्र ओलै आपिं,
धै चमैंलाइ ह्रोंसए शक्तिए न्होंर थेंइ।
43 ल्हें खे खीजी चमैंलाइ दुःखउँइँले फ्रेमिंइ,
दिलेया चमैंइ ह्रोंसए सैंर तो मैंमुँ चन् लइ,
धै ह्रोंसए छेरन् ङ्हाँबै केइ लमा चमैं पापर्न प्ल्हुँयाइ।
44 दिलेया चमैंइ ओरदै ग्वार ह्रिब थेसि
खीजी चमैंए दुःख ङ्ह्योइ।
45 खीजी चमैंए ल्हागिर ह्रोंसइ फैबै बाछा मैंइ,
धै चमैंए फिर खोंयोंइ आनुबै म्हाँया लबइले खीए सैं एइ।
46 चमैंलाइ फैसि बोयाब्मैंलाज्यै या खीजी
चमैंए फिर ल्हयो खल् लमिंइ।
47 ओ ङिए याहवेह परमेश्वर, ङि जोगेमिंन्!
क्हिए पबित्र मिंलाइ धन्यबाद पिंबर
नेरो क्हिए मिं क्वेदै सैं तोंबर
अरू ह्रेंमैंए म्हाँजोउँइँले ङि खागु लमिंन्।
48 इस्राएलए याहवेह परमेश्वर
खोंयोंन् बिलै थेब् तरिगे!
धै ताँन् म्हिमैंइ “आमेन” बिरिगे।
याहवेहए मिं थेब् लद्!