112
ठिक के लबै म्हिल खोंयोंन् बिलै बिब् धों मैंब् धों तम्
1 याहवेहए मिं थेब लद्!
याहवेहलाइ मान लब
धै खीए ताँमैं सैं तोंदै म्हाँदिबै म्हिइ आशिक योंम्!
2 चए सन्तान ह्युलर बेल्ले भोंब तब्मुँ;
ठिक के लबै म्हिए सन्तानइ आशिक योंब्मुँ।
3 चए धिंर सैन्होर तब्मुँ,
धै चइ लबै ठिक केमैं खोंयोंन् बिलै तरिम्।
4 सोजो म्हिमैंए ल्हागिर म्हुँइँसरै या ह्वे चारम्,
चमैंइ दयाम्हाँया लम्, ल्हयो खम्, ठिक के लम्।
5 सैं प्ल्हसि छे पिंब
नेरो भर म्हाँदिल् खाँबै के लरिबै म्हिल बिब् धों मैंब् धों तम्।
6 ठिक के लबै म्हि खोंयोंन् बिलै छ्याँबै घ्याँर प्रम्;
छाबै म्हिलाइ खोंयोंन् बिलै मैंरिम्।
7 आछ्याँबै ताँमैं थेमा च आङ्हिं;
चइ याहवेहए फिर भर लबइले चए सैं भोंब मुँ।
8 चए सैं भोंब मुँ, छतसि च आङ्हिं,
लिउँइ शत्तुरमैं हार्दियाब चइ म्रोंब्मुँ।
9 आयोंब्-आख्युब्मैंलाइ चइ सैं प्ल्हसि पिंइमुँ;
चइ लबै ठिक केमैं खोंयोंन् बिलै तरिम्;
चलाइ ताँनइ मान लब्मुँ, धै चए क्र कैंडो तब्मुँ।
10 दुष्ट म्हिमैंइ चु म्रोंसि ह्रिस लब्मुँ,
धै स ह्रासि नास तयाब्मुँ;
दुष्ट म्हिमैंल बिब् धों मैंब् धों आत।